Jong’ad Bura 7 - MUMA MALER 2015

Jo-Gideon oloyo jo-Midian

¹ Gideon ma bende iluongo ni Jerubaal, kod ji duto mane ni kode, nochiew gokinyi mang’ich modhi ojot but soko man Herod. Kambi jo-Midian to ne nie holo man yo nyandwat mar got More.

² Ruoth Nyasaye nowacho ni Gideon niya, “In gi ji mang’eny ahinya, omiyo ok anyal keto jo-Midian e lwetgi, nimar dipo ka jo-Israel opakore ni gilocho mana gi tekogi giwegi.

³ Koro dhiyo mondo iland ni ji wach niya, ‘Ng’ato ang’ata ma luoro kata kibaji omako, mondo oa e got Galud piyopiyo odog dala.’ ” Gideon notimo kamano, mi ji alufu piero ariyo gariyo noduogo, to alufu apar nodong’.

⁴ Eka Ruoth Nyasaye nowacho ni Gideon kendo niya, “Ji pod ng’eny ahinya, omiyo tergi mwalo e dho pi, mondo abi kuno ayiernigi. Ka awacho ni ni, ‘Jali nyaka dhi kodi,’ to ng’atno nodhi kodi. To ka awachoni ni, ‘Jali ok dhi kodi,’ to ng’atno ok nodhi.”

⁵ Kamano Gideon notero ji mwalo nyaka e dho pi, mi Ruoth Nyasaye nowachone niya, “Jogo duto ma gado pi gi lewgi kaka guok gado, ket yorgi, to mago ma goyo chonggi piny, eka modho, ket komachielo.”

⁶ Kar romb joma nogado pi gi lwetgi ne mia adek, to ji mamoko duto nogoyo chonggi piny ka modho.

⁷ Bang’ mano Ruoth Nyasaye nowacho ni Gideon niya, “Abiro resou gi lwet ji mia adek mogado pigo, kendo abiro chiwo jo-Midian e lwetu, to joma odong’ duto mondo odog dala.”

⁸ Kuom mano, Gideon nokawo agulni kod tunge kuom jo-Israel mamoko duto, mi noweyo gidok dala, to nodong’ mana ji mia adek kende. Kambi jo-Midian to ne ni e holo gi mwalo.

⁹ Otieno nogo Ruoth Nyasaye nowacho ni Gideon niya, “Chung’ idhi imonj kambi jo Midian, nikech aseketogi e lweti.

¹⁰ Kiluoro timo kamano, to ara dhiuru mokwongo gi Pura jatichni e kambigi,

¹¹ mondo iwinj gima giwacho. Wach ma iwinjo ka giwachono biro miyi chir mar dhi monjo kambino.” Omiyo ne gilor gi Pura jatichne, mi gidhi e kambi kuma ne jolweny mag jo-Midian nindoe.

¹² Jo-Midian gi jo-Amalek kod jo yo wuokchieng’ duto mane nindo e holo ne ng’eny ka bonyo, kendo ngamia mane gin go nokadho akwana mana ka kuoyo manie dho nam.

¹³ Kane Gideon ochopo, nowinjo ka ng’at moro poro ni wadgi lek niya, “Nende aleko ni makati moro motwo obiro ka ng’ielore e kambi jo-Midian. Nochopo e hema moro, motuomo, mi hemano opodho ataro.”

¹⁴ Eka wadgi nodwoke niya, “Nyaka bed ni mano en mana ligangla Gideon wuod Joash ma ja-Israel. Kara, Nyasaye osechiwo jo-Midian kod ogandagi mar lweny duto e lwete.”

¹⁵ Kane Gideon owinjo lekno, kaachiel gi ngeche, nogoyo chonge piny, molemo, eka nodok e kambi jo-Israel mowacho niya, “Wuoguru, nikech Ruoth Nyasaye oseketo jolweny mag Midian e lwetu.”

¹⁶ Nopogo joge mia adek e migepe adek, momiyo ng’ato ka ng’ato tung’ kod agulu moting’o meny e iye.

¹⁷ Eka nowachonigi niya, “Kwachopo e bath kambi, to ng’iyauru mondo utim mana gima atimo.

¹⁸ Ka agoyo tung’ kaachiel gi jogo duto ma wan go, eka un joma oselworo kambi, bende ugo tungeu, kukok niya, ‘Wakedo ni Ruoth Nyasaye, kendo ni Gideon!’ ”

¹⁹ Gideon gi joge mia achiel nochopo e bath kambi kar sa ang’wen mar otieno, mana ka jorit manyien chako tich. Ne gigoyo tung’ kendo ne ginego agulini mane giting’o.

²⁰ Eka migepe adekgo duto nogoyo tung’ kendo onego agulni. Ne giting’o meny e lwetgi ma koracham, to tunge ne giting’o e lwetgi ma korachwich, ka gikok niya, “Ligangla mar Ruoth Nyasaye, gi mar Gideon!”

²¹ Ne gilworo kambi ka ng’ato ka ng’ato ochung’ kare. To jo-Midian nochiew ka kihondko omako, moringo ka ywak.

²² Ji mia adekgo nomedo goyo tungegi, mi Ruoth Nyasaye nomiyo ji duto mane ni e kambi ochako kedo kendgi giwegi. Ne giringo nyaka Beth-shita e yo mochomo Zerera, mi gichopo e tong’ Abel-mehola man but Tabath.

²³ Jo-Israel ma jo-Naftali gi jo-Asher kod jo-Manase duto noluong, moriembo jo-Midian.

²⁴ Bende Gideon nooro joote e piny gode duto mag Efraim, mowacho ni jo kuno niya, “Loruru mondo uked gi jo-Midian. Geng’nigiuru kuonde duto minyalo ng’adogo aora Jordan nyaka Beth-bara.” Mi jo-Efraim noyworo ni lweny, kendo ne girito kuonde ming’adogo aora Jordan nyaka Beth-bara.

²⁵ Ne gimako Oreb gi Zeeb, ruodhi ariyo mag jo-Midian. Oreb ne ginego e lwanda mar Oreb. Zeeb to ne ginego e kar biyo mzabibu mar Zeeb. Ne gidhi nyime gi lawo jo-Midian eka bang’e ne ging’ado aora Jordan, mi gikelo ni Gideon wi Oreb gi wi Zeeb.