Jong’ad Bura 14 - MUMA MALER 2015

Wach Samson gi nyar Timna

¹ Samson nolor odhi Timna, mi noneno nyar Filistia moro kuno.

² Ka nodok dala nonyiso wuon gi min niya, “Aseneno nyar Filistia moro Timna. Nyuomnagouru.”

³ To jonywolne nodwoke niya, “Ang’o momiyo idwaro kendo nyar jo-Filistia ma ok oter nyangugi? Donge nitie nyako moro kuom nyi oweteni, kata kuom jowa?” To Samson nowacho ni wuon mare ni, “Nywomnago, nikech ahere.”

⁴ Jonywolne ne ok ong’eyo ni Ruoth Nyasaye ema ne dwaro ni mondo gima kama otimre mondo oyudgo yo mokelogo ni jo-Filistia masira. E ndalogo jo-Israel ne ni e bwo loch jo-Filistia.

⁵ Chieng’ moro Samson ne lor dhi Timna gi jonywolne, to ka nochopo e puoth mzabibu man kanyo, nopo ka nyathi sibuor ochome ka ruto.

⁶ To much Ruoth Nyasaye nolor kuom Samson ka diemo wang’ mi noyiecho sibuor gi lwete, mokidho matindotindo, mana ka ng’ama yiecho nyadiel, nikech ne en gi lwete nono. To ne ok onyiso jonywolne gima nosetimono.

⁷ Bang’e nodhi mowuoyo gi nyakono, kendo noyudo ni ohere.

⁸ Eka bang’ ndalo moko Samson nodok mondo okende. Kane enie yo odhi kuno, nobaro mondo one sibuor mane oyudo osenego cha, mi nopo konwang’o kich mochiek, kopoto kuom sibuorno.

⁹ Nowuodho pet kich motimo mo, mochamo e lwete kodhi. Nodhi momiyo jonywolne bende ochamo, to ne ok onyisogi ni ogole kuom sibuor motho.

¹⁰ Wuon Samson nodhi dalagi nyako mane Samson dwaro kendono, mi Samson noloso nyasi kuno, kaka tim yawuowi nobet e ndalogo.

¹¹ Kane jo-Filistia onene, ne gikelo yawuowi piero adek mondo obudh kode.

¹² Samson nowachonigi niya, “We agonue ngero moro. Ka unyalo hulo tiende ka pok ndalo abiriyo mag nyasi orumo, to namiu kandhe piero adek, gi nengni mabeyo bende piero adek.

¹³ To ka otamou, to nyaka umiya gigo.” Ne gidwoke niya, “Gonwa ngerono, mondo wawinji.”

¹⁴ Mi nowachonigi niya, “Gima ichamo nowuok kuom jacham ji. Gima mit nowuok kuom ratego.”

¹⁵ Ndalo adek nokadho ka pok gihulo tiend ngerono. Chieng’ mar ang’wen ne giwacho ni chi Samson niya, “Ho chwori mondo onyisi tiend ngerono, nono to wabiro wang’i e od wuoru! Ne uluongowa ka mana ni mondo uyakwa koso?”

¹⁶ Omiyo chi Samson nodhi ir chwore, kaywak, mowachone niya, “Kara ichaya, ok ihera! Inyalo goyo ni jowa ngero, to an to pok inyisa tiende?” Samson nodwoke niya, “Wachno pok anyiso wuora kata mama. In to danyisi wachno nadi?”

¹⁷ To nosiko koywakne kuom wachno pilepile nyaka ndalo mag nyasi orumo. To chieng’ mar abiriyo mar nyasi, Samson nonyise tiend ngerono, nikech nojoge gi dudo kuom wachno. Bang’e nyakono nodhi monyiso jogi.

¹⁸ Omiyo chieng’ mar abiriyono, kane Samson dwaro dhi nindo, jodala gi nyako nowachone niya, “En ang’o ma dibed mamit moloyo mor kich? Koso ang’o ma dibed ratego moloyo sibuor?” To Samson nodwokogi niya, “Ka dinende ok upuro gi nyarocha, to da ok ufwenyo tiend ngero magoyonu.”

¹⁹ Eka Much Ruoth Nyasaye nolor kuom Samson gi teko, mi nodhi Ashkelon. Nonego ji piero adek kuno, mogonyo lepgi. Eka nokelo lewnigo momiyo joma ne ohulo tiend ngerono. Bang’e nodok dala, kokecho ahinya.

²⁰ To chi Samson nomi osiep Samson, mane ochung’ne kokendo.