Jeremia 30 - MUMA MALER 2015

Ruoth Nyasaye osingore ni jo-Juda mane oter e tuech biro duogo

¹ Ruoth Nyasaye ma Nyasach Israel nowacho ni Jeremia niya,

² “Ndik weche duto ma asewachoni e kitabu,

³ nimar ndalo biro ma anaduogie joga ma jo-Israel gi jo-Juda. Anadwokgi e piny mane amiyo kweregi, mi gidagie kendo.”

⁴ Ruoth Nyasaye wuoyo kuom jo-Israel gi jo-Juda kama:

⁵ “Asewinjo ywak mar kihondko ma onge kue.

⁶ Koro ling’uru mondo upar ane. Bende dichwo dinywol nyathi? Ere gima omiyo ji duto kirni?

⁷ Odiechieng’ marach biro, kendo onge odiechieng’ machal kode. En chieng’ marach ni nyikwa Jakobo. To kata kamano, gibiro tony.”

⁸ Ruoth Nyasaye Manyalo Gik Moko Duto wacho niya, “Chieng’no anang’ad jok manie ng’utgi, kendo anatur ratege motuegigo, mi ok ginichak gibed wasumb jopinje mamoko

⁹ To ginitina, an Ruoth Nyasaye ma Nyasachgi, kendo giniti ni Daudi ma abiro keto mondo obed ruodhgi.

¹⁰ “Un nyikwa Jakobo jatichna, kik ubed maluor. Ee, un jo-Israel, kik chunyu parre, nikech abiro resou mi agolu e piny mabor motueueno. Nyikwa Jakobo noduogi kendo ginidag gi kue, maonge ng’ama bwogogi. An Ruoth Nyasaye ema awacho kamano.

¹¹ “Abiro bet kodu mondo aritu, mi atiek ogendini duto kuonde ma asekonyoue, to un ok natieku. Kata kamano ok nawe mak akumou, to ok nakumu gi gero.”

¹² Ruoth Nyasaye wacho ni joge niya, “Adhondeu ok nyal chango, nikech nuhinyoru marach,

¹³ onge ng’ama nyalo ritou, kendo adhondeu ok thiedhre, omiyo ok unyal chango.

¹⁴ Osiepeu duto oseweyou, kendo tinde ok gidewu. Asemonjou mana ka jasigu, kendo useyudo kum mager nikech richou mang’eny, bende nikech timbeu maricho lich.

¹⁵ Ere gimomiyo uywagoru ni rem ma un-go, to ok unyal chango. Asekumou kamano nikech richou ng’eny, kendo nikech timbeu maricho lich.

¹⁶ Ji duto matiekou bende notieki, kendo wasiku noter mabor e tuech. Ji duto mathirou bende nothir, kendo joma yakou bende noyaki.

¹⁷ Kata obedo ni wasiku wacho niya, ‘Sayun osejwang’ kendo onge ng’ama dewe,’ to anami uchak ubed mangima, kendo anachang adhondeu.”

¹⁸ Ruoth Nyasaye wacho niya, “Abiro dwoko nyikwa Jakobo e pinygi, mi aguedh ng’ato ka ng’ato e ode. Dala ka dala nochak oger mana kama ne entie, kendo ot ka ot ji nodagie mana kaka nodakie chon.

¹⁹ Ji modak kuondego nower wende pak, kendo ginikogi gi ilo. Anami ginya mathoth, ma ok gidok chien, kendo anami giyud pak, ma onge ng’ama chayogi.

²⁰ Abiro dwokonigi tekogi machon, mi achak agur ogandagi motegno, to anakum ji duto mathirogi.

²¹ Ruodhgi nobed mana ng’atgi giwegi. Ee, jatendgi nowuog mana kuomgi. Ka aluonge, to nobi buta machiegni, nikech onge ng’ama dihedhre sudo machiegni ka ok aluonge.

²² Kamano unubed joga kendo anabed Nyasachu. An Ruoth Nyasaye ema awacho kamano.

²³ “Mirimba chalo gi ahiti maduong’ ma biro uko joricho.

²⁴ Ok obi rumo kapok otieko timo gik ma adwaro timo. E ndalo mabiro, ubiro ng’eyo wechegi malong’o.