Joshua 10 - MUMA MALER 2015

Jo-Israel oloyo jo-Amor

¹ Adoni-zedek ruodh Jerusalem nowinjo ni Joshua okawo Ai, moketho chuth, kendo osetimo ni Ai gi ruodhe mana kaka notimo ni Jeriko gi ruodhe. Nowinjo bende ni jo-Gibeon osetimo winjruok mar kue gi jo-Israel, kendo odak kodgi.

² Kuom mano, jo-Jerusalem nobwok ahinya, nimar Gibeon ne en kama duong’ machalo dala ruoth. Noduong’ moloyo Ai, kendo joge ne gin jolweny marateke.

³ Omiyo Adoni-zedek ruodh Jerusalem nooro wach ni Hoham ruodh Hebron, gi Piram ruodh Jarmuth, gi Jafia ruodh Lakish, kod Debir wuod Eglon, kowachonogi niya,

⁴ “Biuru ukonya monjo jo-Gibeon, nikech gisetimo winjruok mar kue gi Joshua kod jo-Israel.”

⁵ Kamano ruodhi mag Jerusalem gi Hebron gi Jarmuth gi Lakish kod Eglon, ma gin ruodhi abich mag jo-Amor, noriwo jolwenjgi kaachiel, mi gimonjo Gibeon.

⁶ To jo-Gibeon nooro wach ni Joshua e kambi Gilgal ka giwachone niya, “Bi ikonywa, kik iwewa, nikech ruodhi mag jo-Amor modak e piny gode oseriwore mondo onywaknwa. Omiyo bi mondo ireswa.”

⁷ Kamano Joshua nodhi gi thuondi duto, kod joge duto mag lweny.

⁸ Ruoth Nyasaye nowachone niya, “Kik iluorgi, nikech asechiwogi e lweti, kendo onge kata ng’at achiel ma nosiri.”

⁹ Eka Joshua noa Gilgal, mowuotho otieno duto nyaka Gibeon. Nomonjo jo-Amor apoya,

¹⁰ kendo Ruoth Nyasaye notaro wang’gi mokeyogi e nyim jo-Israel, mi nologi chuth. Jo-Israel nolawogi e yo maridore Beth-horon, mi ne ginegogi nyaka Azeka gi Makeda.

¹¹ E kinde mane jo-Israel riembogi e yo maridoreno, Ruoth Nyasaye nodiro kuomgi pe madongodongo, monegogi nyaka Azeka. Peno nonego ji mang’eny moloyo mane jo-Israel onego.

¹² Chieng’ mane Ruoth Nyasaye ochiwoe jo-Amor e lwet jo-Israel, Joshua nowuoyo gi Ruoth Nyasaye, kowacho e nyim jo-Israel duto kama: “A wang’chieng,’ chung’ achung’a ewi Gibeon. To in due, mondo ichung’ ewi holo Aijalon.”

¹³ Kamano wang’chieng’ nochung’ kendo due bende ne ok osudo nyaka jo-Israel notieko chulo kuor kuom wasikgi. Wachno ondik e Kitap Jashar. Wang’chieng’ nosiko mana e kor polo. Ne ok oruyo podho nyaka kane osebet kanyo odiechieng’ ngima.

¹⁴ Pok osebedoe odiechieng’ machal kamano, ma Ruoth Nyasaye owinjoe dwond dhano, nimar chieng’no Ruoth Nyasaye nokedo ni jo-Israel.

¹⁵ Bang’e Joshua kod jo-Israel duto nodok e kambi Gilgal.

¹⁶ Ruodhi abichgo noringo mopondo e rogo man Makeda,

¹⁷ to noyudgi, monyis Joshua ni gipondo kanyo.

¹⁸ Eka Joshua nowacho niya, “Ng’ieluru kite madongo olorgo dho rogono, kendo uket ji orite.

¹⁹ To kik udek kuno, to meduru mana lawo wasiku, kendo kik uwe gichop e miechgi mak unegogi, nimar Ruoth Nyasaye ma Nyasachu osechiwogi e lwetu.”

²⁰ Joshua kod jo-Israel nonego jo-Amor motieko, mak mana ji manok ma nodonjo e mier mochiel gi ohinga ema notony.

²¹ Eka jolweny duto nodwogo ir Joshua Makeda kangima. Onge ng’ama notemo timo gimoro marach ni jo-Israel.

²² Koro Joshua nowacho ni mondo oel dho rogo, kendo okelne ruodhi abichgo.

²³ Mi ne gitimo kamano. Ne gin ruodhi mag Jerusalem gi Hebron gi Jarmuth gi Lakish kod Eglon.

²⁴ Kane gisekelogi ire, Joshua noluongo jo-Israel duto, mowacho ni jotend jolweny ma nodhi kode niya, “Suduru ka, mondo unyon ng’ut ruodhigi.” Mi ne gitimo kamano.

²⁵ Eka Joshua nowacho ni jotelogo niya, “Kik uluor kata kik chunyu nyosre. Beduru gi chir kendo gi jing’o, nimar mano e kaka Ruoth Nyasaye notim ni wasigu duto mubiro kedogo.”

²⁶ Bang’e Joshua nonego ruodhigo, kendo nolierogi e yien abich, mi ne giriyoe nyaka odhiambo.

²⁷ Kane chieng’ podho, Joshua nogolo chik, mi ong’adgi oko, kendo nowitgi e rogo mane gisepondoeno. Eka nolor dho rogo gi kite madongo, ma pod ni kanyo nyaka chil kawuono.

²⁸ Chieng’no, Joshua nokawo Makeda, monego ruodhe gi joge. Notiekogi duto, kaachiel gi gimoro amora mangima mane ni kuno. Ne ok oweyo ng’ato ka ngima kata achiel, kendo notimo ni ruodh Makeda mana kaka nosetimo ni ruodh Jeriko.

²⁹ Bang’ mano Joshua gi jo-Israel duto noa Makeda modhi Libna. Ne gimonjo dalano,

³⁰ mi Ruoth Nyasaye nochiwe gi ruodhe e lwetgi, kendo ne ginego joma odakie duto, kod gimoro amora mangima mane ni kuno. Ne ok giweyo kata ng’at achiel kangima, kendo ne gitimo ni ruodh dalano mana kaka ne gitimo ni ruodh Jeriko.

³¹ Kane Joshua kod jo-Israel duto oa kanyo, ne gidhi mi gilworo Lakish. Ne gimonje,

³² kendo Ruoth Nyasaye nochiwe e lwetgi. Ne gikawe bang’ ndalo ariyo, mi ne ginego gimoro amora mangima mane ni kuno, kaka ne gisetimo Libna.

³³ E kindeno, Horam ruodh Gezer nobiro mondo ores Lakish, to Joshua nonege kaachiel gi joge, ma onge ng’ama otony.

³⁴ Joshua kod jo-Israel duto noa Lakish modhi Eglon. Ne gilwore kendo gimonje,

³⁵ mi gikawe mana odiechieng’no. Ne ginego ji duto modakie, kod gimoro amora mangima mane ni kuno, mana kaka ne gitimo Lakish.

³⁶ Kane gia Eglon, Joshua kod jo-Israel duto nodhi momonjo Hebron.

³⁷ Ne gikawe, mi ginego ruodhe kod gimoro amora mangima mane ni kuno, kaachiel gi mago mane nie mier matindo mokiewo kode. Joshua noketho dalano chuth, ma ok oweyo kata ng’at achiel kangima, mana kaka ne gitimo Eglon.

³⁸ Bang’e Joshua gi jo-Israel duto nowichore mochomo Debir, mi gimonje.

³⁹ Ne gikawe kaachiel gi ruodhe kod mier matindo mokiewo kode, mi ne ginego ji duto kod gimoro amora mangima mane ni kuno. Ne ok giweyo ng’ato otony kata achiel. Ne gitimo ni Debir gi ruodhe mana kaka ne gitimo ni Hebron kod Libna gi ruodhi maggi.

⁴⁰ Kamano Joshua nokawo pinyno duto. Noloyo ruodhi mag piny gode, kod mag piny milambo, gi mag pewe, kod mag kuonde motimo thidhiya. Nonego ji duto, ma ok oweyo ng’ato otony kata achiel, kotieko gimoro amora ma yueyo, kaka Ruoth Nyasaye ma Nyasach Israel nosechiko.

⁴¹ Nonego jopinjego duto, chakre Kadesh-barnea nyaka Gaza, kokwako piny duto mar jo-Goshen nyaka Gibeon.

⁴² Joshua nomako ruodhigo duto, kaachiel gi pinjegi e lweny achielno, nimar Ruoth Nyasaye ma Nyasach Israel nokedo ni joge.

⁴³ Bang’e Joshua gi jo-Israel duto nodok e kambi Gilgal.