Jong’ad Bura 13 - MUMA MALER 2015

Nywol Samson

¹ Timbe jo-Israel nochako odoko maricho e nyim Nyasaye, omiyo noketogi e lwet jo-Filistia kuom higni piero ang’wen.

² Ne nitie ja-Dan ma nyinge Manoa, ma nodak Zora. Chiege ne migumba ma onge nyathi.

³ Chieng’ moro malaika mar Nyasaye nofwenyore ni chiegeno, mowachone niya, “In dhako ma migumba ma onge nyathi, to ibiro mako ich, mi inywol nyathi ma wuowi.

⁴ Omiyo koro kik imadh divai kata gimoro ma mero ji, kata kik icham chiemo makuero,

⁵ nikech ibiro mako ich, kendo nywolo nyathi ma wuowi. Mirich kik ka wiye, nikech chakre chieng’ monywole, nobed ja-Nazir, ng’at mowal ni Nyasaye. En ema nokwong kedo gi jo-Filistia mondo ores jo-Israel e lwetgi.”

⁶ Dhakono nodhi mowacho ni chwore niya, “Ng’at Nyasaye nende obiro ira, to kite ne lich ahinya, machalo mana gi kit malaika mar Nyasaye. Ne ok apenje kuma oaye, to bende ne ok ohulona nyinge.

⁷ Nowachona ni abiro mako ich, kendo nywolo nyathi ma wuowi, omiyo koro kik amadh divai, kata gimoro mamero ji, kata kik acham chiemo makuero, nikech nyathino biro bedo ja-Nazir, ng’at mowal ni Nyasaye, chakre chieng’ nywolne nyaka chieng’ thone.”

⁸ Bang’ winjo wechego, Manoa nokwayo Ruoth Nyasaye niya, “A Ruoth Nyasaye, yie mondo ng’at Nyasaye mane ioro cha odwog irwa, kendo onyiswa gima onego watim gi nyathi ma wabiro nywolono.”

⁹ Nyasaye notimo gima ne Manoa okwaye, mi malaikane nodwogo e puodho, kuma noyudo dhakono nitie. To Manoa chwore ne ok ni kode kuno.

¹⁰ Omiyo dhakono noringo piyo modhi onyiso chwore niya, “Ng’at ma nyocha obiro ira cha, oseduogo ira kendo.”

¹¹ Manoa noa malo, moluwo chiege, mi nodhi openjo ng’atno niya, “In e jal ma nende owuoyo gi chiega koso?” Ng’atno nodwoke niya, “Ee an.”

¹² Eka Manoa nowachone niya, “Nyathino nobed nyathi machal nadi, ka weche miwachogo otimore? Wanarite nadi, kendo notim ang’o?”

¹³ To malaika mar Nyasaye nodwoko Manoa niya, “Chiegi nyaka ritre kuom gik moko duto ma asenyise.

¹⁴ Kik omadh divai kata gimoro amora mamero ji, kata mana chamo chiemo makuero kik ocham. Duto mane asenyise, ema mondo otim.”

¹⁵ Manoa nowacho ni malaika mar Nyasaye niya, “Yie mondo ibed wendowa mondo walosni nyadiel moro, icham.”

¹⁶ To malaika mar Nyasaye nodwoke niya, “Kata ugeng’a mondo abedi, to ok abi chamo chiembu. To unyalo lose mondo uchiwe ni Ruoth Nyasaye ka misango miwang’o pep.” Manoa ne pok ofwenyo ni ng’atno en malaika mar Ruoth Nyasaye,

¹⁷ Omiyo nowachone niya, “Hulnwa nyingi, mondo wabi wamiyi duong’ ka gima isewachono otimore.”

¹⁸ To malaika nopenje ni, “Marang’o idwaro ng’eyo nyinga, to en nying modhiero ji ng’eyo?”

¹⁹ Omiyo Manoa nokawo nyadiel kod mogo, mi notimogo misango ewi lwanda ni Ruoth Nyasaye ma timbene odhiero ji ng’eyo.

²⁰ Kane ligek mach bebni e kendo-mar-misango, kochiko polo, Manoa gi chiege noneno malaika mar Ruoth Nyasaye ka dum dhi e polo ei ligek majno. Omiyo ne gipodho piny auma.

²¹ Malaika mar Nyasaye ne ok ochako ofwenyore ni Manoa gi chiege kendo. To koro Manoa nofwenyo ni ng’atno ne malaika mar Ruoth Nyasaye,

²² omiyo nowacho ni chiege niya, “Wabiro tho, nikech waseneno Nyasaye.”

²³ To chiege nodwoke niya, “Ka da ni Ruoth Nyasaye dwaro negowa, to da ok oyie misangowa, kendo da ok onyisowa gigi duto, kata wachonwa gik mosewachonwagi.”

²⁴ Bang’e dhakono nonywolo nyathi ma wuowi, mochako ni Samson. Nyathino nodongo Mahane-dan, manie kind Zora gi Eshtaol. Ruoth Nyasaye noguedhe,

²⁵ kendo Roho mar Ruoth Nyasaye nochako tiyo kode.