Jeremia 37 - MUMA MALER 2015

Otue Jeremia

¹ Nebukadnezar ruodh Babulon noketo Zedekia wuod Josia ruodh Juda kar Jekonia wuod Jehoyakim.

² To ruoth Zedekia kata jotelo mage kata mana joge ne ok odewo weche mane Ruoth Nyasaye onyiso Jeremia janabi mondo owachi.

³ Ruoth Zedekia nooro Jehukal wuod Shelemia kod Zefania wuod Maaseya ma jodolo ir Jeremia mondo giwachne niya, “Yie ilamnwa Ruoth Nyasachwa.”

⁴ E ndalono noyudo ka pok otue Jeremia, kendo ne pod odak adaka gi ji kapod en thuolo.

⁵ E kindeni jolweny mag Farao nowuok Misri, kendo kane jo-Babulon mane oyudo monjo Jerusalem owinjo kamano, ne giweyo monjo Jerusalem.

⁶ Eka Ruoth Nyasaye ma Nyasach Israel nowacho ni Jeremia janabi,

⁷ “Ruodh Juda osekwayi mondo ipenjne wach kuoma. Nyise ni jolweny mag Farao ma osebiro mondo okonye biro dok thurgi Misri.

⁸ Bang’e jo-Babulon biro duogo, mi gimonj Jerusalem, kendo gikawe mi giwang’.

⁹ An Ruoth Nyasaye anyisou ni kik uwuondru ka ugalo ni jo-Babulon ok nochak oduogi, nikech adier, gibiro duogo.

¹⁰ To kata kapo ni uloyo jolweny duto mag Babulon ma monjougo, mi odong’ mana joma ohinyore ma nindo aninda, e hembegi, to joma ohinyorego pod dia malo, mi wang’ Jerusalem pep.”

¹¹ Kane jolweny mag Babulon oweyo monjo Jerusalem, nimar jolweny mag Farao ne biro,

¹² Jeremia notemo wuok Jerusalem mondo odhi e piny Benjamin opognee mwandu mag joodgi.

¹³ To kane ochopo e dhorangach miluongo ni Ranga Benjamin, jatend jolweny mane tiyo kanyo, ma nyinge Irija wuod Shelemia ma nyakwar Hanania, nochunge, mi owachone niya, “Iringo idok ni jo-Babulon!”

¹⁴ Jeremia to nodwoke ni, “Ooyo, ok adognigi.” To Irija ne ok nyal winjo wachne, omiyo ne omake mi otere e nyim jodongo.

¹⁵ Kane jodongogo oneno Jeremia, ne gikecho kode ahinya, mi gigolo chik mondo ochwade, kendo olorne e od Jonathan ma jang’ad ni ruoth rieko. (Od Jonathanno ne koro olok od tuech.)

¹⁶ Ne giketo Jeremia e od tuech manie bwo lowo, mi odak kuno aming’a,

Ruoth Zedekia owuoyo gi Jeremia

¹⁷ Ruoth Zedekia nogolo chik moter Jeremia ire, kendo kane Jeremia obiro, nopenje ling’ling’ niya, “Bende Ruoth Nyasaye osewachoe wach moro?” Jeremia nodwoke niya, “Ee, osewacho wach moro!” Eka nodhi nyime kowachone ni ruodh Babulon biro make.

¹⁸ Bang’ mano Jeremia nopenjo Zedekia niya, “Ere gima asekethoni kata ni jodongi kata ni jogi momiyo iketa e tuech?

¹⁹ Tinde ere jonabi magi mane onyis ni ruodh Babulon ok bi monjo pinyni?

²⁰ Omiyo jaduong’, akwayi ni ichik iti, kendo itim gima awacho. Kiyie, to kik idwoka e od Jonathan ma jang’adni rieko, nimar ka idwoka, to en adier ni abiro tho kuno.”

²¹ Omiyo ruoth Zedekia nogolo chik mondo otue Jeremia e laru mar od jorit. Ne imiye makati achiel odiechieng’ kodiechieng’ mogol kuom jolos makati, nyaka makati duto norumo Jerusalem. Kamano Jeremia nosiko asika kotue e laruno.