Jeremia 27 - MUMA MALER 2015

Jeremia orwako jok e ng’ute

¹ Kane Zedekia wuod Josia odoko ruodh Juda, Ruoth Nyasaye nowacho ni Jeremia niya,

² “Kaw yien kod pien molir, ilosgo jok mondo irwak e ng’uti.

³ Bang’e inyis joote moa kuom ruodhi mag Edom gi mag Moab gi mag Amon gi mag Turo kod mag Sidon mosebiro Jerusalem neno Ruoth Zedekia,

⁴ mondo onyis ruodhigigo ni an Ruoth Nyasaye Manyalo Gik Moko Duto, kendo ma Nyasach Israel

⁵ ema nachueyo piny gi tekona maduong’, kendo nachueyo dhano gi le duto modakie, omiyo anyalo kete e teko ng’ato ang’ata ma ayiero.

⁶ Kamano an ema aseketo ogendinigi e teko jatichna Nebukadnezar ruodh Babulon, bende asemiyo koda ka le tiyone.

⁷ Ogendini duto notine, kendo giniti ni wuode kod nyakware bende, nyaka chop kinde ma ogandane owuon nopodhie. Bang’e ogandane noti ni ogendini marateke kod ruodhi madongo.

⁸ “To ka oganda moro otamore tiyo ni Nebukadnezar ruodh Babulon, kata rwako jokne, to lweny gi kech kod tuoche ema nakumgo ogandano nyaka chop ami obed e teko mar Nebukadnezar. An Ruoth Nyasaye ema awacho kamano.

⁹ Kik uchik itu kuom jonabi kata kuom ng’ato ang’ata mawacho ni nyalo koro gik ma biro timore e yor lek kata e yor luongo chuny joma osetho, kata e yor mbofwa. Jogo duto koronu wach ni ok unubed e bwo loch ruodh Babulon,

¹⁰ to giwuondou, kendo gibiro miyo teru mabor gi pinyu. Anariembu oko, mi urum pep.

¹¹ To ka oganda moro oyie tiyo ni ruodh Babulon, kendo rwako jokne, to anaweye obed e pinye, mi opure kendo odagie. An Ruoth Nyasaye ema awacho kamano.”

¹² Jeremia nonyiso Zedekia ruodh Juda wechego, kowacho niya, “Ka uyie rwako jok mar ruodh Babulon mi utiyone kendo utiyo ni joge, eka unures ngimau.

¹³ Ere gimomiyo in kod jogi duto, to Nyasaye osewacho ni lweny kata kech kata tuo biro nego oganda moro amora ma ok ti ni ruodh Babulon?

¹⁴ Kik udew weche jonabi ma kwerou ni kik uti ni ruodh Babulon, nimar giwuondou.

¹⁵ Ruoth Nyasaye owuon osewacho ni ne ok oorogi, to giwuondou awuonda e nyinge. Mano emomiyo noriembu, mi negu duto, kaachiel gi jonabi ma wachonu miriambogo.”

¹⁶ Bang’e Jeremia nonyiso jodolo kod ji duto ni Ruoth Nyasaye osewacho niya, “Kik uwinj weche mag jonabi mawacho ni bang’ kinde matin ibiro dwok gik lemo mag Hekalu mane oter Babulon. Giwuondou awuonda!

¹⁷ Emomiyo kik uwinj wachgi, to tiuru atiya ni ruodh Babulon, eka unures ngimau. Ere gima omiyo dalani dilokre gunda?

¹⁸ Ka gin jonabi adier, kendo ka gin gi wachna, to onego gikwaya, an Ruoth Nyasaye Manyalo Gik Moko Duto, mondo kik ayie gik lemo modong’ Jerusalem e Hekalu kendo e od ruoth, ter Babulon!

¹⁹ Winjuru gima an Ruoth Nyasaye awacho kuom sirni mag Hekalu gi karaya maduong’ gi rachungi kod gik lemo mamoko mag Hekalu mane ruoth Nebukadnezar oweyo

²⁰ kane omako Jekonia wuod Jehoyakim ruodh Juda motero Babulon kaachiel gi jodong Juda gi Jerusalem.

²¹ An Ruoth Nyasaye Manyalo Gik Moko Duto kendo ma Nyasach Israel awacho ni gik mane owe Jerusalem e Hekalu kendo e od ruoth,

²² ibiro tero Babulon, mi bed kuno nyaka chop apargi kendo. Bang’e anaduoggi, mi aketgi kaeri. An Ruoth Nyasaye ema awacho kamano.”