Jeremia 49 - MUMA MALER 2015

Weche mokor kuom jo-Amon

¹ Ruoth Nyasaye nowuoyo kuom jo-Amon niya, “Jo-Israel ni kanye? Donge nitie ng’ato manyalo reso lopgi? Ang’o momiyo giseweyo jo-Amon malamo Milkomgi okawo piny jo-Gad mi odakie?

² Onge wach! To kata kamano, ndalo biro ma anami joma odak e dala mar Raba winj mahu mar lweny. Dala maduong’ mar jo-Amonno nodong’ gunda, kendo mier matindo tindo mokiewo kode nowang’ chuth. Bang’e jo-Israel nochak okaw pinygi kuom joma nomayogigo. An Ruoth Nyasaye ema awacho kamano.

³ Un jo-Heshbon, ywaguru, nikech dalau osekethi! Un mond Raba denguru kendo urwak piende gugru, mi uring koni gi koni, nimar Milkom nyasachu ibiro kaw mi ter e tuech, kaachiel gi jodolo mage kod jodonge.

⁴ Ere gima omiyo usungoru, un joma andhokegi, to tekou orumo? Ang’o momiyo uparo ni un rateke, kendo ni onge ng’ama dihedhre monjou?

⁵ Abiro kelonu masiche moa koni gi koni kendo uduto ubiro ringo. Ng’ato ka ng’ato noring mondo ores ngimane, kendo onge ng’ama nochak ochok jolweny mau kanyakla

⁶ To bang’e achien anami jo-Amon chak dhi nyime maber kendo.”

Weche mokor kuom jo-Edom

⁷ Ruoth Nyasaye Manyalo Gik Moko Duto nowuoyo kuom jo-Edom kama: “Rieko tinde orumo e piny Edom koso? Donge jorieko maggi ng’adonigi rieko? Koso tinde riekogi olal?

⁸ Jo-Dedan, wichreuru uringi, mondo utony kuonde maboyo, nimar abiro tieko nyikwa Esau, nikech kinde ma akumogie osechopo.

⁹ Ka ji pono mzabibu, to donge giweyo moko? Koso ka jokuo obiro kwalo chambu gotieno, to donge gikawo mana ma gidwaro?

¹⁰ Un to aseyweyou oko gi yuech, kendo asefwenyo kuonde ma upondoe, mi koro onge kama unyalo resorue. Jo-Edom gi wedegi kod joma odak machiegni kodgi osetieki, kendo onge kata ng’at achiel modong’.

¹¹ Kuom mano onego uwena nyithindu makiye mondo ariti. Mondu mag liete nyalo konyore kuoma.”

¹² Ruoth Nyasaye wacho niya, “Ka ji mane ok owinjore kum, bende noyudo kum, koro un uparo ni dutony mak okumu? Ooyo, nyaka kumu!

¹³ An awuon asekuong’ora ni dala mar Bozra nobed gima bwogo ji, kendo nolokre thim ma ji nyiero, kendo noluong nyinge ka gima okuong’. Mier matindo mokiewo kode nobed kokethore nyaka chieng’! An Ruoth Nyasaye ema awacho kamano.”

¹⁴ Jeremia nowacho niya, “Aseyudo wach moa kuom Ruoth Nyasaye ni oseoro jaote mondo onyis ogendini kama: ‘Chokuru ogendu mag lweny, kendo uikru monjo Edom.’

¹⁵ Un jo-Edom, Ruoth Nyasaye biro miyo ogandau dok manyap, kendo onge ng’ama biro miyou luor.

¹⁶ Sunga ma un go osewuondou, to chutho onge ng’ama oluorou kaka uparono. Udak malo e lwendni morokore manie wi gode maboyo. To kata obedo ni udak malo mabor kaka ongo kamano, to Ruoth Nyasaye biro lorou piny. Ruoth Nyasaye ema owacho kamano.”

¹⁷ Ruoth Nyasaye wacho niya, “Masira malich biro mako jo-Edom, mi ng’ato ka ng’ato makadho machiegni, moneno gik moko duto mosetimore ni pinyno, nobwogi ka kihondko omako.

¹⁸ Gima ne otimore ni Sodom gi Gomora kane okethogi kaachiel gi mier mokiewo kodgi, e gima biro timore ni piny Edom. Onge ng’ama nodag kuno, kata mana ma nobworie. An Ruoth Nyasaye ema awacho kamano.

¹⁹ Anabi mana ka sibuor mochomo lek moloth, kowuok e bungu moyugno manie geng aora Jordan, kendo anami jo-Edom mwomre gi ng’uech kaa. Bang’e ng’at ma ayiero jatelo norit ogandano. “Ere ng’ama inyalo pimo koda? Koso ere ng’ama dihedhre piem koda? En ruoth mane ma dikwer wachna?

²⁰ Omiyo winjuru gima asechano timo ni Edom kaachiel gi ji modak e dalagi mar Teman. Kata mana nyithindgi bende noywa oko, mi kibaji nogo ng’ato ka ng’ato.

²¹ Ka olo Edom, to koko nogore matek mi piny noyiengni, kendo kokono nowinjre nyaka Nam Makwar.

²² Wasigu nomonj Bozra mana ka achuth mopodho piny kuom gima otho, koa malo e kor polo ka buombene oyarore. Chieng’no jolweny mag Edom kihondko nomaki mana ka dhako ma muoch kayo.”

Weche mokor kuom jo-Damaski

²³ Ruoth Nyasaye nowuoyo kuom jo-Damaski niya, “Joma odak Hamath gi Arpad luoro omako, kendo chunygi chandore nikech gisewinjo wach marach. Chunygi ling’ore mana ka apaka mar Nam Makwar, kendo ok ginyal yudo yueyo.

²⁴ Jo-Damaski osedoko manyap, kendo gisewichore mondo giring ka kihondko omakogi. Piny ochamogi kendo giwinjo rem mana ka dhako ma muoch kayo.

²⁵ Dala marahuma mane mor chono, ji osedarie pep.

²⁶ Chieng’no yawuowi kod jolweny duto noneg e yore mag Damaski. An Ruoth Nyasaye ema awacho kamano.

²⁷ Anamok mach e ohinga mar Damaski, kendo nawang’ ut ruoth Beh-hadad pep.”

Weche mokor kuom jo-Kedor gi dalagi mar Hazor

²⁸ Ruoth Nyasaye nowuoyo kuom jo-Kedor kod ruodhi mag Hazor mane Nebukadnezar ruodh Babulon oloyo niya, “Dhiyouru umonj jo-Kedar ma jo-Arabu modak yo wuok chieng’, mi utieki.

²⁹ Yakuru hembegi kod jambgi kaachiel gi rageng’ni mag hembegi kod gimoro amora muyudo e hembego. Bende peuru ngamia maggi kendo unyisgi ni masira olworogi kuonde duto.

³⁰ “Un jo-Hazor to asiemou an Ruoth Nyasaye ni, ringuru udhi mabor, upondi, nimar Nebukadnezar ruodh Babulon osechano tiekou, kendo owacho niya,

³¹ ‘Biuru mondo wamonj ji maparo ni odak gi kue, kendo onge gima nyalo timogi! Dhorangeyegi ni nono, kendo ok lor, bende ok riti.’ An Ruoth Nyasaye ema awacho kamano.

³² Yakuru ngamia maggi kod jambgi mogundhogo. Abiro keyo jo-Kedar ma timgi en tito yie wigi, kuonde duto, kendo abiro kelo kuomgi masira moa koni gi koni. An Ruoth Nyasaye ema awacho kamano.

³³ Hazor nolokre thim nyaka chieng’, kama ondiegi ema dakie. Onge ng’ama nodag kuno, kata mana ma nobuorie.”

Weche mokor kuom piny Elam

³⁴ Kane Zedekia osedoko ruodh Juda, Ruoth Nyasaye nowuoyo gi Jeremia janabi kuom piny Elam.

³⁵ Nowacho niya, “Abiro nego jo-asere duto mag Elam mosemiyo pinygi teko.

³⁶ Anami yamo moa kuonde duto kudh kochomo Elam, mi ake joma odak kuno kuonde duto. Onge piny moro ma joma ringo ok nochopie.

³⁷ Anami jo-Elam bed moluoro wasikgi ma dwaro negogi. Anatiekgi gi mirimba mager, kendo anaor ogendini mag lweny kuomgi nyaka chop girum chuth. An Ruoth Nyasaye ema awacho kamano.

³⁸ Anatiek ruodhi kod jotelo mag Elam, mi agur lochna kuno.

³⁹ To bang’e achien, anami jo-Elam chak dhi nyime maber. An Ruoth Nyasaye ema awacho kamano.”