Isaya 65 - MUMA MALER 2015

Kum mibiro kumogo joma dagi loch Nyasaye

¹ Ruoth Nyasaye wacho niya, “Ne antie mondo jogo mane ok dwara, omanya. Adier, ne aikora mondo joma ne ok manya, oyuda, ka awacho ni oganda mane ok lama ni, ‘Eri a! Eri a!’

² Ne arieyo bada odiechieng’ duto, ka ahombo joma wigi tek, mane luwo mana yoregi maricho, katimo dwarogi giwegi.

³ Gin joma ne kwinya pilepile, kaneno, ka gitimo misengni e puothe, kendo giwang’o ubani e kende molos gi matafali.

⁴ Ne gigwom e liete joma otho, kendo ne gipondo kuonde mobuto otieno duto, bende ne gichamo ring mbidhi, kod chiemo moko makuero.

⁵ Giwacho ni ji mamoko niya, ‘Kik usud machiegni kodwa, bende kik umulwa, nimar waler moloyou.’ Joma kamago gin mach maliel aliela ma ok tho, ma iche thing’a odiechieng’ duto.

⁶ Neuru! Wachno osendiki e nyima. Ok abi ling’, to abiro kumou kuom richou, kaachiel gi richo mag wuoneu. An Ruoth Nyasaye ema awacho kamano.

⁷ Ne uwang’o ubani e gode duto madongo gi matindo, kukweda, omiyo abiro kwongo pimo pok monego uyudi, eka achulu kaka owinjore!”

⁸ Ruoth Nyasaye wacho kama: “Kaka olemo moko mabeyo ma dilosgo divai nyalo yudore e saga marach, ma ji kwer ni, ‘Kik wit sagano, nimar oting’o hawi,’ e kaka abiro timo ni jotichna, mi ok natiek oganda duto.

⁹ Anami Jakobo nyikwayo ma noluw bang’e, kendo anami Juda jocham gikeni ma nikaw godena. Ee, joga moyier ma jotichna nokaw pinyno mi dagie.

¹⁰ Joga ma osebedo ka lama nokwa jambgi e geng’ Sharon, kendo holo mar Akor nobed leg dhogi.

¹¹ “To un mane ujwang’a, an Ruoth Nyasaye, mi wiu owil gi goda maler, kendo uloso sewni ni nyiseche manono miluongo ni Gad gi Meni, kutimonigi misengni miolo piny,

¹² aseng’adonu buch tho, kendo uduto ibiro negu, nikech ne aluongou, to ne ok udwoka, bende ne alosonu, to ne udagi winja. To ne utimo timbe mamono ma ok ayiego, kuyiero mana gik ma adagi.

¹³ Kuom mano, an Ruoth Nyasaye, awacho niya: Jotichna nochiem, to un unudeny, kendo ginimodhi, to un riyo nohewu. Bende ginibed mail, un to unuyud wichkuot.

¹⁴ Jotichna nower ka chunygi mor, to un unywasgi ka ukuyo kendo chunyu lit.

¹⁵ Ka joga moyier, dwaro kuong’o ng’ato, to giniluong nyingu ka giwacho ni, ‘Ruoth Nyasaye mondo oneg ng’atno, kaka ne onegou.’ Joga to analuong gi nying’ moro nono maber.”

¹⁶ Ng’ato ang’ata ma dwaro mondo oyud gueth e piny, to nyaka kwa mana Nyasach adiera mondo oguedhe. Bende ng’at ma kuong’ore e piny ka, to nyaka kuong’re mana e nying Nyasach adiera, nikech wich nowil gi thagruok machon, mi lal nono e wang’a.

Polo manyien gi piny manyien

¹⁷ “Winjuru, achueyo polo manyien kod piny manyien. Kamano wich nowil gi gik machon, kendo ok nochak opargi.

¹⁸ Emomiyo beduru mamor kendo moil nyaka chieng’ gi gik ma achueyo, nimar achueyo Jerusalem obed dala makelo mor, kendo achueyo joma odakie mondo obed joma oil.

¹⁹ Abiro bedo mamor gi Jerusalem, kendo abiro bedo moil nikech joga. “Ywak kod ywagruok ok nochak owinji e Jerusalem,

²⁰ kendo ok nobedie nyathi matho kapod yom, kata ng’at maduong’ matho kapok ndalone orumo. Bende ka ng’ato otho ka hike mia achiel, to nokwane ka ng’ama otho kapod tin. Joricho mokwong’ kende ema notho ka pok hikgi oromo mia achiel.

²¹ Ji noger udi, kendo ginidagie aming’a, kendo ginipur puothe mzabibu, mi gicham olembgi.

²² Ok giniger udi ni mondo jomoko nono ema odagie, bende ok ginichwo cham ni mondo jomoko nono ema ocham. Joga moyier nodag aming’a mana kaka yath dak, mi kuom ndalo mang’eny ginicham mwandu ma luchgi okelo.

²³ Ok giniketh tekregi kayiem, bende ok gininywol nyithindo maneno masira, nimar gin, kaachiel gi nyithindgi, gin joma Ruoth Nyasaye oguedho.

²⁴ Anadwokgi kapok giluonga, kendo anawinjgi kapok gitieko wuoyo.

²⁵ Ondiek kod rombo nokwa kaachiel kendo sibuor nocham lum mana ka dhiang’ Thuol to nocham mana lowo. Onge gima nohiny ng’ato kata ma noketh gimoro e gode maler duto. An Ruoth Nyasaye ema awacho kamano.”