Jeremia 2 - MUMA MALER 2015

Ruoth Nyasaye okwayo jo-Juda mondo oduog ire

¹ Ruoth Nyasaye nowachona

² ni mondo adhi ahul wachne ni ji duto modak Jerusalem kama: “Aparo hera mane un-go koda kane pod un oganda mayom, nimar e ndalo mane uluwa e thim, piny motwo ma ok pur, ne uhera mana kaka miaha hero chwore.

³ E ndalogo un jo-Israel nubedo joga awuon, kendo nuchalona mana cham ma okwong dumbo. Nakumo ji duto mane dwaro hinyou, kendo ne akelonigi chandruok. An Ruoth Nyasaye ema awacho kamano.”

⁴ Winjuru wach Ruoth Nyasaye un nyikwa Jakobo ma jo-Israel.

⁵ Ruoth Nyasaye owacho niya, “Ang’o marach mane kwereu oneno kuoma, mane omiyo giweya? Ne gilamo nyiseche manono, mi gin bende gidoko joma nono.

⁶ Ne ok gidewa, kata obedo ni ne aseresogi kagologi e piny Misri, mi atelonigi e thim, piny marach motwo ma masiche ng’enyie. Pinyno otimo gode gi bugni, ma onge ng’ama wuothoe, bende onge ng’ama odakie.

⁷ Ne akelou e piny momew, mondo ucham gik monyakie kod gik mabeyo mantie. To kane udonjo e piny mane amiyouno ne udwanye, mi ukethe.

⁸ Jodolo noweyo penjo kuma Ruoth Nyasaye nitie. Joma ne ong’eyo weche chik bende ne ok odewa, kendo jotelo nobaro moweya. Jonabi bende ne koro wach e nying Baal, kendo ne lamo nyiseche manono.

⁹ “Emomiyo an Ruoth Nyasaye abiro yalo joga kendo. Abiro yalou, kendo abiro yalo nyikwau.

¹⁰ “Koro idhuru yie udhi e chula mar Saipras, kendo uor joote Kedar openjnu wach mondo uwinj ane

¹¹ ka oganda moro oseweyo nyisechegi, moluwo nyiseche mamoko, kata obedo ni ok gin nyiseche madieri kamano? To un joga, useweya, an Nyasachu moseting’ou malo, mi ulamo nyiseche ma ok nyal konyou.

¹² Kuom mano, an Ruoth Nyasaye, agolonu chik un polo mondo uyiengni malich, kuwuoro kendo kudhier nono,

¹³ nikech joga osetimo richo tieng’ ariyo. Gisebaro, mi giweya, an soko mar pi maliw mamol, kendo gisekunyo yewni mabarore, ma ok nyal ting’o pi!

¹⁴ “Jo-Israel ok gin wasumbni, bende ne ok onywolgi wasumbni. Kuom mano, ere gima omiyo wasikgi yakogi?

¹⁵ Wasikgigo rutonigi matek, mana ka sibuoche. Giseketho pinygi, molokore thim. Miechgi bende okethore, maonge ng’ama dagie.

¹⁶ Ee, jo-Memfis gi jo-Tapanes josetoyo pat wi jo-Israel.

¹⁷ Yaye, jo-Israel! Tim ma kamano usekelo mana kuomu uwegi! Ne uweya, an Ruoth Nyasaye ma Nyasachu, kane atelonu e yo.

¹⁸ “Koro ang’o ma uparo ni ubiro yudo kuom dhi Misri? Uparo ni ubiro modho pi aora Nael? Koso ang’o ma uparo ni ubiro yudo kuom dhi Asuria? Uparo ni ubiro modho pi aora Yufrate?

¹⁹ Timbeu uwegi maricho ema biro kelonu kum. Ee, timbe mane uweyago ema biro kelonu bura. Kamano ubiro ng’eyo ni weyo Ruoth Nyasaye ma Nyasachu, kendo chaye en gima lit kendo marach moloyo. An Ruoth Nyasaye ema awacho kamano.

²⁰ Yaye jo-Israel, chon gi lala ne udagi lochna, kendo ne utamoru rito chikna, kuwacho ni ok unutina. To nulemo alema ewi gode maboyo duto, kendo e tiend yien duto motimo otiep, mi udwanyoru ka dhako ma jachode.

²¹ Ne apidhou ka ng’ama pidho mzabibu moyier, mana ka kodhi maberie moloyo, to neyeuru kaka koro uchalo! Uchalo gi mzabibu marach ma ok nyag olemo mabeyo.

²² Kata da bed ni ulwokoru gi pi kendo kod sabun mang’eny, to pod anyalo neno kuonde ma richou otonie. An Ruoth Nyasaye ema awacho kamano.

²³ Ere kaka unyalo wacho ni pok udwanyoru, bende ni pok ulamo Baal? Parieuru kaka ne utimo richo e holo, kendo neyeuru gik ma usetimo. Uchalo ngamia madhako madwaro thuondi, ma tho ringo aringa koni gi koni.

²⁴ To uchalo kanj thim ma ok nyal geng’ kadwaro thuondi. Onge thwon manyalo thagore ka dware, nikech yude yot ka kinde miluwee ochopo.

²⁵ Un jo Israel kik uwe tiendeu dok malit, kata kik uwe dwondu two, kuringo bang’ nyiseche manono. To uwacho niya, ‘Ok wanyal konyo. Wasehero nyiseche mamoko, kendo nyaka waluwgi!’

²⁶ To kaka wi jakuo kuot ka omake, e kaka un jo-Israel wiu nokuodi, kaachiel gi ruodhiu gi jodongu gi jodolo mau kod jonabi mau.

²⁷ Un duto mawacho ni yath ni, ‘In e wuonwa,’ kendo wacho ni kidi ni, ‘In minwa,’ wiu nokuodi. Ne ubaro mi uweya, kendo ne udagi duogo ira, to eka ka masira omakou, to ukwaya mondo abi akonyu!

²⁸ Koro ere nyiseche gogo mane uloso? Ka un e chandruok, to mondo okonyu ane, ka ginyalo konyou! Un jo-Juda, un gi nyiseche mang’eny.

²⁹ An Ruoth Nyasaye apenjou ni, “Ang’o momiyo uywakna, to un ema useng’anyona uduto?

³⁰ Ne anego yawuotu, to mano ne ok opuonjou, bende ne ok unyal yie kethou, to ne unego jonabi mau mana kaka sibuor mager neko.

³¹ “Chikuru itu maber uduto, mondo uwinj gima awachonu, un jo-Israel. Achalonu thim, koso achalonu piny ma masiche ng’enyie, ma ok unyal dak koda maberni? Ka ok kamano, to marang’o uwacho ni ubiro timo mana kaka uhero, kendo ni ok unyal duogo ira, to un joga?

³² Bende wi nyako nyalo wil gi gik ma olichorego? Koso wi miaha nyalo wil gi lawe mar kisera? An to, wi joga osewil koda kuom ndalo mang’eny mokadho akwana.

³³ Un ung’eyo yore muyudogo osiepeu machwo, to bende kata mana mon ma jochode bende nyalo puonjore kuomu.

³⁴ Remb joma odhier, kendo maonge ketho, otonie lepu; gin remb joma ne ok oturo uteu ka kweloe. To kata kamano uwacho niya,

³⁵ ‘Waonge ketho, kendo adier, Ruoth Nyasaye ok okecho kodwa.’ To ng’euru ni an Ruoth Nyasaye abiro kumou kuom wacho ni uonge gi richo kamano.

³⁶ Ere gima omiyo uloko parou ka ok udewo? Jo-Misri mugeno kuomgi ok nokonyu, mana kaka jo-Asuria bende ne ok okonyou.

³⁷ Ubiro a e piny Misri, ka uduto umako wiu nikech wichkuot. An Ruoth Nyasaye asedagi joma ugeno kuomgi, kendo ok ginikonyu ngang’.”