Jeremia 26 - MUMA MALER 2015

Osiem Jeremia gi tho

¹ Kane Jehoyakim wuod Josia odoko ruodh Juda,

² Ruoth Nyasaye nowacho ni Jeremia niya, “Dhiyo ichung’ e laru mar Hekalu mondo inyis joma odak e miech Juda ma biro lemo e Hekalu weche ma asenyisi. Kik iwe kata wach achiel mak inyisogi.

³ Kamoro dipo ka ji owinjo wechego, mi ng’ato ka ng’ato oweyo timbene maricho. Ka giweyo timbegi maricho kamano, to analok parona kuom masira mane adwaro kelo kuomgi.

⁴ “Iniwachnigi ni, An Ruoth Nyasaye asewacho ni nyaka uluora, kuluwo chike mane anyisou.

⁵ Asetimo kinda ka aoro jotichna ma jonabi mondo owachnu wechena, to ok usedewo gik ma giwacho.

⁶ Ka ok uwinjogi, kendo ka pod utamoru timo gik ma awacho, to abiro ketho Hekaluni mana kaka naketho Shilo, kendo ogendini duto noluong nying dalani ka gima okuong’.”

⁷ Jodolo gi jonabi kod ji duto nowinjo ka Jeremia hulo wechego e Hekalu,

⁸ kendo kane otieko wacho gik moko duto mane Ruoth Nyasaye ochike mondo owachi, jodolo gi jonabi kod ji duto nomake, ka kok niya, “Owinjore negi kuom wach ma kama!

⁹ Ere gima omiyo ikoro wach e nying Ruoth Nyasaye ni Hekalu biro chalo gi Shilo, kendo ni dalani ibiro kethi, ma onge ng’ama nodagie?” Gikanyono ji nochokore mang’eny, molworo Jeremia ei Hekalu.

¹⁰ Kane jodong Juda owinjo wachno, ne giwuok e od ruoth, mi gidhi gibet e dhoranga Hekalu miluongo ni Rangach Manyien.

¹¹ Eka jodolo gi jonabi nonyiso jodongo kaachiel gi ji duto niya, “Owinjore ng’ad ni ng’atni buch tho, nikech osewuoyo marach kuom dalawa. Donge usewinje gi itu, kowuoyo?”

¹² Bang’ mano, Jeremia nowacho ni jodongo gi ji niya, “Ruoth Nyasaye ema oseora mondo ahul weche duto ma usewinjo ka awacho kuom Hekaluni kendo kuom dalani.

¹³ Nyaka ulok yoreu gi timbeu, kendo nyaka uluor Ruoth Nyasaye ma Nyasachu. Eka onyalo loko parone kuom masira ma osewacho ni obiro kelo kuomu.

¹⁴ An to an e tekou. Timnauru gimoro amora muparo ni ber kendo kare.

¹⁵ To nyaka ung’e ni ka unega, to un gi ji duto modak e dalani unubed joketho kuom nego ng’at ma onge ketho, nimar Ruoth Nyasaye ema oseora mondo anyisu wechego duto.”

¹⁶ Kane jodongo gi ji duto owinjo wechego, ne giwacho ni jodolo gi jonabi niya, “Ng’atni ok owinjore ng’adne buch tho, nikech osewuoyo mana kodwa e nying Ruoth Nyasaye ma Nyasachwa.”

¹⁷ Bang’e jodongo moko nochung’’ monyiso ji mane ochokore kanyo niya,

¹⁸ “E ndalo loch Hezekia ruodh Juda, Mika janabi ma ja-Meresheth nonyiso jo-Juda duto ni Ruoth Nyasaye Manyalo Gik Moko Duto owacho kama: ‘Sayun ibiro pur oko ka puodho. Jerusalem biro lokore pidhe mag lwendni, kendo got mogerie Hekalu nolokre bungu.’

¹⁹ To uparo ni ruoth Hezekia kod joge nonego Mika koso? Ooyo ne ok ginege, to Hezekia noluoro Ruoth Nyasaye, mi otemo kueyo mirimb Nyasaye. Kuom mano Ruoth Nyasaye noloko parone kuom masira mane osewacho ni obiro kelo kuomgi. To wan to koro ere gima omiyo wadwaro kelo masira malich kuomwa?”

²⁰ (Ne nitie ng’at moro machielo miluongo ni Uria wuod Shemaya ma ja-Kiriath-jearim. En bende ne owuoyo e nying Ruoth Nyasaye kuom dalani kendo kuom ogandani, mana kaka Jeremia osewuoyo.

²¹ To kane ruoth Jehoyakim kod jotend jolwenje gi jodonge owinjo gima ne Uria owachono, notemo nege. To Uria nowinjo wachno, mi luoro nomake moringo odhi Misri.

²² Kata kamano, Ruoth Jehoyakim nooro Elnathan wuod Akbor kod jomoko e piny Misri mondo oom Uria.

²³ Omiyo ne gigole kuno, mi gidwoke ni ruoth Jehoyakim, monege, kendo ne owit ringre e bur mane iyikoe ji ajiya.)

²⁴ Jeremia to notony, mi ok ochiw e lwet ji mondo onege, mana nikech Ahikam wuod Shafan nokonye.