Jong’ad Bura 1 - MUMA MALER 2015

Jo-Juda gi jo-Simeon omako Adoni-bezek

¹ Bang’ tho Joshua, jo-Israel nopenjo Ruoth Nyasaye wach niya, “Ere dhoot monego kuong dhi monjo jo-Kanaan?”

² Ruoth Nyasaye nodwokogi ni, “Dhood Juda ema mondo okwongi. Ero, achiwo pinyno e lwetgi.”

³ Juda nowacho ni jo-Simeon ma owetegi niya, “Biuru, wadhi e piny mopognwa, mondo wamonj jo-Kanaan. Eka wan bende wanadhi kodu e piny mopognu, wakonyu kedo.” Kamano jo Simeon nodhi kodgi.

⁴ Jo-Juda nodhi momonjo jo Kanaan kod jo-Perizi modak kuno, kendo Ruoth Nyasaye nochiwogi e lwetgi, mi ne ginego ji alufu apar kuomgi e dala mar Bezek.

⁵ Ne giyudo Adoni-bezek kuno, kendo ne gikedo kode, mi giloyo jo-Kanaan gi jo-Perizi.

⁶ Adoni-bezek noringo, to ne gilawe, mi gimake. Ne ging’ado lith luetene mathwon kod lith tiendene mathwon.

⁷ Eka Adoni-bezek nowacho niya, “Ruodhi piero abiriyo mong’ad lith luetegi mathuondi kod lith tiendegi mathuondi yande kwanyo mana ng’injo mag chiemo e bwo mesana. To koro Nyasaye osetimona mana kaka natimonigi.” Bang’e nokel Adoni-bezek Jerusalem, motho kuno.

Jo-Juda okawo Jerusalem gi Hebron

⁸ Jo-Juda nomonjo Jerusalem, mokawo. Ne ginego joma odakie, mi giwang’o dalano gi mach.

⁹ Bang’ mano jo-Juda nochomo yo milambo, mokedo gi jo-Kanaan mane odak e piny gode, kendo e piny milambo, kendo e piny pewe.

¹⁰ Bende ne gidhi kedo gi jo-Kanaan mane odak Hebron, dala ma chon niluongo ni Kiriath-arba, mi ne giloyo Sheshai gi Ahiman kod Talmai.

Othniel okawo dala mar Debir, momiye Aksa mondo obed chiege

¹¹ Kane gia kanyo ne gidhi kedo gi jo-Debir, dala ma chon niluongo ni Kiriath-sefer.

¹² Kaleb nowacho niya, “Ng’at ma nomonj Kiriath-sefer, mi kaw, ema nami Aksa nyara mondo obed chiege.”

¹³ Othniel wuod Kenaz owadgi Kaleb matin ema nokawo dalano, omiyo Kaleb nomiye Aksa nyare obedo chiege.

¹⁴ Kane Aksa odhi ir chwore, chwore nojiwe mondo okwa wuon mare lowo, mi Aksa noidho kanje modhi ir Kaleb, kendo kane oselor e kanje, Kaleb nopenje gima odwaro.

¹⁵ Nodwoke niya, “Kaka iseketa e piny milambo motwoni, yie imiya sokni.” Kuom mano Kaleb nomiye sokni mamalo gi mamwalo.

Pinje mane jo-Juda gi jo-Benjamin okawo

¹⁶ Nyikwa ja-Keni ma jaduong’ Musa ne jowuok kaachiel gi jo-Juda e Dala mar Othidhe, mi gidhi e thim Juda ma yo milambo mar Arad, kendo ne gidak gi jo-Amalek kuno.

¹⁷ Bang’e jo-Juda ne jodhi gi jo-Simeon ma owetegi, mi gimonjo jo-Kanaan man Zefath, kendo giketho dalano chuth. Omiyo noluong dalano ni Horma (tiende ni, mokethi.)

¹⁸ To jo-Juda ne ok okawo Gaza gi Ashkelon gi Ekron, kata gwengegi.

¹⁹ Ruoth Nyasaye nokonyo jo-Juda, omiyo ne gikawo piny gode, to ne ok ginyal riembo joma nodak e piny pewe, nikech ne gin gi geche lweny mag nyinyo.

²⁰ Hebron nopog ni Kaleb, kaka Musa nosechiko, kendo Kaleb noriembo yawuot Anak adek ma noyudo kuno.

²¹ To jo-Benjamin ne ok oriembo jo-Jebus modak Jerusalem, omiyo jo-Jebus osebet kodak kodgi kuno nyaka chil kawuono.

Joka Josef okawo Bethel

²² Joka Josef nodhi momonjo Bethel, dala ma chon niluongo ni Luz, kendo Ruoth Nyasaye ne ni kodgi.

²³ Ne gioro jombetre kuno,

²⁴ mi jombetrego noneno ng’ato kawuok e dalano, mi giwachone niya, “Kinyisowa yo ma wanyalo donjogo e dala, to ok wabi timi gimoro.”

²⁵ Nonyisogi yo midonjogo e dala, mi ne ginego ji duto mane odak kuno, mak mana ng’atno gi joode ema ne giweyo.

²⁶ Bang’ mano ng’atno nodhi e piny jo-Hiti, mogero dala kuno, kendo nochako ni Luz. Pod iluongo dalano ni Luz nyaka chil kawuono.

Pinje mane jo-Manase gi jo-Efraim okawo

²⁷ Jo-Manase bende ne ok oriembo joma nodak Beth-shean, kata joma nodak Dor gi Ibleam kod Megido, gi mier matindo ma nokiewo kodgi. To jo-Kanaan nosiko mana kodak e pinyno.

²⁸ Achien kane jo-Israel osedoko motegno, ne giloko jo-Kanaan-go wasumbgi, to ne ok giriembogi chuth.

²⁹ Jo-Efraim bende ne ok oriembo jo-Kanaan ma nodak Gezer, to jo-Kanaan-go nosiko kodak kodgi kuno.

Pinje mane dhoudi mamoko okawo

³⁰ Jo-Zebulun bende ne ok oriembo joma nodak Kitron gi Nahalol, to jo-Kanaan nodak kodgi. Kata kamano jo-Zebulun nolokogi wasumbgi.

³¹ Jo-Asher bende ne ok oriembo joma nodak Ako gi Sidon gi Alab gi Akzib gi Helba gi Afik kod Rehob.

³² Kamano jo-Asher nodak adaka gi jo-Kanaan-go, kendo ne ok giriembogi.

³³ Jo-Naftali bende ne ok oriembo jo-Kanaan ma nodak Beth-shemesh, kod joma nodak Beth-anath, to ne gidak mana kodgi, kendo ne gilokogi wasumbgi.

³⁴ To jo-Amor nodhiro jo-Dan chien e piny gode, kendo notamogi lor e piny pewe.

³⁵ To bende jo-Amor nosiko kodak e gode mag Heres gi Aijalon kod Shaalbim. Kata kamano joka Josef noloyogi mosmos, mi gidoko wasumbgi.

³⁶ Tong’ piny jo-Edom nochakore kama iidhogo Akrabim, koa Sela kochomo yo nyandwat.