Joshua 16 - MUMA MALER 2015

Piny mopog ni jo-Efraim gi jo-Manase komachielo

¹ Piny mane opog ni joka Josef gi ombulu nochakore e aora Jordan, kama omanyore gi Jeriko, yo wuok chieng’ mar sokni mag Jeriko man but thim. Tong’gi noa Jeriko, moidho Bethel.

² Koa Bethel, noidho Luz mochopo Ataroth manie tong’ piny jo-Arki.

³ Eka nochomo yo podho chieng, kolor nyaka tong’ piny jo-Jaflet, mochopo but Beth-horon Mamwalo kod Gezer, mogik e Nam Mediterenia.

⁴ Pinyno ema nopog ni jo-Manase kod jo-Efraim ma yawuot Josef.

⁵ To piny dhout jo-Efraim e ma: Mbapgi ma yo wuok chieng’ nochakore Ataroth-adar, modhi nyaka Beth-horon Mamalo.

⁶ Eka nochiko yo-podho chieng’, koweyo Mikmethath yo nyandwat, kendo nokadho yo wuok chieng’ mar Taanath-shilo kod Janoa.

⁷ Kosekadho Janoa nolor nyaka Ataroth kod aora Jordan.

⁸ Tong’gi ma yo nyandwat noa Tapua, kochiko yo podho chieng’ moluwo aora Kana, nyaka nogik Naaroth, mokadho machiegni gi Jeriko, mogik e nam Mediterenia. Pinyno ema nopog ni dhout jo-Efraim,

⁹ kaachiel gi mier moko mane omigi ei piny jo-Manase kod mier matindo mokiewo kodgi.

¹⁰ To jo-Efraim ne ok oriembo jo-Kanaan ma nodak Gezer, mi jo-Kanaan-go pod odak e diergi nyaka chil kawuono, to nochun-gi mondo gibed wasumbni nyaka chieng.