Jeremia 9 - MUMA MALER 2015

¹ “Mad wiya lokre soko mar pi, kendo pi wang’a lokre aora, mondo aywagi odiechieng’ gotieno nikech joga mosenegi.

² Mad abed ki kiru mar bworo e thim, kuma anyalo betie mabor gi joga, nimar giduto gin joma terore, kendo oganda ma andhoga.

³ Lewni chalo gi atung’ moywa, kendo diro miriambo mana kaka atung’ diro asere, bende timbe miganga ema opong’o piny.” Ruoth Nyasaye owacho niya, “Joga timo richo kinde duto, kendo ok gidewa.

⁴ Ng’ato ka ng’ato nyaka tang’ ni osiepne, kendo onge ng’ama nyalo geno owadgi, nimar owete duto gin jowuond ka Jakobo, bende ng’ato ka ng’ato kuodho osiepne.

⁵ Giduto giwuondo osiepegi, kendo onge ng’ama wacho adiera. Gisepuonjo lewgi wacho miriambo, kendo gisedonjo matut e richo ma ok ginyal wuokie.

⁶ Gitimo timbe mahundu kinde duto, timbegi mag wuond bende osiko asika, to gitamore yie kuoma.

⁷ “Kuom mano, an Ruoth Nyasaye Manyalo Gik Moko Duto awacho ni abiro pwodho joga, ka ng’at malenyo mula mondo ogol ng’iende. Joga osetimo richo, koro ere gima datimnigi?

⁸ Lewni chalo gi asere man gi kwiri mager, kendo dhogi wacho weche mag miriambo. Ng’ato ka ng’ato wuoyo mang’won gi wadgi, to kara e chunye kucha to ochikone mana obadho!

⁹ Koro donge abiro kumogi kuom timbe ma kamago? Adier, abiro chulo kuor ni oganda machal kamano! An Ruoth Nyasaye ema awacho kamano!”

¹⁰ Jeremia nowacho niya, “Abiro ywago gode gi lege, nikech gisetwo, kendo onge ng’ama wuothoe. Ywak mar jamni tinde ok winji, kendo winy gi le duto mae thim oseringo.”

¹¹ Ruoth Nyasaye owacho niya, “Abiro loko miech Jerusalem gundni kama ondiegi ema odakie, kendo miech Juda abiro loko thim.”

Ruoth Nyasaye owacho ni onyalo daro joge

¹² Jeremia nopenjo Ruoth Nyasaye niya, “Ere gimomiyo piny okethore kendo otwo, ka piny motimo ongoro ma onge ng’ama wuothoe? Ere ng’ama riek manyalo winjo tiend wachni? Koso en ng’a ma isenyiso tiende mondo onyis joma moko?”

¹³ To Ruoth Nyasaye nodwoka niya, “Gima kama osetimore nikech jo-Israel oseweyo chik mane amiyogi. Ok giseluora, to bende ok gisetimo gik mane awachonigi ni mondo gitim.

¹⁴ Gisebedo mana ka wigi tek, ka gitimo dwarogi giwegi, kendo giselamo kido manono mag Baal, kaka ne kweregi opuonjogi.

¹⁵ Kuom mano, winji gima abiro timo, an Ruoth Nyasaye Manyalo Gik Moko Duto kendo ma Nyasach Israel. Abiro miyo joga alode makech mondo ocham, kod pi motimo kwiri mondo gimodhi.

¹⁶ Abiro keyogi e kind ogendini ma ok ging’eyo, kendo ma kata kweregi bende ne ok ong’eyo. Bende abiro kelonigi wasigu mondo omonjgi nyaka chop atiekgi chuth.”

¹⁷ Ruoth Nyasaye Manyalo Gik Moko Duto wacho niya, “Luonguru mon ma joywak. Ee, oruru wach mondo mon mong’eyo ywak obi.

¹⁸ Gibi piyo mondo gidengnwa, nyaka wengewa pong’ gi pi wang’, mi owre nikech ywak.

¹⁹ Winjuru ywak maywagore Sayun, ‘Waserumo chuth, kendo waseyudo wichkuot miwuoro. Osedarwa e pinywa, kendo miechwa osekethi.’ ”

²⁰ Jeremia nowacho niya, “Un mon, chikuru itu ni gima Ruoth Nyasaye owacho, mondo uwinj wachne. Puonjuru nyiu gi osiepeu wende ywak.

²¹ Tho osedonjo gie dirisewa, koda ka e miech ruodhiwa, kendo osenego nyithindo e pewe oko, kod yawuowi e chirni.”

²² Ruoth Nyasaye wacho niya, “Ringre joma otho biro dhurore pidhe mana ka owuoyo mool e puothe. Ginichal gi cham ma jokeyo osebeto, to pok ochoki.

Ng’eyo Nyasaye e mor mar dhano

²³ “Ji mariek kik sungre nikech riekogi, joma rateke bende kik sungre nikech tekogi, kata joma omew kik sungre nikech mwandugi.

²⁴ To ng’at madwaro sungore, to mondo osungre mana nikech ong’eya, kendo wechena osedonjone, nimar an Ruoth Nyasaye ahero ji gi hera mosiko, kendo atimo gik makare kendo mowinjore e piny, nikech kamano e kaka adwaro. An Ruoth Nyasaye ema awacho kamano.”

²⁵ Ruoth Nyasaye wacho ni ndalo biro ma nokumie ji duto moter nyangu,

²⁶ kaka jo-Misri gi jo-Juda gi jo-Edom gi jo-Amon kod jo-Moab, kaachiel gi ji duto modak e thim ma timgi en tito yie wigi, nikech tero nyangu mar jogo duto, kaachiel gi mar jo-Israel, ok en tero nyangu mar chuny to en mana mar ringruok.