Jeremia 22 - MUMA MALER 2015

¹ Ruoth Nyasaye nowacho niya, “Dhiyo e od ruodh Juda ma nyakwar Daudi,

² mondo iwachne, kaachiel gi jodonge kod joge madonjo e dhorangeyegi, ni Ruoth Nyasaye owacho kama:

³ An Ruoth Nyasaye awachonu ni mondo utim gik makare kendo madier. Konyuru ng’at ma ithiro e lwet joma thire. Kik usand kata kik uthir jodak gi nyithi kiye kod mond liete, bende kik uneg joma onge ketho kama oyangnani.

⁴ Ka utimo kaka awachono to nyikwa Daudi nodhi mana nyime ka bedo ruodhi, kendo gin kaachiel gi jodonggi kod jogi gibiro siko ka gidonjo e dhoranga od ruoth, ka giidho geche mag lweny kod farese.

⁵ To ka ok urito wechego, to akuong’oranu ni od ruodhuni biro lokore gunda. An Ruoth Nyasaye ema awacho kamano.

⁶ “Od ruodh Juda berna mana ka piny Gilead, kendo ka got Lebanon, to kata kamano abiro loke thim, kama onge ng’at madakie.

⁷ Abiro oro ji mondo okethe. Giduto gibiro biro gi ledhi, mi ging’ad yiend sida duto mabeyo mogerego, mi giwiti e mach.

⁸ Bang’e achien, jopinje mamoko nobed ka kadho kanyo, kendo ginipenjre kendgi ni, ‘Ere gimomiyo Ruoth Nyasaye osetimo gima chal kama ni dala maduong’ni?’

⁹ Eka nodwokgi niya, ‘Mano osetimore nikech jogi oseweyo singruok mane Nyasachgi otimo kodgi, mi gilamo nyiseche mamoko kendo gitiyonigi.’

¹⁰ “Jo-Juda, kik uywag ruoth Josia, ma koro osethoni, to ywaguru wuode ma Shalum, nikech osetere e piny moro, kendo ok noduogi, bende ok ochak one piny mane onywolee.

¹¹ To nikech Ruoth Nyasaye osewuoyo kuom Shalum wuod Josia mane obet ruodh Juda kar wuon mare kowacho niya, ‘Osea ka chuth, kendo ok noduogi.

¹² Enotho e piny ma giseteree, kendo ok nochak one pinyni.’

¹³ “En gima lit manadi kuom ng’at ma gero od gorofa e yor miganga kendo ka miyo jowetene tiyo kayiem, to ok migi misara.

¹⁴ En gima lit manadi kuom ng’at mawacho ni obiro gero ot marang’ongo man gi udi madongo malo. Bang’e oketne dirise mi ochwade gi yiend sida, kendo owire gi range maber.

¹⁵ Bende gero ut sida mabeyo moloyo mag jomoko nyalo nyiso ni in ruoth adier? “Wuoru nodak maber. Pile ne en ng’at makare kendo jaadiera, omiyo gik moko duto mane otimo ne odhi maber.

¹⁶ Ne oyalo jochan kare, omiyo gige duto nodhi maber. Gik ma kamago ema nyiso ni ng’ato ong’eyo Ruoth Nyasaye.

¹⁷ In to ineno mana gigi iwuon. Inego joma onge ketho, kendo ithiro jogi gi gero. An Ruoth Nyasaye ema awacho kamano.”

¹⁸ Kuom mano, Ruoth Nyasaye wuoyo kuom Jehoyakim wuod Josia, ma ruodh Juda niya, “Onge ng’ama noywage, kawacho ni, ‘Yaye Ruoth! Thoni lit manadi!’

¹⁹ Noywaye mi wite oko e dhoranga Jerusalem, mana ka punda motho.

²⁰ Un jo-Jerusalem, dhiuru e got Lebanon, mondo ukogi, kendo dhiuru e piny Bashan mondo uywagi. Ywaguru gie gode mag Abarim, nikech joma uriworugo oselo.

²¹ Nawuoyo kodu kapod udhi maber, to ne utamoru winjo. Adier, usiko kutamoru luora chakre tindou.

²² Jotendu, yamo ema biro tero. Joma uriworugo ibiro kawo mi ter e tuech. Bang’e unuyud wichkuot kendo nog’eng’u nikech timbeu maricho.

²³ Un joma odak Lebanon, moloso kuonde dakgi e yiend sida, unuywag manade ka rem malit ka rem mar muoch ochopo kuomu!”

²⁴ Ruoth Nyasaye nowacho ni Jekonia wuod Jehoyakim ma ruodh Juda niya, “An Nyasaye mangima akuong’ora ni kata ka inie tere manie lweta ma korachwich to pod dawuodhi oko,

²⁵ mi achiwi ni joma iluoro madwaro negi, kata mana e lwet Nebukadnezar ruodh Babulon kod joge mag lweny.

²⁶ Abiro witi kaachiel gi meru, e piny moro mane ok onywolue, kendo unutho kuno uduto.

²⁷ Ok unuduog e pinyu muheroni.”

²⁸ Jeremia nowacho niya, “Uparo ni Jekonia en agulu motho, mowit oko, ma ng’ato ok dwar koso? Ka ok kamano, to ere gima omiyo owite kaachiel gi nyithinde e piny ma ok ong’eyo?

²⁹ “Yaye, piny, piny! Winjuru wach Ruoth Nyasaye.

³⁰ Ng’atni okuong’, omiyo enotho maonge nyathi. En ng’at ma ok nyal dhi nyime maber. Nyikwaye ok nobed ruodhi mag Juda ka Daudi. An Ruoth Nyasaye ema awacho kamano.”