Joshua 9 - MUMA MALER 2015

Jo-Gibeon owuondo jo-Israel

¹ Ruodhi duto ma nodak yo podho chieng’ mar Jordan nowinjo humb wechego. Ne gin ruodhi mag jo-Hiti, gi mag jo-Amor, gi mag jo-Kanaan, gi mag jo-Perizi, gi mag jo-Hivi, kod mag jo-Jebus, mane gin ogendini modak e gode, gi pewe kod e dho Nam Mediterenia nyaka Lebanon yo nyandwat.

² Kane giwinjo wechego, ne giriwore giduto, mondo giked gi Joshua kod jo-Israel.

³ To kane jo-Gibeon owinjo gima Joshua osetimo Jeriko gi Ai, ne giparo mondo giwuonde.

⁴ Ne gikawo gunde moti moting’o chiemo motwo kendo mopur, mi giketo e ng’e kenjegi, kaachiel gi ndede mobaw obaw mag divai.

⁵ Ne girwako wuoch moyiech, kod nengni moti,

⁶ eka ne gibiro ir Joshua e kambi Gilgal, mi giwachone kod jo-Israel niya, “Waa e piny mabor ahinya, omiyo yie watim kodu winjruok mar kue.”

⁷ To jo-Israel nodwoko jo-Hivigo niya, “Ang’o ma dimi watim kodu winjruok mar kue? Kamoro udak mana machiegni kodwa.”

⁸ Jo-Hivi to nowacho ni Joshua niya, “Wayie bedo e bwo lochni.” Eka Joshua nopenjogi nyinggi, kendo kuma giaye.

⁹ Ne gidwoke niya, “Ruoth, waa e piny mabor ahinya nikech humb Ruoth Nyasaye ma Nyasachu. Wasewinjo gik ma notimore e Misri,

¹⁰ kendo gima notimo ni ruodhi ariyo mag jo-Amor man yo wuok chieng’ mar Jordan, ma gin Sihon ruodh Heshbon kod Og ruodh Bashan ma nodak Ashtaroth.

¹¹ Omiyo jodongwa duto nochikowa mondo wakaw chiemo ma dirom wuoth, kendo wabi iru mondo wanyisu ni wayie bedo e bwo lochu. Kuom mano, yie watim kodu winjruok mar kue.

¹² Neuru makati mwating’ogi. Kane wachako wuoth kwabiro ka, ne pod giliet, to koro gisetwo kendo gipur.

¹³ Neuru ndedewagi! Kane waoloe divai, ne ginyien, to koro giseyiech. Wuochewa gi lepwa bende oseti nikech wuoth mabor.”

¹⁴ Jotelo moko mag jo-Israel nobilo chiemb jogo, mak gipenjo Ruoth Nyasaye wach.

¹⁵ Omiyo Joshua norwako jootego, motimo kodgi winjruok mar kue, kokuong’orenigi ni ok noneggi, kendo jodong Israel bende okuong’orenigi kamano.

¹⁶ Chieng’ mar adek bang’ timo kodgi winjruokno, wach nofwenyore ni kara gin manaa jogweng’ modak machiegni.

¹⁷ Mano omiyo jo-Israel nochako wuoth, kendo bang’ ndalo adek ne gichopo e mier mane jogo odakie. Miego ne gin Gibeon gi Kefira gi Beeroth kod Kiriath-jearim.

¹⁸ Jo-Israel ne ok onegogi, nikech singruok mane jodong Israel otimo kodgi e nying Ruoth Nyasaye ma Nyasach Israel, to kata kamano ji duto nong’ur gi jodonggi.

¹⁹ To jodongo duto nodwokogi niya “Ng’euru ni ne wachamo kodgi muma e nying Ruoth Nyasaye ma Nyasach Israel, omiyo koro ok wanyal mulogi.

²⁰ Wabiro weyogi mak wanegogi, mondo muma mane wachamo kodgi kik dognwa,

²¹ to wabiro ketogi joma baronwa yien kendo ma umbonwa pi.” Kamano jo-Israel duto noyie gi wach mane jodonggi onyisogi.

²² Joshua noluongo jo-Gibeon, mopenjogi niya, “Ere gimomiyo ne uwuondowa kamano? Nunyisowa ni ua e piny mabor ahinya, to kara un mana jogweng’!

²³ Koro unubed joma okwedi nikech wachni, kendo e kinde duto unubed wasumbwa ma baro yien kendo ma umbo pi mitiyogo e Od Nyasachwa.”

²⁴ Ne gidwoke niya, “Ruoth, ne watimo kamano nikech nonyiswa ni Ruoth Nyasaye ma Nyasachi nochiko Musa jatichne ni mondo ochiwnu pinyni duto, kendo ni mondo uneg ji duto modakie. Kuom mano, birou osemiyo kihondko omakowa.

²⁵ Koro wan e lweti, omiyo timnwa gima ineno ni ber.”

²⁶ Kamano Joshua noresogi e lwet jo-Israel, mi ne ok ginegogi.

²⁷ To chakre kanyono noketogi jobar yien kod joumb pi ni jo-Israel, kendo ni tich kendo-mar-misango mar Ruoth Nyasaye. Pod gitiyo kamano nyaka chil kawuono kamoro amora ma Ruoth Nyasaye oyiero.