Jeremia 11 - MUMA MALER 2015

Jo-Juda oketho singruok

¹ Ruoth Nyasaye nowacho ni Jeremia niya,

² “Winj weche mag singruok ma abiro wachoni, eka inyis jo-Juda gi joma odak Jerusalem

³ ni Ruoth Nyasaye ma Nyasach Israel okuong’o ng’ato ang’ata motamore rito wach singruokni.

⁴ En singruok mane atimo gi kweregi kane agologi e piny Misri, e sand mager ka mach makakni. Ne awachonigi ni ka girito chikena, kendo gitimo gik moko duto ma anyisogi, to ginibed joga, kendo anabed Nyasachgi.

⁵ Bang’e eka anachop singruok mane atimo gi kweregi ni namigi piny maber kendo momew, ma koro gintieni.” Jeremia nodwoko Ruoth Nyasaye niya, “Ee, ayie timo kamano.”

⁶ Eka Ruoth Nyasaye nowacho ni Jeremia ni, “Dhiyo iland wechegi e miech Juda kendo e yore mag Jerusalem, kinyiso ji mondo owinj kendo orit weche mag singruokna.

⁷ Chakre kinde mane agoloe kweregi e piny Misri nyaka chil kawuono, asebedo kasiemogi matek mondo girit wechena.

⁸ To ne gitamore winjo kata dewo. Kar timo kamano to ng’ato ka ng’ato nosiko ka timo timbene mag wich teko. Ne oyudo ka osechikogi mondo girit singruokno, to ne gidagi. Mano emomiyo nakelonigi kum duto mane singruokno oting’o.”

⁹ Bang’e Ruoth Nyasaye nowacho ni Jeremia niya, “Jo-Juda gi joma odak Jerusalem piem koda.

¹⁰ Gisedok e richo kweregi mane otamore timo gima ne awacho, nikech gisebedo ka gilamo nyiseche manono. Jo-Israel gi jo-Juda oseketho singruok mane atimo gi kweregi.

¹¹ Kuom mano an Ruoth Nyasaye asiemogi ni abiro kelo masira kuomgi kendo onge ng’at ma notony. To kata ka giywak mondo akonygi, to ok nadewgi.

¹² Bang’e jo-Juda gi joma odak Jerusalem biro dhi ir nyisechegi ma gisebedo ka gitimonigi misengni, mondo okonygi. To nyisechego ok noresgi ka masira obiro.

¹³ Jo-Juda nigi nyiseche mang’eny mana ka miechgi, kendo joma odak Jerusalem bende oseloso kende-mag-misango mang’eny, mana moromo gi yore mag dalagi, mondo gitimie misengni ni Baal.

¹⁴ Kuom mano, in Jeremia, kik ilam ni jogi, kata kik isaya mondo akonygi nimar kata ka ginie chandruok mi giluonga, to ok nadewgi.”

¹⁵ Ruoth Nyasaye wacho niya, “Joma ahero, timo timbe maricho. Ere gimomiyo oyienigi biro e oda? Koso giparo ni ginyalo geng’o masira kuom timo kuong’ruok kendo kuom wang’o boche ma gitimogo misengni? Bende giparo ni ginitony adier?

¹⁶ Chon ne aluongogi ni yadh zeituni ma obokene ng’eny, kendo manyago olembe mathoth mabeyo, to koro abiro wang’o obokene kod bedene gi mach mariadore ka mor polo.

¹⁷ “An Ruoth Nyasaye Manyalo gik Moko Duto ema napidho jo-Israel gi jo-Juda kaka ng’ato pidho yath, to koro abiro bwogogi gi masira nikech richo ma gisetimo. Gisekelo gima kama kuomgi giwegi, nikech gimiya mirima kuom timo misengni ni Baal.”

Jo-Anathoth ochano timo ni Jeremia marach

¹⁸ Ruoth Nyasaye nonyisa gik maricho mane wasika dwaro timona.

¹⁹ Ne achalo gi nyarombo mogol e abila, ka kia ni idwaro nego, kendo ne ok ang’eyo ni ichano gik marichogo kuoma. Ne giwacho niya, “Wanegeuru mondo nyinge olal nono.”

²⁰ Eka nalemo niya, “Ruoth Nyasaye Manyalo Gik Moko Duto, in e jang’ad bura makare, kendo ma temo chuny ji gi parogi. We aneye ka ichulo ni jogo kuor, nikech aseketo wachna e lweti.”

²¹ Jo-Anathoth ne dwaro nego Jeremia, kendo ne giwachone ni gibiro nege ka pod osiko koyalo e nying Ruoth Nyasaye.

²² Kuom mano Ruoth Nyasaye Manyalo Gik Moko Duto nowuoyo kuomgi niya, “Abiro kumogi. Yawuotgi biro tho e lweny. Nyithindgi bende kech biro nego.

²³ Onge kata ng’at achiel kuomgi ma nodong’, chieng’ ma achano ni akelo masira kuom jo-Anathoth.”