Kwan 1 - MUMA MALER 2015

Jo-Israel okwan e thim Sinai

¹ Chieng’ mokwongo mar due mar ariyo e higa mar ariyo, kane jo-Israel osewuok e piny Misri, Ruoth Nyasaye nowuoyo gi Musa e Hemb Romo e thim Sinai, kowachone niya:

² Dhiyo ikwan oganda jo-Israel duto e dhoutgi kaluwore gi kweregi,

³ kendo indik nying ng’ato ka ng’ato ma dichwo ma hike oseromo piero ariyo kata mokadho kanyo, moromo dhi e lweny. Un gi Harun nyaka undik nyinggi malong’o kuchanogi e ogendini mag lweny.

⁴ Nyaka okaw ng’ato achiel ma jatelo e dhoot ka dhoot mondo okonyu e tijno.

⁵ Magi e nying jogo ogogo: E dhood Reuben, en Elizur wuod Shedeur.

⁶ E dhood Simeon, en Shelumiel wuod Zurishadai.

⁷ E dhood Juda, en Nashon wuod Aminadab.

⁸ E dhood Isakar, en Nathaneel wuod Zuar.

⁹ E dhood Zebulun, en Eliab wuod Helon.

¹⁰ Kuom joka Josef to en Elishama wuod Amihud e dhood Efraim, kod Gamaliel wuod Pedazur e dhood Manase.

¹¹ E dhood Benjamin, en Abidan wuod Gideoni.

¹² E dhood Dan, en Ahiezer wuod Amishadai.

¹³ E dhood Asher, en Pagiel wuod Okran.

¹⁴ E dhood Gad en Eliasaf wuod Reuel.

¹⁵ To e dhood Naftali, en Ahira wuod Enan.

¹⁶ Mago ne jotelo mochung’ ni oganda duto e dhoutgi, kendo ne gin jodongo mag dhout Israel.

¹⁷ Musa gi Harun nokawo joma osehul nyinggigo,

¹⁸ kendo ne gichoko oganda jo-Israel chieng’ mokwongo mar due mar ariyo. Ne gichano anywolagi e dhoutgi kaluwore gi kweregi, ka gindiko nying ng’ato ka ng’ato ma dichwo ma hike oseromo piero ariyo kata mokadho kanyo, kaka Ruoth Nyasaye nosechiko Musa.

¹⁹ Kamano e kaka Musa nokwano jo-Israel e thim Sinai.

²⁰ Ne ochan jo-Reuben, ma wuod Israel maduong’, e utgi kaluwore gi kweregi, kindiko nying ng’ato ka ng’ato ma dichwo ma hike oseromo piero ariyo kata mokadho kanyo moromo dhi e lweny.

²¹ Kar rombgi ne alufu piero ang’wen gauchiel gi mia abich.

²² Jo-Simeon e utgi kaluwore gi kweregi, kindiko nying ng’ato ka ng’ato ma dichwo ma hike oseromo piero ariyo kata mokadho kanyo moromo dhi e lweny,

²³ ne alufu piero abich gochiko gi mia adek.

²⁴ Jo-Gad e utgi kaluwore gi kweregi, kindiko nying joma chwo duto ma hikgi oseromo piero ariyo kata mokadho kanyo ma oromo dhi e lweny,

²⁵ ne alufu piero ang’wen gabich gi mia auchiel kod piero abich.

²⁶ Jo-Juda e utgi kaluwore gi kweregi, kindiko nying joma chwo duto ma hikgi oseromo piero ariyo kata mokadho kanyo ma oromo dhi e lweny,

²⁷ ne alufu piero abiriyo gang’wen gi mia auchiel.

²⁸ Jo-Isakar e utgi kaluwore gi kweregi, kindiko nying joma chwo duto ma hikgi oseromo piero ariyo kata mokadho kanyo ma oromo dhi e lweny,

²⁹ ne alufu piero abich gang’wen gi mia ang’wen.

³⁰ Jo-Zebulun e utgi kaluwore gi kweregi, kindiko nying joma chwo duto ma hikgi oseromo piero ariyo kata mokadho kanyo ma oromo dhi e lweny,

³¹ ne alufu piero abich gabiriyo gi mia ang’wen.

³² Joka Josef ma jo dhood Efraim e utgi kaluwore gi kweregi, kindiko nying joma chwo duto ma hikgi oseromo piero ariyo kata mokadho kanyo ma oromo dhi e lweny,

³³ ne alufu piero ang’wen gi mia abich.

³⁴ To joka Josef ma jo dhood Manase e utgi kaluwore gi kweregi, kindiko nying joma chwo duto ma hikgi oseromo piero ariyo kata mokadho kanyo ma oromo dhi e lweny,

³⁵ ne alufu piero adek gariyo gi mia ariyo.

³⁶ Jo-Benjamin e utgi kaluwore gi kweregi, kindiko nying joma chwo duto ma hikgi oseromo piero ariyo kata mokadho kanyo ma oromo dhi e lweny,

³⁷ ne alufu piero adek gabich gi mia ang’wen.

³⁸ Jo-Dan e utgi kaluwore gi kweregi, kindiko nying joma chwo duto ma hikgi oseromo piero ariyo kata mokadho kanyo ma oromo dhi e lweny,

³⁹ ne alufu piero auchiel gariyo gi mia abiriyo.

⁴⁰ Jo-Ashur e utgi kaluwore gi kweregi, kindiko nying joma chwo duto ma hikgi oseromo piero ariyo kata mokadho kanyo ma oromo dhi e lweny,

⁴¹ ne alufu piero ang’wen gachiel gi mia abich.

⁴² Jo-Naftali e utgi kaluwore gi kweregi, kindiko nying joma chwo duto ma hikgi oseromo piero ariyo kata mokadho kanyo ma oromo dhi e lweny,

⁴³ ne alufu piero abich gadek gi mia abich.

⁴⁴ Mago e kwan jo-Israel mane Musa gi Harun kod jodong dhout Israel apar gariyogo ochano, ka jaduong’ ka jaduong’ ochung’ gi dhoot ka dhoot.

⁴⁵ Jo-Israel ma hikgi oseromo piero ariyo kata mokadho kanyo ma oromo dhi e lweny ne ondik nyinggi e dhout kweregi.

⁴⁶ Kar rombgi ne alufu mia auchiel gadek gi mia abich gi piero abich.

Oket jo-Lawi e tich mar rito Hema Maler

⁴⁷ To nying jo-Lawi kaluwore gi kweregi ne ok ondiki,

⁴⁸ nikech Ruoth Nyasaye nosewacho ni Musa niya,

⁴⁹ “Kik ikwan jo-Lawi kaka ikwano jo-Israel mamoko, kendo kik indik nyinggi kodgi,

⁵⁰ to iketgi e tich rito Hema Maler gi gige duto. Gin kende ema ginibed jorit Hema Maler, kendo ginigur hembegi molwore koni gi koni.

⁵¹ Ka Hema Maler dhi kamoro, to jo-Lawi ema nopudhe, kendo kochopo kama gidhiye, to gin ema onego gigure. Ka ng’ato ang’ata ma ok owal ni tijno osudo but Hema Maler, to nyaka nege.

⁵² Jo-Israel mamoko duto nyaka gur hembegi dhoot ka dhoot e kambine, kendo e bwo bandeche.

⁵³ To jo-Lawi nogur hembegi e alwora mar Hema Maler mar Rapar, mondo mirimba kik bi kuom oganda duto mag Israel. Kamano jo-Lawi ema nobed karito Hema Maler mar Rapar.”

⁵⁴ Jo-Israel notimo mana kaka ne Ruoth Nyasaye ochiko Musa.