Jeremia 42 - MUMA MALER 2015

Jeremia owuoyo ni Johanan

¹ Jotend lweny duto kaka Johanan wuod Karea gi Azaria wuod Hoshaya kod ji mamoko duto te nobiro ir Jeremia janabi,

² mowachone niya, “Kiyie to timnwa gima wakwayi. Yie ilamnwa Ruoth Nyasachwa, wan ji duto modong’. Chon ne wan ji mathoth, to koro neye kaka wadong’ mana manok kende.

³ Lemnwa mondo Ruoth Nyasachi onyiswa yo ma onego waluw, kendo gima onego watim.”

⁴ Jeremia nodwokogi niya, “Kara mano ber, abiro lamo Ruoth Nyasachwa mana kaka usekwaya, kendo gimoro amora mowachona, to abiro nyisou. Ok napandu wach moro amora kata achiel.”

⁵ Eka ne giwachone niya, “Ruoth Nyasaye ma Nyasachwa mondo obed janeno makare kendo maradiera ka ok warito chik duto ma omiyi mondo watigo. Wakuong’ore ni wabiro timo gimoro amora ma Ruoth Nyasaye ma Nyasachi owachoni mondo inyiswa,

⁶ bed ni en wach maber kata marach. Wabiro winjo gima Ruoth Nyasaye ma waori ire owacho, nimar mano ema dimi wadhi nyime maber.”

⁷ Bang’ ndalo apar, Ruoth Nyasaye nowuoyo gi Jeremia,

⁸ mi Jeremia noluongo Johanan wuod Karea kod jotend lweny duto mane ni kode, kaachiel gi ji duto te.

⁹ Nowachonigi niya, “Ruoth Nyasaye ma Nyasach Israel, mane uora ire mondo apenjnu wach, owacho kama:

¹⁰ ‘Ka uyie dhi nyime gi dak e pinyni, to abiro gerou, kendo ok abi kethou. Bende abiro pidhou ka ng’ama pidho yien, kendo ok napudhu. Asebedo ka akuyo nikech masira mane akelo kuomu.

¹¹ Weuru luoro ruodh Babulon, nikech an kodu, kendo abiro konyou, mi aresu ua e tekone. An Ruoth Nyasaye ema awacho kamano.

¹² Abiro kechou, kendo en bende abiro miyo okechu, mi owe udag e pinyu ka.’ ”

¹³ Jeremia nomedo wachonigi niya, “Un joma odong’ e piny Juda, kik udagi winjo wach Ruoth Nyasaye ma Nyasachu, mi utamru dak e pinyni.

¹⁴ Bende kik uwach ni, ‘Ooyo, wabiro dhi mondo wadag e piny Misri, kuma ok wanyal chako nenoe lweny, kata winjoe tung’ ma luongowa mondo wadhi e lweny kata bedo kech.’

¹⁵ Ka uwacho kamano to Ruoth Nyasaye Manyalo Gik Moko Duto kendo ma Nyasach Israel wacho niya, ‘Ka uramo ni nyaka udhi udag e piny Misri,

¹⁶ to lweny ma uluorono biro jukou, kendo kech ma uparono bende biro luwou, mi utho e piny Misri kuno.

¹⁷ Jogo duto ma oramo ni nyaka dhi dag e piny Misri, lweny kata kech kata tuoche biro nego. Onge kata ng’at achiel kuomgi ma nokwo. Ooyo, onge achiel ma notony kuom masira ma abiro kelo kuomgi.’

¹⁸ “Ruoth Nyasaye ma Nyasach Israel wacho niya, ‘Kapo ni udhi e piny Misri, to abiro olo mirimba kuomu, mana kaka ne aolo mirimba kuom jo-Jerusalem. Unulokru gima bwogo ji, kendo ji nobed kajarou, mi giluong nyingu ka gima okuong’. Bende ok nuchak une kaeri kendo.’ ”

¹⁹ Eka Jeremia nodhi nyime kawacho niya, “Ruoth Nyasaye osenyisou un joma odong’ e piny Juda ni kik udhi e piny Misri. Kuom mano, koro asiemou ni,

²⁰ mano dibed ketho maduong’! Ne uora ir Ruoth Nyasachwa kuwachona niya, ‘Lamnwa Ruoth Nyasachwa, kendo inyiswa weche duto mowacho mondo watigo.’

²¹ To koro asenyisou gik moko duto, to udagi winjo weche ma Ruoth Nyasaye ma Nyasachwa oseora mondo awachnu.

²² Kuom mano nyaka ung’e ni lweny kata kech kata tuoche biro negou e piny ma udwaro dhi dakieno!”