Jeremia 52 - MUMA MALER 2015

Loch Zedekia

¹ Zedekia ne jahigni piero ariyo gachiel kane odoko ruodh Juda, kendo norito piny kuom higni apar gachiel, kodak Jerusalem. Min mare ne nyinge Hamutal nyar Jeremia ma ja-Libna.

² Timbe Zedekia ne richo e nyim Ruoth Nyasaye, mana kaka timbe Jehoyakim.

³ Jo-Jerusalem gi jo-Juda nomiyo Ruoth Nyasaye mirima, nyaka nodarogi, motergi e tuech. Zedekia nopiem, modagi loch ruodh Babulon.

Jo-Babulon okawo Jerusalem

⁴ Omiyo chieng’ due apar due mar apar e higa mar ochiko mar loch Zedekia, Nebukadnezar ruodh Babulon nobiro gi joge mag lweny, momonjo Jerusalem. Ne gigero kambi oko mar dala, eka gichielone ohinga molwore.

⁵ Ne gigoyo ni Jerusalem ageng’a nyaka higa mar apar gachiel mar loch Zedekia.

⁶ Koro kech ne lich e dalano, kendo ji ne onge gi chiemo chuth. Chieng due ochiko due mar ang’wen,

⁷ jo-Babulon nomwomo ohinga mar dala, mi Zedekia notemo ringo gi jolwenje duto gotieno, kata obedo ni jo-Babulon nosedhogo dala koni gi koni kamano. Ne giluwo rangach mane ni e kind ohingni ariyo, ka ging’ado orundu ruoth, mi gichiko holo mar Jordan.

⁸ To jolweny mag Babulon nolawo ruoth Zedekia, mojuko e paw Jeriko mi jolwenje duto oringo oweye.

⁹ Ne gimake mi gitere Ribla ir ruodh Babulon, mong’adone bura kuno.

¹⁰ Ruodh Babulon nogolo chik, moneg yawuot Zedekia mana e wang’e koneno, e dala Ribla, e piny Hamath. Jodong Juda bende nonegi kuno.

¹¹ Bang’e nogolo chik, motok wenge Zedekia oko, kendo notueye gi nyororo, motere Babulon e tuech. Nosiko e od tuech nyaka otho.

Jo-Babulon omako jo-Juda, motero e tuech

¹² Chieng’ due apar due mar abich e higa mar apar gochiko mar loch Nebukadnezar, Nebuzaradan, ma jang’ad ni ruoth rieko, kendo ma jatend joge mag lweny, nodonjo Jerusalem.

¹³ Ne owang’o Hekalu mar Ruoth Nyasaye gi od ruoth kod ut joma dongo duto,

¹⁴ kendo joge mag lweny nomuko ohinga duto ma nolworo dalano.

¹⁵ Bang’e Nebuzaradan nomako joma nodong’ Jerusalem, motero Babulon, kaachiel gi joma noseringo modok ni ruodh Babulon, kod jotich molony mane pod odong’ kuno.

¹⁶ To jomoko modhier ahinya, mane onge gi gimoro, noweyo e piny Juda, mondo oti e puothe mzabibu kendo e puothe mamoko.

¹⁷ Jo-Babulon notoyo sirni mag mula gi rachungi mane itiyogo e Hekalu kod karaya maduong’ mar mula ma bende ne ni kanyo. Bang’e ne gitero mulago duto Babulon.

¹⁸ Bende ne gidhi gi agulini gi rachodhgi gi rangisni gi bakunde miting’oe remb misango, gi tep ubani kod gik moko duto mag mula ma nolos ni tich Hekalu.

¹⁹ Jatend jolweny nokawo gik moko duto molos gi dhahabu kata molos gi fedha, kata kikombe gi tegni mag mach gi tewni mamoko, gi agulini gi rachungi taya, gi tewni mag ubani kod tewni mag misengni miolo piny.

²⁰ Pek mula mane ruoth Solomon olosogo sirni ariyo gi karaya maduong’ kod ruedhi apar gariyo mane orenjie karayano ne ng’eny mokadho apima.

²¹ Sirni ariyogo ne romre. Moro ka moro borne modhi malo ne romo mita ochiko, to alwora mare ne romo mita auchiel. Ne girokore, kendo mith moro ka moro ne romre gi lwedo achiel.

²² Ewi siro ka siro ne nitie gima chalo agulu mar mula, ma borne modhi malo romo mita ariyo gi nus, to alwora mare ne oketie gik mong’inore ong’inore ka machunga, ma bende nolos gi mula.

²³ Siro ka siro ne nigi gik mong’inorego mia achiel, ma piero ochiko gauchiel kuomgi ne nenore gi kapiny.

²⁴ Nebuzaradan, jatend lweny maduong’, nomako Seraya jadolo maduong’, gi Zefania jadolo maluwe, kod ji adek ma jorit dhood Hekalu.

²⁵ Bende nokawo ng’at mane osebedo jatend jolweny, gi jagoro mare mane tichne en ndiko nying joma onego obed jolweny, kaachiel gi ji abiriyo kuom joma ne ng’ado ni ruoth rieko, kod jodongo piero auchiel mane pod ni Jerusalem.

²⁶ Jogo duto notero Ribla ir ruodh Babulon,

²⁷ mi ruoth nogolo chik, mi ogogi kendo oneggi kuno e piny Hamath. Kamano e kaka nodar jo-Juda e pinygi moter e tuech.

²⁸ Kar rom ji mane Nebukadnezar odaro motero e tuech chal kama: E higa mar abiriyo mar lochne, nodaro ji alufu adek gi piero ariyo gadek.

²⁹ To e higa mar apar gaboro mar lochne nodaro ji mia aboro gi piero adek gariyo, kogolo Jerusalem.

³⁰ E higa mar piero ariyo gadek mar lochne to Nebuzaradan nodaro jo-Yahudi mia abiriyo gi piero ang’wen gabich. Kamano ji duto mane odar ne romo alufu ang’wen gi mia auchiel.

Ogony ruoth Jehoyachin, kendo omiye duong’

³¹ Kane Jehoyachin ruodh Juda osetue higni piero adek gabiriyo, Evil-merodak ruodh Babulon nogonye. Mano notimore chieng’ due piero ariyo gabich due mar apar gariyo, e higa mane Evil-merodak ochakoe tich ruoth.

³² Evil-merodak norito Jehoyachin gi ng’wono, kendo ne omiye luor maduong’ moloyo ruodhi duto mane ni Babulon e tuech.

³³ Kuom mano Jehoyachin nolonyo lep tuech, kendo nochiemo e od ruoth ndalone duto.

³⁴ Odiechieng’ kodiechieng’ kuom higni duto mane ongima, ne imiye gik moko morome konyorego.