Jona 3 - MUMA MALER 2015

Jo-Nineve oweyo richogi

¹ Ruoth Nyasaye nochako owuoyo gi Jona kendo, kowachone niya,

² “Wuogi, idhi Nineve, dala maduong’, mondo isiem jodalano gi wach ma abiro miyi.”

³ Kamano Jona nowuok modhi Nineve kaka Ruoth Nyasaye nochike. To Nineve ne en dala maduong’ gilala, moromo wuodh ndalo adek, kia tung’e koni nyaka kocha.

⁴ Jona nodonjo e dala, mowuotho kuom odiechieng’ achiel. Eka nogoyo milome kama: “Bang’ ndalo piero ang’wen, ibiro ketho Nineve!”

⁵ Kane jo-Nineve owinjo gima Nyasaye nowacho, ne giyiego. Ne gigoyo milome mondo ji otue chiemo, kendo ne girwako piende gugru giduto, joma dongo gi joma tindo machalre.

⁶ Kane ruoth owinjo wachno, noa malo e kome, molonyo lepe mag ruoth, kendo norwako pien gugru, mi obet e buru.

⁷ Ruoth gi jodonge nogoyo milome e Nineve duto niya, “Onge dhano kata chiayo ma nobil chiemo kata dhi e kwath, kata mana modho pi.

⁸ Nyaka girwakre gi pien gugru, kendo giywag ni Nyasaye gi tekregi duto. Ng’ato ka ng’ato mondo owe yorene maricho kaachiel gi timbene mag miero.

⁹ Kamoro Nyasaye dipo ka olokore moweyo mirimbe, mi ok watho.”

¹⁰ Nyasaye noneno gima ne gitimo, mokaka ne giweyo yoregi maricho. Omiyo nolokore, mi ok okelo masira kuomgi kaka nosesiemogi.