Jeremia 33 - MUMA MALER 2015

Jerusalem ibiro guedho kendo

¹ Ruoth Nyasaye ne ochako owuoyo gi Jeremia, kane Jeremia pod otue e laru mar od jorit.

² Nowachone kama: “An Ruoth Nyasaye mane ochueyo piny, mi oloso kendo oguro motegno, nyinga en Ruoth Nyasaye.

³ In Jeremia awachoni niya, ‘Luonga, to abiro dwoki, kendo ananyisi gik madongo kendo malich ma ok ing’eyo.’

⁴ An Ruoth Nyasaye ma Nyasach Israel, awacho ni ut Jerusalem kod od ruodh Juda ibiro muki. Onge tiende wuok mondo utem muko pidhe mag lowo ma jo-Babulon osedhuro mondo giidhi ka gimonjo dala,

⁵ nikech mano biro mana miyo dala pong’ gi ringre ji ma abiro nego ka an gi mirima mager. Asejwang’o dalani nikech timbe maricho ma joma odakie osetimo.

⁶ To kata kamano, abiro change, mi odok mangima. Bende abiro chango joma odakie mi amigi mor kod kue.

⁷ Abiro miyo jo-Juda gi jo-Israel dhi nyime maber, kendo anachak agergi, mi gibed mana kaka ne gin chon.

⁸ Abiro pwodhogi kuom richogi duto, kendo abiro weyonigi timbe maricho ma gisetimo e nyima ka gitamore mako chikna.

⁹ Jerusalem nobed kama miya mor, kendo makelona pak gi duong’, mi ogendini duto mae piny nobed maluor kendo makirni ka giwinjo gik moko duto mabeyo ma atimo ni jo-Jerusalem, kod dongruok maber ma akelo ni dalani.”

¹⁰ Ruoth Nyasaye nowacho niya, “Ji wacho ni kaeri chalo gi thim, kendo onge ji kata jamni modakie. En adier ni miech Juda kod yore mag Jerusalem odong’ nono, kendo onge ji kata jamni mantie.

¹¹ To ubiro chako winjo mor gi ilo kuondego. Dwond mon ma miehni gi chwogi bende nowinji. Unuwinj ka ji wer ka gikelo chiwo mag erokamano e Hekalu mara niya, ‘Gouru erokamano ni Ruoth Nyasaye Manyalo Gik Moko Duto, nikech ong’won kendo herane osiko.’ Abiro miyo pinyni bed maber mana kaka ne ochalo chon. An Ruoth Nyasaye ema awacho kamano.”

¹² Ruoth Nyasaye Manyalo Gik Moko Duto nowacho niya, “E piny ma koro chalo thim, maonge ji ma odakieni, chieng’ moro lege nochak obedie ma jokwath nyalo kwayoe jambgi.

¹³ Jokwath nochak okwan jambgi e mier manie piny gode gi manie tiend gode kod manie piny milambo gi manie piny Benjamin kod manie mier matindo molworo Jerusalem kendo e miech Juda. An Ruoth Nyasaye ema awacho kamano.”

¹⁴ Ruoth Nyasaye nowacho niya, “Kinde biro ma anachopie singruok mane atimo ni jo-Israel gi jo-Juda ni anaguedhgi.

¹⁵ E kindeno anakel nyakwar Daudi hie, mi enotim gik malong’o kendo makare.

¹⁶ E ndalogo nores jo-Juda, kendo jo-Jerusalem nodag gi kue. Omiyo ginichak dalagi ni, ‘Ruoth Nyasaye moresowa.’

¹⁷ An Ruoth Nyasaye asingora ni e kinde duto nobedie nyakwar Daudi ka ruodh Israel,

¹⁸ kendo pile nobedie jodolo ma jo-Lawi ka tiyo e nyima, kendo kachiwo misengni miwang’o pep gi mag mogo kaachiel gi misengni mamoko.”

¹⁹ Ruoth Nyasaye nowacho ni Jeremia niya,

²⁰ “Kapo ni chike ma aritogo odiechieng’ gotieno nyalo kethore, mi ok giluwore kaka pile,

²¹ to kara singruok mane atimo gi Daudi jatichna ni kinde duto nyakware ema nobed ruoth, bende nyalo kethore, kendo singruok mane atimo gi jodolo ma jo-Lawi ma tiyona bende dikethre.

²² Abiro miyo nyikwa Daudi jatichna kod jodolo ma jo-Lawi ma tiyona nya, mondo gibed mang’eny ma ok nyal kwan, mana ka sulue manie polo kata ka kuoyo mae dhonam.”

²³ Ruoth Nyasaye nowacho ni Jeremia niya,

²⁴ “Donge isewinjo ka ji wacho ni aseweyo jo-Israel gi jo-Juda, ma gin dhoudi ariyo mane ayiero? Kuom mano koro gicharo joga, kendo ok gikwan-gi ka joma nigi pinygi.

²⁵ To an Ruoth Nyasaye awacho ni, kapo ni anyalo ketho chike ma aritogo odiechieng’ gotieno kod polo gi piny,

²⁶ to eka anyalo ketho singruok mane atimo gi nyikwa Jakobo kendo gi Daudi jatichna, ni anaket nyakwar Daudi moro obed ruodh nyikwa Ibrahim gi Isaka kod Jakobo. Adier, abiro timonigi ng’wono mi gichak gidhi nyime maber.”