Isaya 38 - MUMA MALER 2015

Tuo omako Hezekia

¹ E ndalogo, Hezekia ne tuo, kendo ohewore. Janabi Isaya wuod Amoz nobiro ire, mowachone niya, “Ruoth Nyasaye owacho ni mondo ilam mwanduni ni yawuoti, nimar ibiro tho, ok nikwo.”

² Kane Hezekia owinjo kamano, nolokore mong’iyo kor ot, kokwayo Ruoth Nyasaye niya,

³ “A Ruoth Nyasaye asayi; parie kaka asewuotho e nyimi gi adiera kod chuny mobidhore, ka atimo gik malong’oni.” Eka ne oywak malit!

⁴ Bang’e wach Ruoth Nyasaye nobiro ni Isaya niya,

⁵ “Dhiyo iwach ni Hezekia ni Ruoth Nyasaye ma Nyasach Daudi kwaru owacho kama: ‘Asewinjo kwayoni, kendo aseneno pi wang’i.

⁶ Omiyo abiro medi ndalo moromo higni apar gabich, bende abiro resi kaachiel gi dala Jerusalem e lwet ruodh Asuria, kendo abiro rito dalani.’ ” Eka Isaya ne owacho ni jood Hezekia ni mondo okel ng’owo moswagi, omwon e bur mokuodo Hezekia. Ne gitimo kamano, mi bur nochango. Bang’ mano, Hezekia nopenjo niya: Ere gima biro bedona ranyisi ni abiro dhi e Od Ruoth Nyasaye?

⁷ To Isaya nodwoke ni, “Ranyisi ma Ruoth Nyasaye onyisigo ni obiro timo gima osewacho e ma:

⁸ Rang ane tipo mar wang’ chieng’ manie raidhi mar dhood Ahaz. Abiro dwoko tipono chien ondamo apar.” Kamano wang’chieng’ nodok chien ondamo apar e raidhi mane oyudo oselorie.

⁹ Koro weche mag Hezekia ruodh Juda mane ondiki ka osechango e magi:

¹⁰ “Ne aparo ni abiro tho kapod atin, kendo ni abiro tieko ndalona duto e piny joma otho.

¹¹ Ne awacho niya: Ok anachak aneni A Ruoth Nyasaye, e piny joma ngima, bende ok nachak ane dhano gi wang’a kaka joma ngima neno.

¹² Osepudh oda, mi owit kucha, mana kaka ipudho kiru mar jakwath. A Ruoth Nyasaye, iseng’ado ngimana machiek mana kaka jatueng’o dolo usi, kendo ng’ado. Isanda, chakre okinyi nyaka odhiambo,

¹³ kendo aywak ka an gi rem malit nyaka piny ru. Chokena duto otur, mana ka gima sibuor ema oturo. Adier, isanda, chakre okinyi nyaka odhiambo,

¹⁴ omiyo aywak mana ka opija kata akuru, kendo wengena otho bo kuom rango malo. A Ruoth Nyasaye, winj ywakna mondo ibed jawarna.

¹⁵ Ere kaka dater ywakna ni Ruoth Nyasaye? Koso en ang’o ma dawachne, ka en owuon ema osetimona gigi duto? Abayo abaya koni gi koni engimana duto, nikech chandruok ma chunya nigo.

¹⁶ To pod chunya nobed mana kodi, A Ruoth Nyasaye. In ema imiyo chunya yueyo. Duoga iri mondo abed mangima.

¹⁷ Chutho, koro aseneno ni chandruok duto mane aseyudo konya, nimar iseresa e tho nikech herani. Bende isewito richona duto ka dieng’eyi.

¹⁸ Piny joma otho ok nyal goyoni erokamano! Adier, joma otho ok nyal paki. Chutho, joma osedhi e bur ok nyal geno adiera mari.

¹⁹ To joma ngima kende ema nyalo goyoni erokamano kaka agoyoni kawuononi. Wuone bende nyiso yawuotgi adiera mari, A Nyasaye.

²⁰ Ruoth Nyasaye oikore mondo oresa! Kuom mano, waweruru wende pak, ka wagoyo thumbe e Od Ruoth Nyasaye e ndalo duto mag ngimawa.”