Joshua 14 - MUMA MALER 2015

Piny Kanaan opog gi ombulu

¹ Koro magi e pok mane jo-Israel oyudo e piny Kanaan kaka Eleazar jadolo gi Joshua wuod Nun kod jodong dhout Israel nopogonigi.

² Pinyno nopog gi ombulu, ni dhoudi ochiko gi nus kande kaluwore gi chik mane Ruoth Nyasaye omiyo Musa.

³ Musa nosepogo ni dhoudi ariyo gi nus kande pinygi loka Jordan, to ne ok opogo ni jo-Lawi piny kaka nopogo ni dhoudi mamoko.

⁴ Joka Josef nosepogore dhoudi ariyo, ma Manase gi Efraim. Jo-Lawi ne ok oyudo pok moro e pinyno, mak mana mier mag dak kod lege jamni ma nokiewo gi miego.

⁵ Jo-Lawi nopogo piny kaka Ruoth Nyasaye nosechiko Musa.

Dala mar Hebron omi Kaleb

⁶ Jo-Juda nobiro ir Joshua Gilgal, mi Kaleb wuod Jefune ma ja Keniz nowachone niya, “Bende iparo gima ne Ruoth Nyasaye onyiso Musa jatich Nyasaye kuomi gi kuoma kane wan Kadesh-barnea?

⁷ Ne an jahigni piero ang’wen kane Musa jatich Nyasaye oora mondo abi anon pinyni, kendo kane adok, naterone wach ma adieri.

⁸ Jomoko mane wabirogo nonyoso chuny ji, to an ne aluwo dwaro mar Ruoth Nyasaye ma Nyasacha gi chuny modimbore.

⁹ Chiengno Musa nosingore ka wachona niya, ‘Piny ma isenyono gi tiendi nobed mari kod yawuoti nyaka chieng’, nimar iseluwo dwaro mar Ruoth Nyasaye ma Nyasacha gi chuny modimbore.’

¹⁰ Koro en higni piero ang’wen gabich nyaka ne Ruoth Nyasaye singre ni Musa e wachno e ndalo mane jo-Israel pod wuotho e thim. To Ruoth Nyasaye oserito ngimana kaka nosingore mi koro an jahigni piero aboro gabich.

¹¹ To pod atek mana kaka ne atek e kinde mane Musa oora, kendo pod anyalo kedo, kata timo gimoro amora monego atim.

¹² Omiyo koro miya piny gode mane Ruoth Nyasaye osingorena e kinde cha. Chieng’ cha donge niwinjo ni jo-Anak odak kuno, kendo ni gin gi mier madongo kendo mochiel matek mar siro wasigu? To dipo ka Ruoth Nyasaye okonya, mi ariembogi kaka nosesingorena.”

¹³ Joshua noguedho Kaleb, momiye dala mar Hebron,

¹⁴ kendo pod en mar Kaleb wuod Jefune maja-Keniz, nikech noluwo dwaro mar Ruoth Nyasaye ma Nyasach Israel gi chuny modimbore.

¹⁵ Koro piny nobedo mokue. E ndalo machon niluongo Hebron ni Kiriath-arba, tiende ni, dala Arba. Arbano ne jaduong’ jo-Anak.