Jeremia 51 - MUMA MALER 2015

Ruoth Nyasaye okumo Babulon

¹ Ruoth Nyasaye wacho niya, “Abiro kelo yamo maketho Babulon kendo tieko joma odakie.

² Abiro oro ji moa e pinje mamoko mondo odhi oke Babulon mana ka mihudhi ma yamo keyo. Chieng’ ma masira omake, to ginimonje koni gi koni, mi giwe pinyno nono.

³ Kik uwe ni jo-Babulon thuolo mondo oba asere, kata kik uwenigi thuolo mondo gimanre gi gigi mag lweny. Bende kik uwe yawuotgi mak unego, to tiekgiuru atieka pep!

⁴ Ginitho e yore mag miechgi kosechwowgi mohinygi.

⁵ An Ruoth Nyasaye Manyalo Gik Moko Duto pok ajwang’o jo-Israel gi jo-Juda, kata obedo ni gisetimo timbe maricho e nyima kamano, an Ng’ama Ler mar Israel.

⁶ Koro achulom kuor kendo akumo jo-Babulon, to ok onego negu nikech richogi, omiyo ringuru ua kuno, ukwo ngimau.

⁷ Babulon ne chalo gi kikombe mar dhahabu manie lweta, mamiyo piny duto mer. Ogendini nomadho divai manie iye, mi wigi okethore.

⁸ To koro Babulon osepodho apoya, mi okethore! Ywageuru! Dwaruru yath ni adhondene, nimar dipo ka omiyo ochango.

⁹ Jo-pinje mamoko modak kuno nowacho niya, ‘Ne watemo konyo Babulon, to kata kamano kinde nosekadho. Koro biuru, wawuogi mondo wadog thuchewa, nimar osekum Babulon gi kum malich mochopo nyaka e polo.’

¹⁰ Jo-Israel owacho ni Ruoth Nyasaye osenyiso ni gin joma kare. Omiyo giwacho niya, ‘Wadhiuru Sayun mondo walandie gik ma Ruoth Nyasachwa osetimo.’ ”

¹¹ Ruoth Nyasaye osewinjo ruodhi mag Media, nikech odwaro ketho Babulon, mondo ochulgo ni Babulon kuor kuom ketho Hekalu mare. Jotend jolweny golo chik niya, “Piaguru aserni, kendo ikreuru gi tonge.

¹² Chunguro bandera manyiso jolweny mondo omonj ohinga mar Babulon. Jiwuru jorit, kendo keturu jolweny kuondegi, bende keturu jomoko obuti, mondo obuk joma ringo.” Ruoth Nyasaye osetimo gima ne owacho ni notim ni jo-Babulon, mana kaka nochano.

¹³ Babulon en dala man gi aore mang’eny, kendo en gi mwandu mogundho, to kata kamano oserumo, kendo tond ngimane osechot.

¹⁴ Ruoth Nyasaye Manyalo Gik Moko Duto osekuong’ore gi nyinge owuon ni obiro kelo ji mang’eny ka bonyo mondo omonj Babulon, kendo ka giseloye to ginikog gi mor.

¹⁵ Ruoth Nyasaye nochueyo piny gi tekone, mogure motegno, kendo noyaro polo gi riekone.

¹⁶ En ema omiyo pi manie tok polo wuo, kendo otugo boche polo e tung’ piny duto. Bende omiyo polo mil ka koth chue, kendo ogolo yamo kar kenone mondo okudhi.

¹⁷ Gik makamago miyo ji ng’eng’ kendo bedo mofuwo. Jotheth duto yudo wichkuot kuom gik ma githedho, nikech gin mana nyiseche manono ma onge gi ngima.

¹⁸ Gin gik manono moromo chayo, kendo gibiro rumo chieng’ ma Ruoth Nyasaye biro mondo otiekgi.

¹⁹ Nyasach Jakobo to ok chal gi gigo, nimar en ema ne ochueyo gik moko duto, kendo oseyiero jo-Israel mondo obed joge owuon. Ruoth Nyasaye Manyalo Gik Moko Duto e nyinge.

²⁰ Ruoth Nyasaye wacho niya, “Babulon, in e le ma akedogo. Ne akonyora kodi kuom chadho ogendinni,

²¹ kendo kuom chadho farese gi joma idhogi, kuom turo geche lweny kod joma riembogi,

²² kuom nego chwo gi mon, kod joma dongo gi joma tindo, kaachiel gi yawuowi gi nyiri. Bende ne akonyora kodi

²³ kuom chadho ruodhi gi jodonggi.”

²⁴ Ruoth Nyasaye wacho niya, “Ubiro neno ka achulo kuor ni Babulon gi joge kuom richo duto mane gitimo Sayun.

²⁵ Babulon, ichalo gi got maketho piny ngima, to an Ruoth Nyasaye an jasiki. Abiro maki, mi agoyi piny milokri buru.

²⁶ Onge kidi moro kata achiel ma nogol e gundani mondo ogedgo. Ibiro chalo gi thim nyaka chieng’. An Ruoth Nyasaye ema awacho kamano.

²⁷ “Chunguru bandech lweny! Gouru tung’ mondo ogendini owinji, kendo giikre monjo Babulon! Luonguru jopinje mag Ararat gi mag Mini kod mag Ashkenaz mondo obi ochak lweny, kendo yieruru ng’ato obed jatendgi. Keluru farese mang’eny ka bonyo.

²⁸ Nyisuru ruodhi mag Media gi jotendgi kod jodonggi kaachiel gi jopinje duto manie bwo lochgi mondo oikre monjo Babulon.

²⁹ Piny tetni kendo yiengni, nikech Ruoth Nyasaye loko Babulon thim maonge ng’ama dakie, mana kaka nosechano.

³⁰ Jolweny mag Babulon oringo lweny, mopondo mana kuonde mochiel motegno. Luoro omakogi, mi koro gichalo mana mon. Dhorangeye dala osemuki, mowang’ udi gi mach.

³¹ Joote mang’eny ringo kaa koni gi koni mondo onyis ruodh Babulon ni wasigu osemwomo ohinga kuonde duto.

³² Gisekawo dhowedhe, kendo giwang’o odundu gi mach, mi kibaji ogoyo jolweny mag Babulon.

³³ Chieng’ keyo osechopo machiegni! Piyopiyo nono wasigu biro negogi, mi nyon-gi ka cham midino. Ruoth Nyasaye Manyalo Gik Moko Duto kendo ma Nyasach Israel ema owacho kamano.”

³⁴ Ruodh Babulon nokango Jerusalem mochamo. Osenyodho dalano, mobolo kucha mana ka agulu ma iye ni nono, kendo omwonye mana ka ondiek. Ne okawo mana gik mabeyo modwaro, to owito mago ma ok odwar.

³⁵ Jo-Sayun wacho niya, ‘Muma mondo ocham jo-Babulon kuom masira ma gisekelonwa.’ Ee, jo-Jerusalem wacho niya, ‘Muma mondo ocham jo-Babulon kuom rembwa mosechwer.’

³⁶ Kuom mano Ruoth Nyasaye wacho ni jo-Jerusalem niya, “Abiro doknu mondo achul kuor ni jo-Babulon nikech un, kendo abiro twoyo kuonde ma pi Babulon aye, mi aduon aorene.

³⁷ Babulon nodong’ gunda ma ondiegi ema dakie. Nobed kama bwogo ji ma onge ng’ama odakie, kendo kibaji nogo ji duto moneno gima osetimorene.

³⁸ Jo-Babulon goyo asumbi ka sibuor, kendo giruto ka nyithind sibuor.

³⁹ Kara, ka giowore kamano, to abiro losonigi sawo! Abiro miyogi gimer, mi gibed mamor, to bang’e nindo notergi ma ok ginyal chiew kendo.

⁴⁰ Abiro terogi mondo oyang’gi mana kaka iyang’o jamni. An Ruoth Nyasaye ema awacho kamano.

⁴¹ “Osekaw Babulon dala maduong’ ma piny duto pako. Oselokore gima bwogo ogendini.

⁴² Nam oseime, mi oume gi apaka mawuo.

⁴³ Miech jo-Babulon osedoko gik mabwogo ji, kendo chalo mana gi thim ma pi ongee. Ng’ato ok dagie kata wuothie.

⁴⁴ Abiro kumo Bel nyasach Babulon, mi ami ong’og oko gik mosekwalo, kendo ogendini ok nochak olame kendo. “Ohinga mar Babulon osepodho! Un jo-Israel, ringuru ua kuno.

⁴⁵ Ng’ato ka ng’ato oring mirimba mager, mondo ores ngimane.

⁴⁶ Kuwinjo wach moro marach, kaka wach lweny, kata ni ruoth moro kedo gi wadgi, to kik chunyu parre, kata kik ubed maluor, nikech higa ok kadhi mak weche makamago olandore.

⁴⁷ Kinde biro ma anakumie nyiseche manono mag Babulon, mi piny Babulon noyud wichkuot, kendo joge duto noneg e lweny.

⁴⁸ Mony moa yo nyandwat biro loyo Babulon kendo kethe, mi gik moko duto manie piny kendo manie polo nokog gi mor. An Ruoth Nyasaye ema awacho kamano.

⁴⁹ Babulon nomiyo ji otho e piny ngima, omiyo koro ibiro kethe nikech joge nonego jo-Israel mang’eny.

⁵⁰ “Un joga man Babulon, useyombo tho! Koro ringuru ua, mak udigni. Kata ubor koda kamano, to paruru an Ruoth Nyasaye ma Nyasachu, kendo Jerusalem bende mondo upar.

⁵¹ Uwacho niya, ‘Ji oseyanyowa, omiyo wiwa okuot, nikech jopinje mamoko osedonjo kuonde maler mag Hekalu.’

⁵² Kuom mano, an Ruoth Nyasaye, awacho ni kinde biro ma anakumie nyiseche manono mag Babulon duto.

⁵³ Kata da bed ni Babulon nyalo idho, mi tundi e polo, kendo ger udi motegno kuno, to pod daor ji mondo okethe. An Ruoth Nyasaye ema awacho kamano.

⁵⁴ “Winjuru ywak man Babulon manyiso ni pinyno okethore!

⁵⁵ To an Ruoth Nyasaye ema aketho Babulon, kendo abiro miyo oling’ thi. Koko mar jolweny mamonjo dalano chal mana ka apaka mawuo matek.

⁵⁶ Gisebiro mondo giketh Babulon kendo gisemako jolweny mage, mi gituro gigi mag lweny. An Ruoth Nyasaye, an e Nyasaye ma kumo ji kuom richogi, omiyo abiro kumo Babulon mana marom gi timbene.

⁵⁷ Abiro miyo jodonge gi joge mariek gi jotelo kod joge mag lweny bed momer, mi nindo tergi, mi ok ginyal chiew kendo. An Ruoth Nyasaye Manyalo Gik Moko duto, ema awacho kamano.

⁵⁸ Ohinga mapek mar Babulon ibiro ruomb piny, kendo dhorangeyene maboyo nowang’ pep. Tich maduong’ mane ogendini tiyo koro nobed gima nono, nikech tichgi duto koro osewang’ morumo pep. An Ruoth Nyasaye Manyalo Gik Moko Duto ema awacho kamano.”

⁵⁹ Seraya wuod Neria ma nyakwar Maseya ne jatich Zedekia ruodh Juda. E higa mar ang’wen mar loch Zedekia, noyudo Seraya dwaro dhi Babulon, omiyo Jeremia ne oore.

⁶⁰ Jeremia nokawo kitabu moro, mi ondikoe masiche duto mane biro timore ni Babulon, kaachiel gi weche mamoko duto mane osewacho kuom Babulon.

⁶¹ Nowacho ni Seraya niya, “Ka ichopo Babulon, to som ni ji weche duto mondik e kitabuni.

⁶² Bang’e ilem kama: ‘A Ruoth Nyasaye, isewacho ni ibiro ketho dalani, maonge gima ngima kaka dhano kata le, ma nodagie, kendo ni obiro dong’ nono nyaka chieng’.’

⁶³ Ka isetieko timo kamano, to itue ni kitabuno kidi, eka iwite e aora Yufrate.

⁶⁴ Bang’ mano iwach niya, ‘Mano e gima biro timore ni Babulon. Kaka kidini onyumore e pi, e kaka Babulon bende nonyumre e masira ma Ruoth Nyasaye biro kelo kuome, mi ok nochak owuog kendo.’ ” Mano e giko weche Jeremia.