Joshua 4 - MUMA MALER 2015

Ogol kite apar gariyo e aora Jordan

¹ Kane ji duto oseng’ado aora Jordan, Ruoth Nyasaye nowacho ni Joshua niya,

² “Yier ji apar gariyo, kigolo ng’at achiel e dhoot ka dhoot,

³ kendo chikgi mondo gikwany kite apar gariyo e dier Jordan, kama ne jodolo ochung’ie, mondo giting’gi mi gichunggi kama ang’ nubworie gotienoni.”

⁴ Eka Joshua noluongo ji apar gariyo ma noseyiero,

⁵ mowachonigi niya, “Kadhuru utel e nyim Sandug Muma mar Ruoth Nyasaye ma Nyasachu nyaka e dier Jordan, kendo ng’ato ka ng’ato mondo okwany kidi achiel oyie e goke, mondo kidi ka kidi ochung’ ni dhoot ka dhoot.

⁶ Kitego nobednu ka rapar e ndalo mabiro, kendo ka nyithindu nopenju ngechgi,

⁷ to ununyisgi kaka pi aora Jordan noduono kane Sandug Muma mar Ruoth Nyasaye kadho. Kamano kitego nobed rapar ni jo-Israel ndalo duto.”

⁸ Jo-Israelgo notimo gima ne Joshua ochikogi, kaka Ruoth Nyasaye nosechike. Ne gikwanyo kite apar gariyo e dier Jordan, maromre gi kar kwan dhoutgi, kendo ne giting’ogi nyaka kama ne gidhi bworoe, mi giketogi kanyo.

⁹ Bende Joshua nochungo kite apar gariyo moko e dier aora Jordan, kama jodolo mane oting’o Sandug Muma ochung’ie, kendo kitego pod ni kanyo nyaka chil kawuono.

¹⁰ Jodolo ma noting’o Sandug Muma nochung’ achung’a e dier Jordan nyaka ji notieko timo gik moko duto mane Ruoth Nyasaye ochiko Joshua mondo gitim. Ji nokadho piyopiyo,

¹¹ to kane giseng’ado aroa giduto, eka jodolo bende nong’ado gi Sanduk mar Ruoth Nyasaye,

¹² Jo-Reuben gi jo-Gad kod jo-Manase konchiel ema nong’ado aora kotelo ni jo-Israel, ka giikore ni lweny kaka Musa nosewachonigi.

¹³ Ji alufu mia ang’wen moikore ni lweny nong’ado aora e nyim Ruoth Nyasaye ka giidho loka nyaka paw Jeriko mondo gikedi.

¹⁴ Chieng’no Ruoth Nyasaye nomiyo Joshua bedo gi duong’ ahinya e nyim jo-Israel duto, kendo ne gimiye luor e ngimane duto, mana kaka ne gimiyo Musa.

¹⁵ Ruoth Nyasaye nowacho ni Joshua niya,

¹⁶ “Chik jodolo moting’o Sandug Rapar, mondo owuog e aora Jordan.”

¹⁷ Mi Joshua notimo kamano.

¹⁸ To kane jodolo oseidho loka, monyono lowo motwo, aora nochako mol kendo, mi genge nopong’ kaka chon,

¹⁹ Jo-Israel nong’ado aora Jordan tarik apar mar due mokwongo, kendo ne gibworo Gilgal, yo wuok chieng’ mar Jeriko.

²⁰ Kanyo Joshua nochungoe kite apar gariyo mane gigolo e aora Jordan.

²¹ Eka nowacho ni jo-Israel niya, “Ka nyikwau nopenju ngech kitegi e ndalo mabiro,

²² to ununyisgi ni jo-Israel nong’ado aora Jordan kotwo,

²³ kendo ne Ruoth Nyasaye ma Nyasachu nomiyo aora Jordan odwono nyaka ne ukadho uduto mana kaka nomiyo Nam Makwar oduono nyaka ne wakadho.

²⁴ Kamano ji duto manie piny nong’e teko mar Ruoth Nyasaye, kendo ginimi Ruoth Nyasaye ma Nyasachu duong’ nyaka chieng’.”