Jong’ad Bura 10 - MUMA MALER 2015

Tola gi Jair jobedo jotelo e Israel

¹ Bang’ Abimelek, Tola wuod Pua ma nyakwar Dodo nowuok mondo ores jo-Israel. Ne en ja-Isakar, ma nodak Shamir e piny gode mag Efraim.

² Nobedo jatelo e Israel kuom higni piero ariyo gadek, bang’e notho moike Shamir.

³ Bang’ Tola, Jair ja-Gilead nowuok, mobedo jatelo e Israel kuom higni piero ariyo gariyo.

⁴ Ne en gi yawuowi piero adek mane nigi kenje piero adek ma giidho, bende ne gin gi mier piero adek e piny Gilead ma pod iluongo ni Havoth-jair nyaka chil kawuono. (Havoth-jair, tiende ni, miech Jair)

⁵ Kane Jair notho, noyike Kamon.

Jo-Amon othiro jo-Israel

⁶ Timbe jo-Israel nochako odoko maricho e nyim Ruoth Nyasaye. Ne gitiyo ni nyiseche manono kaka Baal gi Ashtaroth gi nyiseche mag jo-Aram gi mag jo-Sidon gi mag jo-Moab gi mag jo-Amon kod mag jo-Filistia. Ne giweyo Ruoth Nyasaye, mi ok gilame.

⁷ Omiyo Ruoth Nyasaye nokecho kodgi, mochiwogi e lwet jo-Filistia gi jo-Amon.

⁸ Jogo nosando jo-Israel ma nodak loka Jordan e piny jo-Amon man Gilead kuom higni apar gaboro mothirogi.

⁹ Bang’e jo-Amon nong’ado aora Jordan, mondo omonj jo-Juda gi jo-Benjamin kod jo-Efarim, mi jo-Israel nobedo e thagruok malit.

¹⁰ Eka jo-Israel noywak ni Ruoth Nyasaye, ka giywak niya, “A Nyasachwa, waseketho e nyimi, nikech waseweyi, mi walamo mana Baal.”

¹¹ Ruoth Nyasaye nodwokogi niya, “Jo-Misri gi jo-Amor gi jo-Amon gi jo-Filistia

¹² gi jo-Sidon gi jo-Amalek kod jo-Maon nothirou e higni mokadho. To kane uywakna, donge ne aresou e lwetgi?

¹³ To kata kamano, bang’e nuchako uweya, mi udhi lamo nyiseche mamoko. Kuom mano, ok nachak aresu kendo.

¹⁴ Dhiuru mondo uywag ni nyiseche museyierogo mondo oresu kuom thagruok momakou.”

¹⁵ To jo-Israel nowacho ni Ruoth Nyasaye niya, “Wayie ni waseketho. Omiyo timnwa kaka ihero. To wahombi mondo ikonywa kawuono.”

¹⁶ Kuom mano ne giwito nyisechegi manono, mi gilamo Ruoth Nyasaye. Eka Ruoth Nyasaye nokechogi kuom thagruokgi.

¹⁷ Bang’e oganda lweny mar jo-Amon nochokore kanyakla, modhi ojot Gilead. To jo-Israel nochokore kanyakla, mojot Mispa.

¹⁸ Jo-Gilead kod jotendgi nowacho e kindgi giwegi niya, “Ng’at ma nokuong kedo gi jo-Amon ema nobed jatelo mar joma odak Gilead duto.”