Jong’ad Bura 5 - MUMA MALER 2015

Wend Debora gi Barak

¹ Chieng’no Debora gi Barak wuod Abinaom nower niya,

² “Pakuru Ruoth Nyasaye, nikech jo-Israel duto gi jotendgi nochiwore ni lweny.

³ Winjuru, un ruodhi! Chikuru itu, un jotelo! Abiro goyo thum, kawer ni Ruoth Nyasaye ma Nyasach Israel.

⁴ Kane Ruoth Nyasaye owuok oa Seir e piny Edom, piny noyiengni, kendo polo notetni, mi boche polo noton piny mang’eny.

⁵ Gode noyiengni e nyim Ruoth Nyasaye mar Sinai, ma Nyasach Israel.

⁶ E ndalo Shamgar wuod Anath, kendo e ndalo Jael, joohala ne ok nyal dhi e wuoth, to jowuoth ne luwo mana yore mogondore ogondore.

⁷ Miech Israel nodong’ nono, nyaka nabiro an Debora. Nabiro mabedo ka min ji e Israel.

⁸ Ne giyiero nyiseche manyien. Ne gilamo mana jochiende. Kuot kata tong’ ne ok nyal yudi kuom jo-Israel alufu piero ang’wen.

⁹ Un jotend Israel, beduru gi sunga! Un jo-Isarel mane ochiwore ni lweny, denduru Ruoth Nyasaye.

¹⁰ Un joidh kenje marachere, kod un joma obet e lewni mabeyo mopedhi, kata un joma wuotho awuotha gi tielo, paruru ane gik mosetimoregi.

¹¹ Winjuru dwond jower magoyo thum, kuonde ma mon umboe. Gipako Ruoth Nyasaye kuom lochne, nikech obedo kaka thwon jo-Israel. Jo-Ruoth Nyasaye nolor, kowuok e miechgi.

¹² Chiew! Chiew, in Debora! Chiew! Chiew, ichak wer. A malo Barak! Wuod Abinoam, imak ji mang’eny!

¹³ Eka jolweny nolor gi jotendgi. Jo-Ruoth Nyasaye nolor ire, ka giikore ni lweny.

¹⁴ Jo-Efraim nobiro, moriedo ni lweny gi chir, ka giwacho niya, ‘Wan kodu, un jo-Benjamin! Oweteu ni ka!’ Jotend jolweny nobiro koa Makir, kaachiel gi jo-Zebulun ma nomako ludh jodong lweny.

¹⁵ Jodong Isakar ne ni kod Debora e lweny. Ee, jo-Isakar noluwo Barak. Giduto ne giluwe, mi gimwomore nyaka e holo. To jo-Reuben ne onge winjruok e kindgi giwegi, ka giparo gima onego gitim.

¹⁶ Ang’o momiyo ne udigni, mudong’ e kund rombe, kuwinjo mana jokwath kaluongo rombegi?

¹⁷ Jo-Gilead bende nodong’ loka Jordan. To ang’o momiyo jo-Dan nodong’ kuma yiedhi gowoe? Jo-Asher nobet e dhonam, kuma aore wuokie.

¹⁸ To jo-Zebulun nochiwo ngimagi nyaka kar tho. Jo-Naftali bende nochiwore kamano e paw lweny mane nie got.

¹⁹ Ruodhi nobiro mokedo Taanak, but aora mar Megido. Ee, ruodhi mag Kanaan nokedo, to ne ok giyako fedha.

²⁰ Sulue manie polo bende nokedo gi Sisera.

²¹ Aora Kishon maringo matek noyuoyo jo-Sisera! Adier, aora Kishon nogeng’onigi. Yaye chunya, tim teko!

²² Tiend faresegi ne goyo koko ka ringo.

²³ Malaika mar Ruoth Nyasaye owacho ni, ‘Kuong’uru Meroz kod joma odakie gi kuong’ malit, nikech ne ok gibiro mondo gikony Ruoth Nyasaye. Ne ok gikonyo Ruoth Nyasaye kata joge mag lweny.’

²⁴ Oguedh Jael chi Heber ja-Keni, moloyo mon duto modak e hema.

²⁵ Sisera nokwayo pi, to nomiye chak. Nokelone cha adila e tawo maber ka tap ruoth.

²⁶ Nomako lo hema gi lwete achiel, to tuor omako gi lwete machielo. Nogoyo Sisera gi tuor, motoyo wiye. Notoyo wiye, mi obwongone othichore e lowo.

²⁷ Noruombore piny, mopodho e tiende koriere kanyo. Kama noruomboreeno ema noriere, mothoe.

²⁸ Min Sisera nong’icho gie dirisa, kapenjo niya, ‘Ang’o momiyo gechene mag lweny odeko, mak obiro? Ang’o momiyo pod ok wawinjo tiend faresene kagiro?’

²⁹ Mon mariek nodwoke, to en bende nodwokore kende niya,

³⁰ ‘Nyaka bed ni giyeko, kendo gipogo mwandu ma giseyudo. Ng’ato ka ng’ato yudo nyako achiel kata ariyo, kendo omi Sisera gik mope ma kitgi yoreyore, kod nanga mokwo maber, mondo orwak e ng’ute.’

³¹ “A Ruoth Nyasaye, wasiki duto mondo olal nono kamano, to ji duto moheri mondo orieny ka wang’chieng’ ma wuok gi tekone duto.” Bang’e piny Israel nobedo gi kue kuom higni piero ang’wen.