Jeremia 34 - MUMA MALER 2015

Jeremia osiemo ruoth Zedekia

¹ Ruoth Nyasaye ma Nyasach Israel nowuoyo gi Jeremia kane oyudo Nebukadnezar ruodh Babulon gi ogandane mar lweny kod jolweny mag ogendini mamoko, kaachiel gi mag pinje duto mane ni e bwo lochne omonjo Jerusalem kod mier mokiewo kode.

² Nowachone mondo odhi onyis Zedekia ruodh Juda niya, “An Ruoth Nyasaye, abiro chiwo dalani e lwet ruodh Babulon, mi nowang’e pep.

³ In ok nitony, to ibiro maki mi teri ire. Ubiro nenoru kode wang’ gi wang’, mi uwuo kode dhok gi dhok. Bang’e inidhi Babulon.

⁴ Omiyo ruoth Zedekia, winji, gima an Ruoth Nyasaye awacho kuomi. Ok nonegi e lweny,

⁵ to initho gi kue, mi ji nowang’ni gik mang’ue ng’ar kiyiki, mana kaka ne giwang’o ni kwereni mane okwongoni bedo ruodh. Giniywagi ka giwacho niya, ‘A yaye!’ Ruodhwa otho! An Ruoth Nyasaye ema awacho kamano.”

⁶ Bang’e Jeremia janabi noluwo wechego duto ni Zedekia ruodh Juda, mane ni Jerusalem.

⁷ E kindeno jolweny mag ruodh Babulon noyudo monjo Jerusalem, kaachiel gi Lakish kod Azeka. Mier ariyogo kende e miech Juda mochiel motegno mane pok okaw.

Jo-Juda oketho singruok mane gitimo gi wasumbgi

⁸ Ruoth Nyasaye nowuoyo gi Jeremia, kane ruoth Zedekia osetimo winjruok gi jo-Jerusalem mondo ogony wasumbni maggi odhi.

⁹ Noyudo ji duto osewinjore ni ng’ato ka ng’ato biro gonyo wasumbni mage ma jo-Hibrania machwo gi mamon mondo ng’ato kik bed gi ja-Yahudi matiyone ka misumba.

¹⁰ Kane ji duto kaachiel gi jotendgi osetimo singruok ni gibiro gonyo wasumbgi kamano kendo ni ok ginichak gilokgi wasumbni, ne gichopo singruokno, mi giweyo wasumbgi odhi.

¹¹ To achien ne giloko parogi mi gikawo mon gi chwo mane gisegonyo, mi gichako gidwoko e tich wasumbni.

¹² Kindeno ema Ruoth Nyasaye

¹³ ma Nyasach Israel nowachoe ni Jeremia niya, “Ne atimo singruok gi kwereni kane aresogi mi agologi Misri e tich wasumbni. Ne awachonigi niya,

¹⁴ ‘Higni abiriyo ka higni abiriyo onego ng’ato ka ng’ato kuomu owe ja-Hibrania moro amora mane ong’iewo ka misumba, kendo mosetiyone kuom higni auchiel.’ To kwereu ne ok nyal winja, kata rito chikna ne ok girito.

¹⁵ Un to yande uloko parou, mi utimo gima ahero. Uduto ne uyie gonyo jo-Hibrania weteu, mi utimo singruok e nyima ei Hekalu miluongo gi nyinga.

¹⁶ To bang’e ne uchako uloko parou, mi ukwedo nyinga. Uduto ne uchako ukawo wasumbni kendo.

¹⁷ Kuom mano, an Ruoth Nyasaye awacho ni ne achikou mondo uwe jo-Hibrania weteu thuolo, to ok userito chiknano, emomiyo abiro weyou thuolo, to mana ni mondo lweny gi tuoche kod kech onegu! Abiro miyo ogendini duto manie piny bed maluor konenou. An Ruoth Nyasaye ema awacho kamano.

^18-19 Jotend Juda gi mag Jerusalem kod jodong od ruoth gi jodolo kod jopinyni duto notimo koda singruok ka gikadho e kind kidienje ariyo mag rwath mong’adi sirunda. To ne giketho singruok mane gisetimo e nyima, mi ok gichopo singruokno. Omiyo abiro timo ni jogi mana gima ne atimo ni rwath

²⁰ Abiro chiwogi e lwet wasikgi ma dwaro negogi, kendo ringregi winy gi le ema biro chamo.

²¹ Bende abiro chiwo Zedekia ruodh Juda gi jodonge e lwet joma dwaro negogi, kendo abiro ketogi e lwet jolweny mag ruodh Babulon ma koro oseweyo monjou.

²² Adier, abiro golo chik, mi jo-Babulon-go biro duogo monjo dalani mi gikaw, kendo giwang’ pep. Abiro ketho miech Juda, mi lokre thim maonge ng’ama dakie. An Ruoth Nyasaye ema awacho kamano.”