Isaya 34 - MUMA MALER 2015

Ruoth Nyasaye okecho gi Edom kod ogendini mamoko

¹ Un ugendini mae piny, biuru ka mondo uchik itu. Piny ngima kod gimoro amora manie iye, mondo owinj wachna,

² nimar Ruoth Nyasaye nigi mirima mager kod ogendini duto, kod jogi mag lweny. Kuom mano osekuong’ogi ni mondo oneggi, mi tiekgi chuth.

³ Jogi monegi nowe oko mak oyiki, mi ringregi pong’ piny gi mifuolu, kendo rembgi nobubni e gode.

⁴ E ndalono gik moko duto manie polo malo noleny, mi lal nono. Polo bende nodol mana ka kalatas, kendo sulue nolwar piny mana ka oboke moner, kata ka olemo mochiek.

⁵ To ka ligangla mar Ruoth Nyasaye osetieko tichne e polo, to obiro lwar kuom jo-Edom, ma en oganda ma osekuong’o mondo otieki.

⁶ Ligangla mar Ruoth Nyasaye notim remo lilo, kendo boche nogawre kuome, mana ka gima gin boche mag nyiroke imbe, kod remb rombe gi diek mitimogo misango, nimar Ruoth Nyasaye biro timo misango Bozra, dala Edom. Ee, obiro neko malich e piny Edom.

⁷ To kar nego jope, to ruodhi ema obiro nego, kendo kar nego ruedhi, to oganda mar joma rateke ema nonegi, mi remo pong’ piny, kendo piny leny nikech boche,

⁸ nimar Ruoth Nyasaye oseketo chieng’ ma obiro chuloe kuor. Adier, oseketo higa ma nokumie jo-Edom kuom gima ne gitimo ni Sayun.

⁹ Aore mag Edom nolokre lam, kendo lowo man kuno nolokre mach lilo,

¹⁰ mi pinyno lokre lam maliel otieno gi odiechieng’, ma ok nyal negi, bende iro nodumie mochwere. Enodong’ thim kuom higni gi higni, kendo onge ng’ama nochak oluw kuno.

¹¹ Nobed kama otenga gi chiew gi tula kod agak ema odakie. Ruoth Nyasaye nopim pinyno, mi oyud ni oromo gi ketho, omiyo enodong’ nono.

¹² Onge ruoth ma noti pinyno, bende jodonge norum pep.

¹³ Kudho ema noyugno e udi madongodongo man kuno, kendo aila kod pedo nogawre e mier mage mochiel gi ohinga. Enobed piny marach ma ondiegi ema nitie, kendo ma tula ema odakie.

¹⁴ Le mae thim kod ondiegi norom kuno, kendo kanyo ema jochiende noyudree. Gik malich mag otieno nodag kanyo, mi yud kar yueyo.

¹⁵ Aywer noger ode kuno, mi nywolie tonge, kendo toye nyithindo. Noumgi gi buombe mondo kik gimoro chamgi. Otenga bende nochokre kuno, moro ka moro gi wadgi.

¹⁶ Somuru kitap Ruoth Nyasaye, to ubiro yudo ni onge achiel kuom gigo ma nobed maonge, kendo roho mare ema nochokgi.

¹⁷ En ema oseyiero ni moro ka moro kare, kendo osepogonigi piny, kopimo gi tol. Pinyno nobed margi nyaka chieng’, kendo ginidagie tieng’ gi tieng’.