Jeremia 47 - MUMA MALER 2015

Weche mokor kuom jo-Filistia

¹ Kane pok Farao omonjo Gaza, Ruoth Nyasaye nowuoyo gi Jeremia kuom jo-Filistia niya,

² “Neye kaka pi gingore koa yo nyandwat! Obiro bubni ka aora ma mwomo genge, kendo obiro imo piny duto kod gimoro amora mantie, kaka mier kod joma odakie. Ji biro goyo nduru mondo okonygi, kendo ng’ato ka ng’ato manie piny noywag malit.

³ Giniwinj tiend farese ka diko, gi geche maringo, kod tiend geche ka mutni. Wuone nyithindo ok nodog chien mondo oom nyithindgi, to ginibed maluor maonge gi teko,

⁴ nikech kinde osechopo mikethoe piny Filistia. Kamano konyruok ma jo-Turo gi jo-Sidon geno yudo kuom Filistia norum pep, nimar an Ruoth Nyasaye abiro ketho jo-Filistia duto mane oa e dho nembe mag Kaftor.

⁵ Jo-Gaza oseliel wigi, ka nyiso ni gin gi kuyo maduong’, kendo jo-Ashkelon oling’ thi. Jo-Filistia modong’ noywag nyaka karang’o?

⁶ Giywak niya, ‘Yaye! Ligangla mar Ruoth Nyasaye biro chadho ji nyaka karang’o? Onego odog e olalo mondo oyue kanyo!’

⁷ To doyue nadi, to asemiye tich mondo oti? Asechike mondo omonj Ashkelon kaachiel gi joma odak e dhonam.”