Jong’ad Bura 11 - MUMA MALER 2015

Jeftha oreso jo-Israel kuom jo-Amon

¹ Jeftha ja-Gilead ne jalweny mager. Ne en wuod Gilead, mane onywolo gi nyako ma jachode.

² To Gilead ne nigi chiege hie, ma nonywolone yawuowi mogwarore, kendo kane yawuotego osedoko madongo ne giriembo Jeftha, ka giwachone niya, “In ok inyal chamo gikeni mag wuonwa, nikech ok in owadwa ma hie.”

³ Mi Jeftha noringo oa kuom owetene, modhi odak e piny Tob. Kuno noyudoe jomoko ma acheje mi obedo jatendgi.

⁴ Bang’ ndalo moko, jo-Amon nobiro momonjo jo-Israel.

⁵ To kane lweny omuoch, jodong Gilead nodhi omo Jeftha e piny Tob.

⁶ Ne giwachone niya, “Bi ibednwa jatend lweny mondo waked gi jo-Amon.”

⁷ To Jeftha nodwokogi niya, “Donge ne uchaya, mi uriemba e dala wuora? Koro ang’o momiyo ubiro ira ka un e thagruok?”

⁸ To ne giwachone niya “Wabiro iri ni mondo wadog kodi waked gi jo-Amon, kendo mondo ibed ruodh joma odak Gilead duto.”

⁹ To Jeftha nowachonigi niya, “Kudwoka dala, mi akedo gi jo-Amon, mi Ruoth Nyasaye ochiwogi e lweta, to ng’euru ni nyaka abed ruodhu.”

¹⁰ Jodong Gilead nodwoke niya, “Wakuong’re gi nying Ruoth Nyasaye ma janeno e kindwa kodi, ni wanatim mana gima iwacho.”

¹¹ Omiyo Jeftha nodhi Mizpa gi jodong Gileadgo, mi jo-Gilead nokete jatendgi kendo ruodhgi. Eka nonwoyo e nyim Ruoth Nyasaye, mana weche mane osewacho ni jodongo ka.

¹² Bang’e Jeftha nooro joote ir ruodh jo-Amon, kopenje niya, “Ang’o milaro kodwa?”

¹³ To ruodh jo-Amon nodwoko joote Jeftha niya, “Kane jo-Isarel wuok Misri, ne gikawo pinywa chakre aora Arnon nyaka aora Jabok gi aora Jordan, omiyo koro dwoknwauru pinyno gi kue.”

¹⁴ Jeftha nochako ooro joote ir ruodh jo-Amon,

¹⁵ kowachone niya, “Jo-Israel ne ok okawo piny jo-Moab kata piny jo-Amon.

¹⁶ Kane giwuok Misri, ne ging’ado thim nyaka Nam Makwar, mi gichopo Kadesh.

¹⁷ Eka ne gioro joote ir ruodh Edom, ka gikwaye mondo oyie gikadhi e pinye, to notamore mi ne gioro wach ni ruodh Moab bende, to en bende nodagi. Omiyo jo-Israel nobedo abeda Kadesh.

¹⁸ “Bang’e ne gidhi nyime ka ging’ado thim. Ne giluwo yo ma lworo piny Edom gi piny Moab nyaka ne gichopo yo wuok chieng’ mar Moab e bath aora Arnon. Ne gibworo kanyo, to ne ok ging’ado aora nikech en tong’ piny jo-Moab.

¹⁹ Eka jo-Israel nooro joote ir Sihon ruodh Heshbon, mane ruodh jo-Amor, mondo oyie gikadhi e pinye ka gidhi kuma ne gidhi dakie.

²⁰ To Sihon notamogi kadho e pinye. Nochoko joge duto mag lweny mi gijot Jahaz, kendo nochako kedo gi jo-Israel.

²¹ To Ruoth Nyasaye ma Nyasach Israel, noketo Sihon gi joge duto e lwet jo-Israel, mi jo-Israel noloyogi, mokawo piny jo-Amon duto, mi gidak kuno.

²² Kamano ne gikawo piny jo-Amor chakre aora Arnon yo milambo nyaka aora Jabok man yo nyandwat, kendo chakre thim yo wuok chieng’ nyaka aora Jordan yo podho chieng’.

²³ Omiyo ne en mana Ruoth Nyasaye ma Nyasach Israel, ema noriembo jo-Amor mondo oweni joge Israel thuolo.

²⁴ “Donge un udak e piny mane Kemosh nyasachu omayo wegi, momiyou? Kamano e kaka wan bende nyaka wadag adaga e piny mane Ruoth Nyasaye ma Nyasachwa omiyowa.

²⁵ Koso iparo ni iber moloyo Barak wuod Zipor ruodh Moab, mane ok odhaw gi jo-Israel kata omonjogi?

²⁶ Jo-Israel osedak Heshbon gi Aroer gi mier matindo duto mokiewo kodgi, kaachiel gi mier man e bath aora Arnon kuom higni mia adek. En ang’o ma osebedo ka monou kawogi kuom hignigo duto?

²⁷ Wan pok wakethonu, to un koro utimonwa marach kuom kedo kodwa. Ruoth Nyasaye e jang’ad bura, kendo kawuono obiro ng’ado bura e kind jo-Israel gi jo-Amon.”

²⁸ To ruodh jo-Amon ne ok odewo ote mane Jeftha oorone.

²⁹ Much Ruoth Nyasaye nobiro kuom Jeftha, mi nowuotho e Gilead gi Manase, moduogo nyaka Mizpa e Gilead. Koa kanyo nodhi mondo omonj jo-Amon.

³⁰ Nokuong’ore ni Ruoth Nyasaye niya, “Ka inichiw jo-Amon e lweta,

³¹ to ng’at ma nokwong wuok e dala moromo koda, ka aduogo bang’ loyo jo-Amon e lweny, nobed ng’at mowal ni Ruoth Nyasaye, kendo anachiwe ka misango miwang’o pep.”

³² Kamano Jeftha nong’ado aora mondo odhi oked gi jo-Amon, mi Ruoth Nyasaye nochiwogi e lwete.

³³ Nonegogi oyokre, chakre aora Aroer nyaka Minith, kendo nyaka Abel-keramin, mokawo mier piero ariyo. Mano e kaka jo-Israel noloyo jo-Amon.

Nyar Jeftha

³⁴ Kane Jeftha odok dalagi Mizpa, nopo koneno nyare ka ema biro romone, kagoyo thum kendo miel. Mano nene e nyathine kende. Noonge gi wuowi kata nyako machielo.

³⁵ Kane onene, noyiecho lepe, koywak, mowacho niya, “Yaye nyathina! Ichodo chunya! Ang’o momiyo in ema ikelona chandruokni? Asekuong’ora ni Ruoth Nyasaye kendo ok anyal lokora!”

³⁶ Nyare nowachone niya, “Ka isekuong’ori ni Ruoth Nyasaye kamano, to timna atima gima niwacho ni nitim, nikech Ruoth Nyasaye osemiyo ichulo kuor ni jo-Amon ma wasiki.”

³⁷ Eka nomedo wacho ni wuon mare niya, “Yie akwayie gimoro achiel kende. Wena thuolo kuom dueche ariyo mondo adhi aba ewi gode ka aywak nikech abiro tho kapod an nyako ngili mapok ong’eyo chwo.”

³⁸ Noyiene mondo odhi, mi nodhi kaachiel gi osiepene manyiri, moywago nyakone ewi gode kuom dueche ariyo.

³⁹ Bang’ dueche ariyogo, nodwogo ir wuon mare, mi wuon notimone mana kaka nosekuong’ore. Notho nyako ngili ma pok ong’eyo chwo. Mano ema nobedo chakruok mar tim jo-Israel

⁴⁰ ni nyigi nyaka dhi ywago nyar Jeftha ja-Gilead ndalo ang’wen higa ka higa.