Jona 4 - MUMA MALER 2015

Mirimb Jona gi ng’wono mar Nyasaye

¹ Wachno nojogo Jona ahinya, mi iye owang’.

² Omiyo nowacho ni Ruoth Nyasaye niya, “A Ruoth Nyasaye, kane pod an thurwa, donge nawacho ni ibiro timo gima kama? Mano emomiyo ne atemo ringo mondo adhi Tarshish, nikech nang’eyo ni in Nyasaye ma jang’wono, kendo makecho ji. Iyi ok wang’ piyo, kendo inyiso hera mosiko, bende chunyi lor a kuom kelo ni ji masira.

³ Omiyo koro kaw ngimana, A Ruoth Nyasaye. Da ber katho, moloyo bet mangima!”

⁴ To Ruoth Nyasaye nopenje niya, “Bende iparo ni ber kikecho kamano?”

⁵ Jona nowuok modhi obet piny yo wuok chieng’ mar Nineve. Nogero kiru kanyo mobetie koyueyo chieng’, korito gima ditimre ni dalano.

⁶ Ruoth Nyasaye nomiyo otangle otwi e wi tat kiruno, mondo okel tipo ma dimi Jona kue. Omiyo Jona nobedo mamor ahinya gi otangleno.

⁷ To kinyne kane piny oru, Nyasaye nomiyo kudni ochwowo otangleno, mi otangle otwo.

⁸ Kane chieng’ owuok, Nyasaye nokelo yamb ugue maliet, mi chieng’ ochamo wi Jona, kendo nong’no otere. Kuom mano, nogombo mondo otho, kowacho niya, “Da ber katho, moloyo bet mangima.”

⁹ To Nyasaye nopenje niya, “Iparo ni ber kikecho kuom tho otangle?” Nodwoko niya, “Ee, ber ka akecho, kata mana nyaka tho!”

¹⁰ Eka Ruoth Nyasaye nowachone niya, “Ka inyalo kecho otangle, mane otwi otieno achiel, to otho otieno machielo, mane ok ipidho, kata miyo dongo kamano,

¹¹ an to donge dakech Nineve, dala maduong’ man gi nyithindo moloyo alufu mia achiel gi piero ariyo, (120,000) kaachiel gi jamni mang’eny?”