Jeremia 40 - MUMA MALER 2015

Jeremia kod joma odong’ gi Gedalia

¹ Ruoth Nyasaye nowuoyo gi Jeremia kane Nebuzaradan jatend lweny maduong osegonye Rama. Nosetere kuno kotueye gi nyororo kaachiel gi jomoko duto mane ogol Jerusalem gi Juda, kitero e tuech Babulon.

² Jatend lwenyno nogolo tenge mowachone niya, “Ruoth Nyasaye ne osesiemo ni obiro kelo masira e pinyni,

³ kendo koro osetimo gima ne owacho ni notim. To gigo duto osetimore mana nikech jou osetimo timbe maricho e nyim Ruoth Nyasaye, kendo nikech ne ok giwinjo chikne.

⁴ Koro agonyo nyororo oko e lweti mondo ibed thuolo, kendo ka idwaro dhi koda Babulon, to wanyalo dhi, mi anariti maber. To ka ok idwar dhi, to bende onge wach, inyalo dong’. In thuolo, omiyo inyalo dhi kamoro amora mihero.”

⁵ Jeremia ne ok dwar dhi Babulon, omiyo Nebuzaradan nowachone niya, “Dogi ir Gedalia wuod Ahikam ma nyakwar Shafan, ma ruodh Babulon oseketo jatend miech Juda. Inyalo bet kode mondo idag gi jou, kata inyalo dhi kamoro amora mihero.” Bang’ mano, nomiyo Jeremia chiwo kod chiemo, mi oweye odhi.

⁶ Kamano Jeremia nodhi Mizpa, mobet gi Gedalia, kaachiel gi joma noyudo odong’ piny Juda.

Ishmael ochano nego Gedalia

⁷ Noyudo jotend lweny moko ma jo-Juda, kod jolwenjgi pok ochiwore e lwet jo-Babulon. Ne giwinjo ni ruodh Babulon oseketo Gedalia wuod Ahikama jatend piny Juda, mondo orit ji duto mane oter e tuech Babulon. Mago ne joma odhierie moloyo e piny Juda.

⁸ Omiyo Ishmael wuod Nethania gi Johanan wuod Karea gi Seraya wuod Tanhumeth kod yawuot Efai ja-Netofa gi Jezania ja-Makath ne jokawo jogi modhigo Mizpa ir Gedalia.

⁹ Eka Gedalia nowachonigi niya, “Awachonu adier ni ok onego uluor chiworu e lwet jo-Babulon. Daguru adaga e pinyni mondo uti ni ruodh Babulon, to ubiro dhi nyime maber.

¹⁰ An abiro dak Mizpa, kendo anabed jaoteu ka jo-Babulon obiro ka. To unyalo choko divai gi olemo kod mor zeituni mondo ukan, kendo udag e mier ma usekawo.”

¹¹ E kindeno jo-Yahudi duto mane ni e piny Moab gi piny Amon gi piny Edom kod pinje mamoko nowinjo ni ruodh Babulon oseyie ni jo-Yahudi moko mondo odag adaga e piny Juda. Bende ne giwinjo ni oseketo Gedalia mondo obed jatendgi.

¹² Mano omiyo jo-Yahudi noa kuonde duto mane oseketgie, mi giduogo e piny Juda. Ne gidhi Mizpa ir Gedalia, kendo ne gichoko divai kod olemo mogundho.

¹³ Bang’e Johanan wuod Karea kod jotend lweny mane pok ochiwore e lwet ruodh Babulon nobiro Mizpa ir Gedalia,

¹⁴ mi giwachone niya, “Donge ing’eyo ni Balis ruodh jo-Amon oseoro Ishmael wuod Nethania mondo obi onegi?” To kata kamano, Gedalia ne ok nyal yie wachno.

¹⁵ Eka Johanan nowachone ling’ling’ niya, “We mondo adhi aneg Ishmael, kendo onge ng’ama biro ng’eyo ni an ema anege. Ere gima omiyo diwe mondo onegi, to mano nyalo miyo jo-Yahudi duto moseduogo iri ke, mi ji duto modong’ e Juda rum?”

¹⁶ To Gedalia nodwoke niya, “Kik itim kamano, nikech gima uwacho kuom Ishmael en mana miriambo.”