Jong’ad Bura 12 - MUMA MALER 2015

Jeftha okedo gi jo-Efraim

¹ Jo-Efraim nochoko jogi mag lweny, mi ging’ado aora Jordan nyaka Zafon. Ne giwacho ni Jeftha niya, “Ere gima omiyo ne idhi kedo gi jo-Amon, to ok iluongowa mondo wadhi kodi? Wabiro wang’i gi mach e odi!”

² To Jeftha nodwokogi niya, “Wasebedo ka wakedo lweny mager gi jo-Amon. Ne waluongou, to ne utamoru biro resowa e lwetgi.

³ Kane aneno ni ok ubi resowa,

⁴ nawito ngimana madhi loka kedo kodgi, mi Ruoth Nyasaye nochiwogi e lweta. Koro ang’o momiyo ubiro mondo uked koda kawuono?”

⁵ Bang’e Jeftha nochoko jo-Gilead duto kanyakla, mi gikedo gi jo-Efraim kendo giloyogi.

⁶ Bang’ loyogi kamano, jo-Gilead nomako kuonde miyorogo aora Jordan, mondo jo-Efraim kik ng’adi. Noyudo ka nitie wach moro miluongo ni Shiboleth, ma jo-Efraim ok nyal hulo adimba. Omiyo kane ja-Efraim moro pondo, mi okwayo thuolo ka dokadhi, to jo-Gilead nopenje ka en ja-Efraim. Kane okwer, to ne gikone mondo owachi ni “Shiboleth.” To kane owacho ni, “Siboleth,” to gimake kendo ginege mana kanyono. E kindeno jo-Efraim alufu piero ang’wen gariyo notho.

⁷ Jeftha nobedo jatelo e Israel kuom higni auchiel. Bang’e notho, moyike e dalane Gilead.

Ibzan gi Elon kod Abdon jobedo jotelo e Israel

⁸ Bang’ Jeftha, Ibzan ja-Bethlehem nodoko jatelo e Israel.

⁹ Ne en gi yawuowi piero adek, gi nyiri bende piero adek. Nyigego nodhi tedo, to yawuote bende nokendonigi nyiri piero adek. Ibzan nobedo jatelo e Israel kuom higni abiriyo.

¹⁰ Bang’e notho, moyike Bethlehem.

¹¹ Bang’ Ibzan, Elon ja-Zebulun nodoko jatelo e Israel kuom higni apar.

¹² Bang’e notho, moyike Aijalon e piny Zebulun.

¹³ Bang’ Elon, Abdon wuod Hilel ja-Pirathon nodoko jatelo e Israel.

¹⁴ Ne en gi yawuowi piero ang’wen kod nyikwayo ma yawuowi piero adek ma moro ka moro kuom yawuote gi nyikwayego ne nigi kanje moidho. Abdon nobedo jatelo e Israel kuom higni aboro.

¹⁵ Bang’e notho, moyike Pirathon man Efraim, e piny gode mag jo-Amalek.