Jeremia 31 - MUMA MALER 2015

Singruok manyien

¹ Ruoth Nyasaye wacho niya, “Ndalo biro ma anabedie Nyasach dhout Israel duto, kendo ginibed joga.

² “Ne atimo ng’wono e thim ni joma ne otony ma ok otho e lweny. Jo-Israel ne gombo yudo yueyo,

³ omiyo ne athinyoranigi gi kuma bor. Kinde duto asebedo ka aherou, un jo-Israel, kendo pod asiko ka aherou mochwere.

⁴ Jo-Israel, abiro chako gerou, kendo ubiro tueyo gara, mi umiel gi ilo.

⁵ Unuchak upidh mzabibu e gode mag Samaria, kendo joma opidhogi nocham olemo ma ginyago.

⁶ Adier, kinde biro ma jorito noluong ji gie gode mag Efraim niya, ‘Biuru wadhi Sayun ir Ruoth Nyasachwa!’

⁷ “An Ruoth Nyasaye awacho kama: Weruru gi ilo nikech mor ma jo-Israel nigo. En oganda maduong’ie moloyo. Weruru wendeu mag pak, kuwacho niya, ‘Ruoth Nyasaye osekonyo joge. Osereso jo-Israel duto modong’.’

⁸ Abiro kelogi kagologi yo nyandwat, kendo abiro chokogi kagologi e tung’ piny koni gi koni, kaachiel gi muofni gi rang’onde mi mon mayach kendo ma muoch kayo, mi giniduogi, ka gin oganda maduong’.

⁹ Joga noduog kaywak, to anakue chunygi ka atelonigi e yo. Anatergi e aore mabeyo mamol, kendo ok ginichwanyre nimar giniwuoth e yo maber. An wuon jo-Israel, kendo Efraim e wuoda makayo.

¹⁰ “Un ogendini, winjuru, an Ruoth Nyasaye, mondo uland wachna e pinje man loka nam. An ema ne akeyo jo-Israel, to koro abiro chako chokogi, mi aritgi kaka jakwath rito jambe.

¹¹ Asegolo jo-Israel e tuech, ka aresogi e lwet wasigu mane oloyogi gi teko.

¹² Gibiro duogo, mi giwer gi ilo e got Sayun, ka gimor gi gik ma achiwonigi, kaka cham gi divai gi mo kod jamni. Ginichal gi puodho ma koth oromo, mi ok ginichak gichand gimoro kendo.

¹³ Bang’e nyiri nomiel kendo nobed mamor, kendo yawuowi gi joma dongo bende nobed mail. Anakue chunygi kendo nalok lit ma gin go obed mor, kendo kuyo ma gin go obed ilo.

¹⁴ Abiro miyo jodolo gundh gi chiemo mabeyo moloyo, kendo joga noyud gik moko duto ma gichando. An Ruoth Nyasaye ema awacho kamano.”

¹⁵ Ruoth Nyasaye wacho niya, “Dwol winjore e dala mar Rama, en nduru gi ywak malit, Rahel ywago nyithinde, kendo ok onyal hore nikech gisetho giduto.

¹⁶ Ling’ iwe ywak, kendo ywe pi wang’i, nimar niyud pok nikech gik misetimo ni nyithindi. Gibiro duogo ka gia e piny wasigu. An Ruoth Nyasaye ema awacho kamano.

¹⁷ “Iniwe nyikwayi bang’ thoni, nimar nyithindi biro duogo dala.

¹⁸ “Awinjo jo-Israel ka ywagore niya, ‘A Ruoth Nyasaye ne wachalo gi ruedhi masilwende ma ok obo, to ne iboyowa, mi wapie. Dwogwa, to wabiro dwogo nikech in Ruoth Nyasachwa.

¹⁹ Kata obedo ni ne wabaro mi waweyi, to piyopiyo nono ne wadwaro duogo. Kane isekumowa, to ne wakulo wiwa kwakuyo. Wiwa ne okuot ka chunywa lit, nikech richo mane watimo kapod wayom.’

²⁰ To an Ruoth Nyasaye awacho kama: In Israel in e wuoda mahero moloyo. E sa asaya ma aluongoe nyingi, to apari gi hera. Chunya oheri, omiyo abiro kechi.

²¹ Un jo-Israel, keturu ranyisi ma nyiso wang’ yo, mondo yo ma onego uluw kik ruenyu, to uduog e miechu mane uweyo.

²² Ubiro digni kamano nyaka karang’o, un joma andhokegi? An Ruoth Nyasaye asechueyo gimoro ma hono: asemiyo dhako odoko maratego mana ka dichwo!”

²³ Ruoth Nyasaye ma Nyasach Israel wacho niya, “Ka asedwoko jo-Israel e pinygi, to ginichak giwach e piny Juda gi mier mage kama: ‘Mad Ruoth Nyasaye guedh got maler mar Jerusalem ma en kama ler modakie.’

²⁴ “Ji biro dak e piny Juda, kendo e mier mage duto. Bende nobedie jopur, kod jokwath gi jambgi.

²⁵ Anaduog chuny joma ool, kendo ng’ato ang’ata ma kech ohewo anami chiemo.

²⁶ Kuom mano ji nowach niya, ‘Nindo noterowa, to ka ne wachiew ne wanwang’o ka chunywa oduogo.’

Singruok manyien ma Nyasaye notim gi joge

²⁷ “An Ruoth Nyasaye awacho ni kinde biro ma ji gi jamni nonya mang’eny e piny Israel gi Juda.

²⁸ Kaka ne aketo chunya mondo apudhgi, kendo agogi piny, kendo akethgi, e kaka abiro keto chunya mondo apidhgi kendo agergi.

²⁹ Ka ndalono ochopo, to ji ok nochak owach niya, ‘Wuone ne ochamo olembe manumu, to nyithindo ema dhogi rewore.’

³⁰ To koro ng’ama ochamo olemo manumu, dhoge norewre mana en owuon, tiende ni ng’ato ka ng’ato notho mana nikech richone owuon.”

³¹ Ruoth Nyasaye wacho niya, “Ndalo biro ma anatimie singruok manyien gi dhood Israel kod dhood Juda.

³² Ok nochal gi singruok mane atimo gi kweregi kane atayogi kagologi e piny Misri, nimar ne giketho singruok mane atimo kodgi kata obedo ni ne an ruodhgi.

³³ Singruok ma anatim gi dhood Israel bang’ ndalogo ema: Anaket chiekena e parogi, kendo anandikgi e chunygi. Anabed Nyasachgi, mi ginibed jogaa.

³⁴ Onge ng’ama nopuonj wadgi kata ma nopuonj omin mare, kawachone ni, ‘Ng’e Ruoth Nyasaye,’ nikechh giduto gining’eya, chakre ng’at matinie moloyo nyaka ng’at maduong’ie moloyo. Anawenigi richogi, kendo ok nachak apar timbe maricho mane gisetimo. An Ruoth Nyasaye ema awacho kamano.”

³⁵ Ruoth Nyasaye ema miyo chieng’ rieny godiechieng’, kendo omiyo due gi sulue rieny gotieno. En ema otago pi nam, kendo omiyo apaka wuo. Nyinge en Ruoth Nyasaye Manyalo Gik Moko Duto.

³⁶ Osingore ni Israel nobed oganda kinde duto nyaka giko piny.

³⁷ Ka da bed ni polo inyalo pimo, kata mise mag piny inyalo nono maber, to eka Ruoth Nyasaye dijwang’ jo-Israel nikech gik maricho ma gisetimo.

³⁸ Ruoth Nyasaye wacho niya, “Ndalo biro ma nochak ogerie dalani, chakre kama oger mabor mar ng’icho mar Hananel kochiko yo podho chieng’, nyaka rangach man kama ohinga gomogo.

³⁹ Tong’ne nodhi koa kanyo kochomo yo podho chieng’, nyaka got Gareb, mi olwor nyaka Goah.

⁴⁰ To holo duto kama owitie ringre joma otho, kendo owitie yugi, nobed kama ler moyangna, kaachiel gi pewe duto manie geng aora Kidron nyaka ranga Farese, koma ochomo yo wuok chieng’. Dala Jerusalem ok nochak omuki, bende ok nochak okethe.”