Kwan 13 - MUMA MALER 2015

Oor jombetre apar gariyo e piny Kanaan

¹ Ruoth Nyasaye nowacho ni Musa niya,

² “Or joote mondo odhi ocheng piny Kanaan ma abiro miyo jo-Israel. Jootego nyaka bed jotelo, ma ng’ato ka ng’ato ochung’ ni dhoot ka dhoot.”

³ Omiyo Musa noorogi kapod gin e thim Paran, mana kaka Ruoth Nyasaye nochike. Giduto ne gin jotend jo-Israel,

⁴ kendo magi e nyinggi: E dhood jo-Reuben, ne en Shamua wuod Zakur;

⁵ E dhood jo-Simeon, ne en Shafat wuod Hori;

⁶ E dhood jo-Juda, ne en Kaleb wuod Jefune;

⁷ E dhood jo-Isakar, ne en Igal wuod Josef;

⁸ E dhood jo-Efraim, ne en Hoshea wuod Nun;

⁹ E dhood jo-Benjamin, ne en Palti wuod Rafu;

¹⁰ E dhood jo-Zebulun, ne en Gadiel wuod Sodi;

¹¹ E dhood jo-Josef, tiende ni dhood jo-Manase, ne en Gadi wuod Susi;

¹² E dhood jo-Dan, ne en Amiel wuod Gemali;

¹³ E dhood jo-Asher, ne en Sethur wuod Mikael;

¹⁴ E dhood jo-Naftali, ne en Nabi wuod Vosfi;

¹⁵ E dhood jo-Gad, ne en Geuel wuod Maki.

¹⁶ Mago e nying joma Musa nooro mondo odhi ocheng piny Kanaan, to Hoshea wuod Nun to nochako ni Joshua.

¹⁷ Kane Musa dwaro orogi mondo gidhi gicheng pinyno, nowachonigi niya, “Chikuru yo milambo mar pinyno, bang’e uidh e piny gode.

¹⁸ Chenguru kaka pinyno chalo, kendo ka ji modak kuno rateke kata nyap, bende kata ka ginok kata ging’eny

¹⁹ Ranguru ane ka kit piny ma gidakieno ber kata rach, kendo kata ka mier ma gidakie ochiel motegno kata mayomyom,

²⁰ bende kata ka pinyno omew kata otwo kata ka yien nitie kata onge. Dhiuru gi chir, kendo ukel olemb pinyno moko.” Noyudo ka en ndalo ma mzabibu nyakie.

²¹ Kamano ne gidhi mi gichengo pinyno chakre thim Zin nyaka Rehob man but kama idonjogo Hamath.

²² Ne giidho ka ging’ado piny milambo, mi gichopo Hebron, kuma ne Ahiman gi Sheshai kod Talmai ma nyikwa Anak odakie. (Hebron noger higni abiriyo kapok oger Zoan man e piny Misri.)

²³ Bang’e ne gichopo e holo mar Eshkol, (tiende ni, saga mar mzabibu,) mi ging’ado bad mzabibu monyago saga achiel, kendo ji ariyo noting’e koliero e luth. Bende ne gipono olemb komamanga, kod ng’owo.

²⁴ Ne ochak kanyo ni holo mar Eshkol, nikech kanyo ema jo-Israel nong’adoe saga mar mzabibu.

²⁵ Bang’ ndalo piero ang’wen ne gidwogo Kadesh e thim Paran, ka gia chengo pinyno,

²⁶ mi gibiro ir Musa gi Harun kod oganda jo-Israel duto. Ne gipimonigi wach, kendo ne ginyisogi olembe mag pinyno.

²⁷ To ne giwacho ni Musa niya, “Ne wadhi mwawuotho e piny mane iorowa,

²⁸ mi wanwang’o ni en piny maber kendo momew, kendo magi e olembe manyak kuno. To jopinyno rateke, kendo miechgi ochiel motegno malich, kendo ne waneno nyikwa Anak kuno,

²⁹ gi jo-Amalek modak e piny milambo, gi jo-Hiti gi jo-Jebus kod jo-Amor modak e piny gode, kod jo-Kanaan modak e dho nam, kendo e bath aora Jordan.”

³⁰ To Kaleb nokwayo ji e nyim Musa mondo oling’, kowacho niya, “Wadhiuru piyopiyo mondo wakaw pinyno, nikech wan gi teko mwanyalo kawego.”

³¹ To joma noyudo osedhi kode kuno nowacho niya, “Ooyo, ok wanyal monjo jogo, nikech gitek moloyowa.”

³² Kuom mano weche mane giwacho ni jo-Israel kuom piny mane gia chengono nonyoso chuny ji, nikech ne giwacho niya, “Piny ma nyocha wadhi chengono en piny manyalo mwonyo ng’ato ang’ata modhi dakie. Bende ji duto ma waneno kuno gin joma rabede.

³³ Kane wagoyo wang’wa kuom jo-Nefili, to ne waneno ka wachalo mana dede, bende mano e kaka ne wachalonigi.” (Jo-Anak gin nyikwa Nefili.)