Jona 1 - MUMA MALER 2015

Jona oringo Ruoth Nyasaye

¹ Ruoth Nyasaye nowacho ni Jona wuod Amitai niya,

² “Wuogi, idhi Nineve, dala maduong’, mondo isiem jodalano, nikech richogi osechopo e nyima.”

³ To kane Jona owinjo kamano, nowuok mondo oring odhi Tarshish, oa e wang’ Ruoth Nyasaye. Nodhi Jopa, kuma noyudoe yie madhi Tarshish. Nochulo nengo mar wuoth, mi oidho yie mondo odhi Tarshish kuma bor gi Ruoth Nyasaye.

⁴ To Ruoth Nyasaye nomiyo yamo okudho matek e nam, mi ahiti mager ne dwaro ketho yie.

⁵ Kibaji nogoyo jokwang’, mi ng’ato ka ng’ato nolamo nyasache. Gik mane gin go e yie ne giwito e nam, mondo yie odong’ mayot. To sechego noyudo Jona oselor e yie piny, kendo oriere kuno ka nindo ogoye ngoga.

⁶ Jatend yie nopo konwang’o Jona kanyo, mopenje niya, “Ang’o momiyo inindo aninda? Chungi mondo iywag ni nyasachi, dipo ka owinjo moresowa.”

⁷ Jokwang’ nowacho e kindgi giwegi niya, “Biuru wago ombulu, mondo wang’ego ni ng’ano mokelonwa hawi marachni.” Kamano ne gigoyo ombulu, mi ombulu nolwar mana kuom Jona.

⁸ Eka ne gipenje niya, “Ang’o mitimo ka? Nyiswa kuma iaye. To ija kanye?”

⁹ Nodwokogi niya, “An ja-Hibrania, kendo alamo Ruoth Nyasaye ma Nyasach polo mane ochueyo nam gi piny.”

¹⁰ Kane giwinjo kamano, ne gidoko maluor ahinya, mi giwacho niya, “Mano kaka isetimo gima rach!” Ne giwacho kamano, nimar ne giseng’eyo ni Jona ringo a e wang’ Ruoth Nyasaye, nikech noyudo osewachonigi.

¹¹ Koro nam ne medo tugore marach moloyo, omiyo jokwang’ nopenjo Jona niya, “Watimni ang’o, mondo nam okuenwa?”

¹² Jona nodwokogi niya, “Kawauru ubola e nam, to bang’e nam biro bedonu mokue, nimar ang’eyo ni ahiti maduong’ni obironu mana nikech an.”

¹³ To jogo nokiewo yie matek mondo gigow e dho nam, to ne ok ginyal, nimar nam nomedo tugore gi ahiti, motamogi.

¹⁴ Mogik ne giywak ni Ruoth Nyasaye, ka giwacho niya, “A Ruoth Nyasaye, yie kik iwe watho kuom nego ng’atni, kendo kik ikwanwa ka jonek kuom tho ng’at ma ok oketho, nimar gima osetimore en mana dwaroni.”

¹⁵ Kamano ne gikawo Jona, mi gibolo e nam, eka nam nokue.

¹⁶ Bang’ mano jokwang’ noluoro Ruoth Nyasaye ahinya, mi ne gitimone misango, kendo gikuong’orene.

¹⁷ To Ruoth Nyasaye nosechano ni mondo rech mang’ongo omwony Jona, omiyo Jona noriyo ei rechno ndalo adek, odiechieng’ gotieno.