Jong’ad Bura 17 - MUMA MALER 2015

Mika olamo nyiseche manono

¹ Ne nitie ng’at moro ma nyinge Mika, ma nodak e piny gode mag Efraim.

² Nowacho ni min mare niya, “Donge iparo pesani alufu achiel gi mia achiel mane okwal, kendo kaka niluongo jakuogno ka awinjo? An gi fedhago. An ema nakwalogi, to koro adwokonigi.” Min mare nowachone niya, “Nyasaye mondo oguedhi, wuoda!”

³ Mi nodwoko ni min mare fedhago. To min mare nowachone niya, “Koro wuoda, akuong’ora ni abiro chiwo fedhagi ni Ruoth Nyasaye, mondo olosgo kido mar nyasaye mar bao, mobaw gi fedha. Kamano kuong’ ok nomaki.”

⁴ Omiyo kane Mika odwoko fedhago ni min mare, min mare nokawo fedha mia ariyo kuomgi, momiyo jatheth molosonego kido mar bao, mobaw gi fedha. Kido nogo noketi e od Mika.

⁵ To Mikano ne nigi kare owuon mar lemo. Noloso kido moko manono molosonigi pasia, kendo noketo wuode moro mobedo jadolone.

⁶ E kindego piny Israel ne onge gi ruoth, omiyo ng’ato ka ng’ato ne timo mana gima ohero.

⁷ Ne nitie wuowi moro ma ja-Bethlehem-Juda, ma nyinge Ben-gershom. Ne en ja-Lawi ma ja-dhood Juda.

⁸ Noa Bethlehem mondo odhi odwar kar dak, to kane owuotho, nopo kochopo e dala Mika e piny gode mag Efraim.

⁹ Mika nopenje ni, “Ia kanye?” Nodwoke niya, “An ja-Lawi moa Bethlehem-Juda, to adwaro kar dak.”

¹⁰ Mika nowachone niya, “Dag koda, mondo ibed jang’adna rieko kendo jadolona, to abiro miyi fedha apar higa ka higa, kaachiel gi chiemo kod lewni.”

¹¹ Ja-Lawino noyie dak gi Mika, mi nobedo kaka wuode.

¹² Mika nokete jadolone, mi nodak kode e dalane.

¹³ Bang’e Mika nowacho niya, “Koro ang’eyo ni Ruoth Nyasaye biro guedha, nimar aseyudo jadolo ma ja-Lawi.”