Joshua 24 - MUMA MALER 2015

Oriti ma Joshua ogoyo ni jo-Israel

¹ Joshua nochoko dhout jo-Israel duto Shekem, noluongo jodongo gi jotelo mag Israel, mi ne gisudo e nyim Ruoth Nyasaye.

² Eka Joshua nonyiso ji duto ni Ruoth Nyasaye ma Nyasach Israel owacho kama: “Chon, Tera wuon Ibrahim gi Nahor ma kwereu, nodak loka aora Yufrate, kendo ne gilamo nyiseche mamoko.

³ To ne agolo kwaru Ibrahim loka Yufrate, mi atelone kowuotho e piny Kanaan duto, kendo namiye nyikwayo mang’eny, namiye Isaka,

⁴ to Isaka namiyo Jakobo kod Esau. Namiyo Esau piny Seir motimo gode mondo obed mare, to Jakobo gi nyithinde nodhi Misri.

⁵ Bang’e naoro Musa kod Harun, kendo nakelo chandruok mathoth ni jo-Misri, eka nagolou kuno.

⁶ Kane asegolo kwereu Misri kamano, kendo gichopo e Nam Makwar, jo-Misri nolawogi kod farese gi geche mag lweny nyaka e namno.

⁷ To kane jo-Israel oywakna gi chunygi duto, naketo mudho e kindgi gi jo-Misri, kendo namiyo nam oduogo moimo jo-Misrigo, kendo nuneno gima natimonigi. “Bang’ mano ne udak e thim ndalo mang’eny,

⁸ nyaka nakelou e piny jo-Amor ma nodak yo wuok chieng’ mar aora Jordan. Ne gikedo kodu to naloyogi, maketogi e lwetu, mi ukawo pinygi.

⁹ Balak wuod Zipor ma ruodh Moab bende nokedo kodu. Nooro Balaam wuod Beor mondo obi okuong’u,

¹⁰ to ne ok ayiene mondo otim kamano. Omiyo kar kuong’ou, to noguedhou, mi naresou e lwet Balak.

¹¹ Eka bang’e nung’ado aora Jordan, muchopo Jeriko. Jo-Jeriko gi jo-Amor gi jo-Perizi gi jo-Kanaan gi jo-Hiti gi jo-Girgash gi jo-Hivi kod jo-Jebus nokedo kodu, to namiyo uloyogi duto.

¹² Giu mag lweny ok ema noriembogi.

¹³ Namiyou piny mane luchu ok ochuerie, kod mier mane ok ugero, ma koro udakie, kendo uchamoe olemb mzabibu kod zeituni mane ok upidho.

¹⁴ “Kuom mano, lamuru Ruoth Nyasaye, kendo tineuru gi chuny modimbore. Wituru nyiseche mane kwereu lamo kane gidak loka aora Yufrate, kendo e piny Misri, to lamuru mana Ruoth Nyasaye.

¹⁵ Ka ok uikoru mar tiyone, to yieruru tinendeni nyasaye mubiro tiyone. Unyalo tiyone nyiseche mane kwereu lamo loka aora Yufrate, kata nyiseche mag jo-Amor, ma koro udak e pinygini. To an, kaachiel gi jooda, wabiro tiyo ni Ruoth Nyasaye.”

¹⁶ Jo-Israel nodwoko Joshua niya, “Ok wadwar weyo Ruoth Nyasaye kata matin, mondo wati ni nyiseche mamoko.

¹⁷ Ruoth Nyasaye ma Nyasachwa ema nogolo kwerewa kod wan bende e piny Misri kuma ne wabedoe wasumbini, kendo ne waneno honni ma notimo. Noritowa kamoro amora mane wadhiye, kendo e kind ogendini mane wawuothoe.

¹⁸ To bende Ruoth Nyasaye noriembo jo-Amor gi ogendini moko ma nodak e pinyni mondo owenwa thuolo. Kuom mano, wan bende wabiro tiyo ni Ruoth Nyasaye, nimar en Nyasachwa.”

¹⁹ Joshua nowachonigi niya, “Ok dunyal tiyo ni Ruoth Nyasaye, nimar en Nyasaye maler, kendo ma janyiego, ma ok nowenu richou kod timbeu mamono.

²⁰ Kuweyo Ruoth Nyasaye, mutiyo ni nyiseche mamoko, to enolokre jasiku, kendo nokumu. Kata obedo ni oseguedhou kamano, to koro enotieku chuth.”

²¹ To ji duto nodwoko Joshua niya, “Ooyo, wabiro tiyo ni Ruoth Nyasaye.”

²² Eka Joshua nowachonigi niya, “Un uwegi un joneno.”

²³ To Joshua nomedo wachonigi niya, “Wituru nyiseche mag pinje mamoko, kendo keturu chunyu kuom Ruoth Nyasaye ma Nyasach Israel.”

²⁴ Ne gidwoke niya, “Wanati ni Ruoth Nyasaye ma Nyasachwa, kendo wanarit chikene.”

²⁵ Kamano Joshua nomiyo jo-Israel otimo singruok gi Ruoth Nyasaye ka gin Shekem odiechieng’no, mi nomiyogi chike.

²⁶ Nondiko chikego e Kitap Chik mar Ruoth Nyasaye, kendo nochungo kidi maduong’ e tiend yath man but Hema Maler mar Ruoth Nyasaye.

²⁷ Eka nowacho ni ji duto niya, “Uneno kidini? Nobednwa janeno, nikech osewinjo weche duto ma Ruoth Nyasaye owachonwa. Kuom mano, nobednu janeno mondo kik uwe luwo Ruoth Nyasaye.”

²⁸ Eka Joshua nomiyogi thuolo, kendo ng’ato ka ng’ato nodok kar dakne e lowo mopogne.

Tho Joshua gi tho Eleazar

²⁹ Bang’ mago duto, Joshua wuod Nun jatich Ruoth Nyasaye notho, ka jahigni mia achiel gapar.

³⁰ Ne giyike e lope owuon mane ni Timnath-sera, yo nyandwat mar got Gaash, e piny gode mag Efraim.

³¹ Jo-Israel notiyo ni Ruoth Nyasaye e ndalo duto mag Joshua, kod e ndalo jodongo mane odong’ bang’e, kendo mane ong’eyo gik mane Ruoth Nyasaye otimo ni Israel.

³² Choke Josef mane jo-Israel ogolo Misri, noyik Shekem, e lowo mane Jakobo ong’iewo gi yawuot Hamor wuon Shekem kuom siling’ mia achiel. Achien lowono nobedo mar joka Josef.

³³ Eleazar wuod Harun bende notho, mi noyike Gibea, dala mane opog ni Finehas wuode e piny gode mag Efraim.