Isaya 59 - MUMA MALER 2015

Jo-Israel ohulo richogi

¹ Bad Ruoth Nyasaye ok chiek, ma ok nyal reso ji, bende ite ok odino, ma ok onyal winjo wach,

² to richou ema opogo kindu gi Nyasachu. Adier, richou ema osemiyo opandonu wang’e, mondo kik owinj kwayou.

³ Lwetu omienore gi remo, kendo usemulo richo. Miriambo bende wuok e dhou, kendo lew hango wach.

⁴ Onge ng’ama donjo ni wadgi e yo makare, kata ma yalo bura gi adiera, to ji duto ogeno kuom weche manono kod miriambo. Gichano weche maricho e chunygi, ma bang’e nywolo mana chandruok.

⁵ Gibutno e tong thuonde, kendo gichueyo mbup otieng’. To chamie tong’go ane, ka ok ditho! Kata temie kitoyo moro, mak ineno ka thuol ema owuokie!

⁶ Mbupgi ok nyal chuego nanga, kendo onge ng’ama nyalo rwako gik ma gichueyo! Tichgi kelo mana chandruok, kendo lwetgi odich mana gi timbe mahundu.

⁷ Tiendgi rikni ka gidhi timo richo, kendo giyot ni chuero remo maonge ketho. Paro mopong’o chunygi en mana paro mamono, kendo kamoro amora ma gidhiyoe, to masira gi chandruok ema dong’ie.

⁸ Ok ging’eyo yo makelo kue, kendo adiera onge e timbegi. Bende yore duto ma giluwo ogondore ogondore, kendo ng’ama luwo yorego ok yud kue kata matin.

⁹ Mano ema omiyo adiera bor kodwa, kendo tim makare ok chop kuomwa. Wagombo mondo wane ler, to mudho lilo ema waneno. Adier, wadwaro mondo piny oru, to mudho mandiwa ema wawuothoe.

¹⁰ Wamulo amula kor udi ka muofni. Adier, watuomore atuoma ka joma ok nen. Wachwanyore godiechieng’, mana ka gima piny oimore. Chutho wachalo mana joma otho e kind joma ngima.

¹¹ Wang’ur mana ka ondiegi, kendo waywagore malit mana ka tula. Wageno yudo adiera, to ok wayudi. Warito resruok to pod en mabor ahinya.

¹² Richowa osebedo ka medore ameda e nyim Nyasaye. Chutho timbewa mamono ema nyiso ni wan joricho. Wang’eyo timbewa mamono kendo waparogi.

¹³ Waseng’anyo, mi waketho e nyim Ruoth Nyasaye. Adier, wasedok chien, mi wajwang’o Nyasachwa. Bende waseparo weche mag miriambo e chunywa, kendo mago ema wawuondogo ji.

¹⁴ Bura makare ogol oko, kendo tim makare ni kuma bor. Adiera bende onge kata mana e chirni, kendo bura makare orumo e ut bura chuth.

¹⁵ Kuom mano, adiera olal nono, kendo ka ng’ato obet motang’ ni richo, to ikwane mana ka janeko! Ruoth Nyasaye noneno ni adiera onge, omiyo iye nowang’.

¹⁶ Noneno ni onge ng’ama dikony, mi mirima mager omake. Mano omiyo ne olocho gi tekone owuon, kendo adierane ema ne okonyorego.

¹⁷ Ne orwakore gi tim makare ka law akor mar nyinyo, kendo ne orwako warruok ka ogut lweny. Bende ne orwako chulo kuor ka ng’ama rwako law, kendo mirima mager ema ne obolo kuome ka law abola.

¹⁸ Obiro timo ni ng’ato ka ng’ato mana gima oromo gi timbene. Ee, obiro kumo wasike gi mirima mager, kata mana mago modak e dhonembe gi chulni.

¹⁹ Kamano ji man yo podho chieng’ gi joma ni yo wuok chieng’ noluor nying Ruoth Nyasaye, kod duong’ne maler, nimar enobi ka aora ma mwomore, ma much Ruoth Nyasaye ema tero.

²⁰ Enobi ka jawar mar Sayun. Ee, nobi mondo ores nyikwa Jakobo moseweyo richogi. Ruoth Nyasaye ema owacho kamano.

²¹ To bende Ruoth Nyasaye wacho niya, “Singruok ma abiro timo kodgi e ma: Roho mara man kuomu, kod wechena ma aseketo e dhou, nosik kodu chakre kawuono, nyaka kuom tienge duto mabiro mag nyikwau. An Ruoth Nyasaye ema awacho kamano.”