Isaya 64 - MUMA MALER 2015

¹ Mad ibar polo ilor piny, mondo imi gode oleny e nyimi,

² mana kaka mach wang’o oswekle, kendo yienyo pi! Kitimo kamano, eka wasiki diwinj humbi, kendo ogendini ditetni ka ibiro.

³ Kane itimo honni mane ok wagen ni wanane, ne ilor piny, mi gode oleny e nyimi.

⁴ It pok owinjo kata wang’ pok oneno nyasaye moro ma rito joge mogeno kuome, to mak mana in.

⁵ Ihero ng’at matimo tim makare ka mor, kendo ma paro yoreni. Kata kane ikecho kamano, to wan ne pod watimo richo atima. Wasesiko gi richowa ndalo mang’eny. Koro bende niwarwa adier?

⁶ Waduto wasebedo ka ng’at mogak, kendo timbewa duto mabeyo chalo mana gi lewni mochido. Waduto wasener mana ka oboke, kendo timbewa mamono kwadhowa oko mana ka yamo.

⁷ Onge ng’ama lami, kata matemo mondo opadre kuomi, nikech ipandonwa wang’i kendo ijwang’owa e richowa.

⁸ To kata kamano, A Ruoth Nyasaye in e wuonwa. Wan lop chuech, to in e jachwechwa, kendo wan duto wan tich lweti.

⁹ A Ruoth Nyasaye, kik ibed gi mirima moloyo kaka owinjore, kata paro richowa ndalo duto. Rangwa wahombi, nikech wan duto wan jogi.

¹⁰ Miechi maler kendo madongo duto olokore thim. Kata mana Sayun owuon olokore thim. Adier, Jerusalem osewe gunda.

¹¹ Mach osewang’o Hekalu marwa ma jaber kendo man gi duong’, mane kwerewa pakie, omiyo giwa duto mabeyo osekethore.

¹² Bende diyie weyo gik makamagi, yaye Ruoth Nyasaye? Koso diling’ thi kikumowa moloyo kaka owinjore?