Joshua 22 - MUMA MALER 2015

Kendo-mar-misango oger e bath aora Jordan

¹ Bang’ wechego duto, Joshua noluongo jo-Benjamin gi jo-Gad kod jo-Manase konchiel kande,

² mowachonigi niya, “Usechopo chike duto mag Musa jatich Ruoth Nyasaye, kaachiel gi maga bende.

³ E kindegi duto ok useringo uweyo jo-Israel weteu, to userito chik Ruoth Nyasaye ma Nyasachu gi chunyu duto nyaka chil kawuono.

⁴ To koro Ruoth Nyasaye osemiyo oweteu pinyni kaka nosingorenigi, omiyo unyalo dok e miechu manie piny mane Musa jatich Ruoth Nyasaye omiyou yo wuok chieng’ mar aora Jordan.

⁵ Neuru ni urito chik duto mane Musa jatich Ruoth Nyasaye omiyiou. Heruru Ruoth Nyasaye ma Nyasachu, kuluwo yorene, kendo kurito chikene. Padreuru kuome, kutiyone gi chunyu duto.”

⁶ Eka Joshua noguedhogi, kendo nowachonigi niya,

^7-8 “Ero, udok e miechu gi mwandu mang’eny. Un gi dhok mathoth, gi fedha kod dhahabu, gi mula kod nyinyo, kendo gi lewni mogundho. Neuru ni upogo ni joweteu gigo duto musepeyo kuom wasiku.” Bang’ wachonigi kamano, noweyogi gia, mi gidok miechgi. (Musa nosemiyo jo-Manase konchielgi lowo e Bashan, to jo-Manase modong’ ema Joshua nomiyo lowo yo podho chieng’ mar Jordan kaachiel gi jowetegi.)

⁹ Kuom mano, jo-Reuben gi jo-Gad kod jo-Manase konchiel noweyo jo-Israel Shilo e piny Kanaan. Ne gidok Gilead e pinygi, mane Ruoth Nyasaye osechiko Musa ni mondo gikaw.

¹⁰ To kane gichopo Geliloth man but aora Jordan, ne gigero kendo mang’ongo mar misango e bath aora kanyo, mane ji nyalo neno gi kuma bor.

¹¹ Kane jo-Israel mamoko owinjo ni jo-Reuben gi jo-Gad kod jo-Manase konchiel osegero kendo-mar-misango Geliloth e bath aora Jordan, kama omanyore gi piny Kanaan,

¹² ne gichokore Shilo mondo gidhi giked kodgi.

¹³ Bende ne gioro Finehas wuod Eleazar jadolo e piny Gilead ir jo-Reuben gi jo-Gad kod jo-Manase konchiel,

¹⁴ mi nodhi gi jotelo apar mag dhout Israel ka moro ka moro ochung’ ni dhoot ka dhoot.

¹⁵ Ne gibiro ir jogo, mi giwachonigi niya,

¹⁶ “Wabiro e nying jo-Ruoth Nyasaye duto mondo wapenju gima omiyo usetimo gima rachni e nyim Ruoth Nyasaye ma Nyasach Israel? Useketho ni Ruoth Nyasaye, nikech ugero kendo-mar-misango maru uwegi, kendo useweyo luwe.

¹⁷ Paruru richo mane watimo Peor, kod kum mane Ryoth Nyasaye omiyowa, ma pok orumo nyaka chil kawuono.

¹⁸ Uparo ni kumno ne yot, ma kendo pod uweyoe mana luwo Ruoth Nyasaye? Ka uketho ni Ruoth Nyasaye kawuono, to kiny nokech gi jo-Israel duto.

¹⁹ Kuom mano, kuneno ni ok unyal lemo maber e pinyu, to biuru lokawa e piny Ruoth Nyasaye kuma ogurie Hema Maler, mondo udag kodwa. To kik uwe Ruoth Nyasaye, mi urwakwa e masira, kugero kendo-mar-misango machielo ni ma ok mana mar Ruoth Nyasaye ma Nyasachwa ma noseger cha.

²⁰ Paruru kaka Akan wuod Zera notamore rito chik kuom gik mokwer, momiyo jo-Israel duto noyudo kum, ma ok Akan kende ema ne otho nikech richono!”

²¹ Jo-Reuben gi jo-Gad kod jo-Manase konchiel nodwoko jotend dhout Israelgo niya,

²² “Ruoth Nyasaye e Nyasaye Maduong’! Ruoth Nyasaye e Nyasaye Maduong’! En ema ong’eyo gima omiyo ne wagero kendoni, to un bende nyaka ung’e. Ka en adieri ni waseketho, kendo waweyo Ruoth Nyasaye, to owinjore watho.

²³ Ka dibed ni wasepiem gi Ruoth Nyasaye, kendo wagero kendowa wawegi mondo wawang’ie misengini, kata watimie misengni mag cham kata mag kue, to Ruoth Nyasaye owuon mondo okumwa.

²⁴ Ne watimo kamano nikech dipo ka chieng’ moro nyikwau owacho ni nyikwawa niya, ‘Ere gima omiyo uluongoru ni jo-Ruoth Nyasaye ma Nyasach Israel?

²⁵ Ruoth Nyasaye noseketo aora Jordan mondo opog kindwa kodu, omiyo ok un joge.’ Ka giwacho kamano, to di gimon nyikwawa lamo Ruoth Nyasaye.

²⁶ Kuom mano ne wagero kendoni

²⁷ mana ni mondo obed ranyisi ni jowa gi jou, kod joma nobi bang’wa, ni walamo Ruoth Nyasaye gi misengni miwang’o gi mag sawo kod mamoko. To kata kamano ne ok wagere mondo watimie misango. Kamano nyikwau ok nonyal wacho ni nyikwawa ni ok gin jo Ruoth Nyasaye.

²⁸ Ne waparo bende ni ka gima kamano ditimrenwa, kata ni nyikwawa, to wanyalo nyisogi kido mar kendo-mar-misango mar Ruoth Nyasaye ma wasegero. Ok en mar wang’o misengni kata gimoro amora machalo kamano, to en mana ranyisi e kindwa kodu.

²⁹ Ok wanyal piem gi Ruoth Nyasaye, bende ok wanyal weyo luwe, kwagero kendo machielo, to mak mana mano mar Ruoth Nyasaye ma Nyasachwa mochung’ e dho Hema Maler.”

³⁰ Kane Finehas jadolo gi jodong oganda kod jotend dhout Israel owinjo wach jo-Reuben gi jo-Gad kod jo-Manase, ne gimor ahinya.

³¹ Eka Finehas wuod Eleazar jadolo nowacho ni jo-Reuben gi jo-Gad kod jo-Manase niya, “Kawuono wang’eyo ni Ruoth Nyasaye ni kodwa, nikech ok usetimo gima Ruoth Nyasaye okwero. Kuom mano usereso jo-Israel mondo kik Ruoth Nyasaye kumgi.”

³² Bang’e Finehas wuod Eleazar jadolo kod jotelo noweyo jo-Reuben gi jo-Gad e piny Gilead mi gidok Kanaan ir jo-Isarel mamoko mondo gidwoknigi wach.

³³ Jo-Israel ne mor gi wachgi, mi ne gipako Ruoth Nyasaye, kendo ne giweyo wach dhi kedo gi jo-Reuben gi jo-Gad, kendo ketho pinygi.

³⁴ Jo-Reuben gi jo-Gad noluongo kendono ni ‘Rapar’, nikech ne giwacho niya, “Noparnwa waduto ni Ruoth Nyasaye en Nyasaye.”