Isaya 56 - MUMA MALER 2015

Pok miyudo kuom rito singruok mar Nyasaye

¹ Ruoth Nyasaye wacho niya, “Rituru chik, kendo beduru gi timbe makare, nimar piyopiyo nono resruok ma akelo biro, mi timna makare nonere ratiro kolocho.

² Jal matimo kamano mak oweyo, kendo momako wechego ndalo duto, en jahawi. Adier, ng’at morito Sabato mondo kik kethie, bende ma ok tim gimoro marach, en jahawi.

³ “Ng’at ma japiny moro moseyie kuom Ruoth Nyasaye kik luor, kawacho e chunye niya, ‘Adier, Ruoth Nyasaye biro poga kuom joge nyaka chieng’.’ Ng’ama buoch bende kik wachi ni, ‘An ok an gimoro, to an mana yath ma ok nyagi,’

⁴ nikech an Ruoth Nyasaye awacho kama: Joma buoch marito Sabato maga, kendo mayiero mondo otim gik ma adwaro, bende morito singruok ma asetimo kodgi,

⁵ noyud gima ber moloyo yudo nyithindo. Giniyud rapar e oda kendo e ohingana. Adier, abiro miyogi nying’ mosiko, ma ok rum nyaka chieng’.

⁶ “Kamano bende e kaka an Ruoth Nyasaye, awacho ni jopinje mamoko ma oyie kuoma ka lama, kendo ohero nyinga, bende mobedo jotichna morito Sabato mondo kik kethie, kendo morito singruok ma atimo kodgi.

⁷ Awachonigi ni anakelgi e goda maler, mi ami gibed mamor e oda mar lemo, kendo nayie gi gik ma giwacho e kendona-mar-misango, kaachiel gi misengni ma gitimona, nikech noluong oda ni, Od Lemo mar ogendini duto.”

⁸ An Ruoth Nyasaye machoko jo-Israel moke, awacho kama: “Ji duto mane odong’ mak ochoki, pod abiro dwoko dala.”

Okwer jo-Israel kuom lamo nyiseche manono

⁹ Biuru mondo uchiem un le mae pap kod mae thim,

¹⁰ nikech jotend Israel duto chalo gi jorito ma muofni, ma ok ne gimoro. Giduto gichalo gi guogi ma momni ma ok nyal gueyo. Gihero nindo ka giriere piny, ka gileko

¹¹ Adier, gichalo guogi mowuor ma ok yieng’! Gin jokwath ma ok ong’eyo gimoro. Moro ka moro dhi e yore owuon, kadwaro ohande kamoro amora monyalo yudee.

¹² Ng’ato ka ng’ato kuomgi wacho niya, “Biuru wamany divai kod kong’o makech, mondo wamadh, wamer. Kiny bende nobed maber mana kama, kata moloyo ma.”