Joshua 2 - MUMA MALER 2015

Joshua ooro jombetre Jeriko

¹ Kane pod gin Shitim, Joshua wuod Nun nooro jombetre ariyo ling’ling’ mondo odhi ocheng piny. Jombetrego nodhi Jeriko modonjo e od dhako moro ma ohodho ma nyinge Rahab, kendo ne ginindo kanyo.

² To ruodh Jeriko noyudo wach ni jo-Israel moko osebiro kanyo gotieno mondo ocheng piny,

³ omiyo nooro ni Rahab wach, kochike niya, “Golnwa joma nie odigo oko, nimar gisebiro mondo gicheng pinywa duto.”

⁴ To noyudo dhakono osepandogi, omiyo nodwoko ruoth niya, “Adier, jomoko nende obiro e oda, to ne ok ang’eyo kuma giaye.

⁵ Nende giwuok kar sa miloroe rangach ka piny dwaro yuso, to akia kuma gidhiye. Kulawogi matek, to ubiro jukogi.”

⁶ To chutho, noseterogi ewi tado, moumogi gi tworo mane osechano kanyo.

⁷ Jootego nowuok, molor rangach. Ne gilawo jombetre ka giluwo yo madhi kuma iyorogo aora Jordan.

⁸ Kane Rahab odhi ir jombetrego e tado, nonwang’o ka pok ginindo,

⁹ mowachonigi niya, “Ang’eyo ni Ruoth Nyasaye osemiyou pinyni, kendo en adier ni waduto waluor nikech birou, kendo kibaji omako piny duto.

¹⁰ Wasewinjo kaka Ruoth Nyasaye nodwono pi Nam Makwar e nyimu, kane ua Misri. Bende wasewinjo kaka nunego Sihon gi Og, ruodhi mag jo-Amon man loka Jordan, kaachiel gi ogendini mag lweny.

¹¹ Kane wawinjo wachno, ne wadoko maluor. Birou bende osekawo chunywa duto, nimar Ruoth Nyasaye ma Nyasachu en Nyasach polo gi piny.

¹² Emomiyo koro kuong’renauru e nying Ruoth Nyasaye kendo umiya ranyisi ni kaka asetimonu maber, un bende nutimne joodwa maber.

¹³ Singrenauru ni unures wuora gi mama kod owetena gi nyiminena, kaachiel gi joutgi duto. Kik uwe watho.”

¹⁴ Jogo nodwoke niya, “Kutho, to kara wan bende owinjore watho. Ka Ruoth Nyasaye osemiyowa pinyni, to wanarit singruokwa, kendo wanatimni maber, mak mana kihulo wachwani.”

¹⁵ Rahab nodak e ot mochuog e kor ohinga mar dala Jeriko, omiyo nogologi gie dirisa, molorogi piny gi tol,

¹⁶ kowachonigi niya, “Dhiuru e got, nikech dipo ka joma lawou oyudou, ponduru kuno kuom ndalo adek, to bang’e ka jogo oseduogo, eka uchak wuoth.”

¹⁷ Jombetrego nosieme ni ka ok otimo gima gichike, to muma ok nomakgi.

¹⁸ Ne giwachone niya, “Chieng ma wanadonj e pinyni, to nyaka itue tol makwarni e dirisa kama ilorowaeni, kendo ichok wuoru gi meru gi oweteni kod joodu duto, mondo gibed kodi e odi ka.

¹⁹ Ka ng’ato nowuog oko, mi negi, to rembe nobed e wiye owuon, kendo ok wanabed joketho. To ka oneg ng’ato man kodi e ot, to rembe nobed e wiwa.

²⁰ To kapo ni ihulo wachwani, muma ok nomakwa.”

²¹ Nodwokogi niya, “Obed kamano.” Eka noweyogi, mi gidhi. To bang’e notueyo tol makwar e dirisa.

²² Kamano ne gidhi e got, mi gipondo kuno. Joma ne lawogi nomanyogi kuonde duto e yo madhi Jordan kuom ndalo adek, to ne ok giyudogi, omiyo ne gidok Jeriko.

²³ Eka jombetre ariyogo nolor oa e got. Ne ging’ado aora, mi gidok ir Joshua.

²⁴ Ne ginyise weche duto ma notimorenigi, ka gimedo nyise niya, “Ruoth Nyasaye osemiyowa pinyno duto, kendo kibaji osemako ji duto, ka giwinjo birowa.”