Jeremia 44 - MUMA MALER 2015

Jeremia ohulo wach ni jo-Juda ma oringo odhi Misri

¹ Ruoth Nyasaye Manyalo Gik Moko duto kendo ma Nyasach Israel nowuoyo ni Jeremia kuom jo-Yahudi mane oyudo odak e miech Misri ma Migdol gi Tapanhes kod Memfis, kendo e gweng’ milambo mar pinyno, kowacho niya,

² “Un uwegi useneno masira mane akelo kuom Jerusalem gi mier mamoko mag Juda. Bende kata sani pod gikethore, ma onge ng’ama odakie.

³ Ne atimo kamano nikech joma ne odak kuondego ne otimo timbe maricho ka gimiyago mirima. Ne gilamo nyiseche mamoko, ma gin kata un kata mana kwereu ne pok olamo, mi gitimonigi misengni.

⁴ Ne asiko ka aoronu jotichna ma jonabi mondo okweru kik utim gik makuero ma amon-gogo,

⁵ to ne udagi winjo, kata dewo ne ok udewo. Bende ne utamoru weyo tim marach mar timo misengni ni nyiseche mamoko.

⁶ Mano omiyo ne aolo mirimba mager e miech Juda kendo e yore mag Jerusalem, mi awang’ogi gi mach. Ne gidong’ ka gikethore maonge ng’ama dakie, kendo pod gisiko kamano nyaka chil kawuono.

⁷ “Kuom mano an Ruoth Nyasaye Manyalo Gik Moko Duto koro apenjou ni, ere gima omiyo uhinyoru uwegi kutimo gima rach kamano? Koso udwaro kelo masira kuom chwo gi mon gi rawere kod nyithindo mayom, ma dimi jou duto rum?

⁸ To mano ema biro timore, kumedo miya mirima gi kido mag nyisecheu manono, kendo kuom timo misengni ni nyiseche mamoko e piny Misri, kama usebiro mondo udagieni. Koso utimo kamano mana ni mondo urum, kendo mondo ogendini duto mae piny ojaru, kendo oluong nyingu ka gima okuong’?

⁹ To bende wiu diwil gi gik maricho duto ma kwereu kaachiel gi ruodhi mag Juda gi mondgi kod un gi mondu usetimo e miech Juda kendo e yore mag Jerusalem adier?

¹⁰ To pok uboloru kata mana nyaka chil kawuono, kendo ok useluora kata rito chikena gi buchena mane amiyou gi kwereu.

¹¹ “Kuom mano, an Ruoth Nyasaye Manyalo Gik Moko Duto, kendo ma Nyasach Israel abiro kelo masira kuomu, mi atiek jo-Juda pep.

¹² Kata mana jo-Juda modong’ moramo nyaka dhi dag e piny Misri, abiro tieko chuth. Lweny kata kech biro negogi duto e piny Misri. Ginilokre gima bwogo ji, mi ji nojargi, kendo noluong nyinggi ka gima okuong’.

¹³ Anakum joma odak Misri, mana kaka ne akumo jo-Jerusalem ka akelonigi lweny gi kech kod tuoche.

¹⁴ Onge kata ng’at achiel kuom jo-Juda mane odong’ mi tony. Bende onge kata ng’at achiel kuomgi ma nodong’ e piny Juda kuma gigombo mondo gidagie kendo. Onge ng’ama nodogi, mak mana ji moko manok moringo lweny.”

¹⁵ Bang’ wechego, ji duto mane ong’eyo ni mondgi timo misengni ni nyiseche mamoko, kaachiel gi mon mane oyudo ochung’ kanyo, kod jo-Juda mane oyudo odak e gweng’ Misri ma milambo, duto oganda maduong’ koriwore, nowacho ni Jeremia niya,

¹⁶ “Wadagi winjo gima isewachonwa e nyim Ruoth Nyasaye.

¹⁷ Wabiro timo gik moko duto ma wasesingore ni watimo. Wabiro timo misengni ni nyasaye madhako miluongo ni Ruodh Polo, kendo wabiro chiwone misengni miolo piny, mana kaka wan gi kwerewa gi ruodhwa kod jotendwa ne watimo e miech Juda kendo e yore mag Jerusalem. E ndalono ne wan gi chiemo mogundho, kendo ne wadhi nyime maber maonge chandruok moro.

¹⁸ To nyaka ne wawe timo misengni ni ruoth madhako mar polo, kendo wawe chiwone misengni miolo piny, wasebet modhier maonge gimoro, kendo lweny gi kech osenego jowa.”

¹⁹ Eka mon bende nowacho niya, “Kane waloso kek e kido machal gi ruoth madhako mar polo, kendo wachiwone misengni miolo piny, to chwowa ne oyie gi gima ne watimono.”

²⁰ Bang’e Jeremia nowacho ni ji duto ma chwo gi mamon mane osedwoke kamano niya,

²¹ “Uparo ni Ruoth Nyasaye ne ok ong’eyo wach misengni ma un gi kwereu kod ruodhiu gi jotendu kaachiel gi jopinyu duto ne utimo e miech Juda kendo e yore mag Jerusalem? Koso uparo ni wiye osewil kodgi?

²² Kata mana sani, pinyu okethore maonge ng’ama odakie. Oselokore gima bwogo ji, kendo giluongo nyinge ka gima okuong’, nikech Ruoth Nyasaye ne ok nyal weyo mak okumou kuom timbeu maricho.

²³ Masirano nobiro kuomu kaka uneno kawuononi nimar ne utimo misengni ni nyiseche mamoko, mi utimo timbe maricho e nyim Ruoth Nyasaye. Ne ok uwinje, kata puonjne bende ne ok uluwo.”

²⁴ Jeremia nochako onyiso ji duto, kaachiel gi mon niya, “Ruoth Nyasaye Manyalo Gik Moko duto, kendo ma Nyasach Israel owacho ni jo-Juda modak Misri kama:

²⁵ ‘Un kaachiel gi mondu, usetimo singruok ni ruoth madhako mar polo. To mano ber! Chopuru achopa singruokugo, kendo timuru atima gik ma usekuong’oru ni ubiro timo!

²⁶ To koro winjuru singruok ma an Ruoth Nyasaye asetimo e nyinga maduong’ ni jo-Juda duto modak Misri: Ok nachak ayie mondo ng’ato ang’ata kuomu oluong nyinga ka wacho niya, “Akuong’ora e nying Ruoth Nyasaye mangima.”

²⁷ Abiro neno ni ok gidhi nyime maber, to anang’igi gi wang’ marach. Un jo-Juda duto modak e piny Misri, lweny kata tuoche biro negou nyaka urum pep, maonge kata ng’at achiel modong’.

²⁸ To ji manok kuomu notony e tho, mi dog Juda koa Misri. Bang’e jo-Juda modong’ kuom mago mane obiro Misri nong’e ka wechena kata wechegi ema oselokore adiera.

²⁹ An Ruoth Nyasaye namiu ranyisi,

³⁰ kaketo Farao Hofra ma ruodh Misri e lwet wasike madwaro nege, mana kaka naketo Zedekia ruodh Juda e lwet Nebukadnezar ruodh Babulon mane jasike, kendo mane dwaro nege. Anamiu ranyisino mondo ung’e ni nakumu kaeri, kendo ni anakel masira kuomu kaka ne asesingora.’ ”