Isaya 3 - MUMA MALER 2015

Kum ma Nyasaye biro kumogo Jerusalem gi Juda

¹ Winjuru! An Ruoth Nyasaye Manyalo Gik Moko Duto abiro tieko chiemo kod pi e Jerusalem gi Juda, kendo abiro golo ji duto ma ugeno kuomgi,

² kaka thuondi marateke kod jolweny gi jong’ad bura gi jonabi gi jokor wach gi jodongo

³ gi jotend ogend lweny gi joma ogen gi jo bura gi jonyakalondo kod ajuoke mamoko.

⁴ Bang’e anaket mana yawuowi matindo obed jotendu kendo giniritu mana gi timbe mag oyuma.

⁵ Ji nosandre kendgi giwegi, ka ng’ato ka ng’ato dhaw mana gi wadgi, to nyithindo bende yanyo joma dongo, kendo ji ajia chayo joma ogen.

⁶ E ndalogo ng’ato nyalo dhi ir wadgi e odgi, mi wachne niya, “In, in gi lewni, omiyo yie ibed ruodhwa mondo irit pinywa mokethore.”

⁷ To ng’atno nodwoke niya, “Ooyo, ok dabed ruodhu, nimar aonge gi chiemo kata lewni e oda, omiyo ok unyal keta ruodh ogandani.”

⁸ Jerusalem nokethre kendo Juda nopodhi nikech gisewuoyo marach kuom Ruoth Nyasaye, bende gisetimone timbe maricho, ka gipiem gi duong’ne mang’ongo.

⁹ Wang’gi ema nyiso ni gin joricho, kendo gihulo richogi ahula ma ok gipando, mana ka jo-Sodom. Yaye, mano kaka ginine masira, nikech giniyud pok mowinjore gi timbegi maricho.

¹⁰ Ng’at makare en jahawi, kendo gik moko duto dhine maber, nikech oyudo pok kuom gik mabeyo motimo.

¹¹ Jaricho to nigi masira, kendo gik moko duto dhine marach, nikech oyudo pok moromo gi timbene maricho.

¹² Joga to nyithindo ema thiro, kendo mon e jotendgi. A yaye joga, jotendu wuondou, kendo gimiyo ubayo yo monego uluw.

¹³ To Ruoth Nyasaye biro mondo oyal kendo ong’ad bura ni joge.

¹⁴ Ee, oyalo jodong joge gi jotendgi, kowacho niya, “Useketho puotha mar mzabibu, kendo gik moko ma useyako kuom joma odhier opong’o uteu.

¹⁵ Ere kaka unyalo hedhoru nyono joga kendo thiro joma odhier?” Mano en wach mar adier, ma Ruoth Nyasaye Manyalo Gik Moko Duto ema owacho.

Kum ma ibiro kumogo mond Jerusalem

¹⁶ Eka Ruoth Nyasaye nochako owacho niya, “Mond Sayun sungore kendo kawore, ka ging’ayo ng’utgi malo, kendo gimoyo wang’gi. Bende giwuotho ka ging’adore kendo manyonge manie tiendegi ywak.

¹⁷ Omiyo abiro keto tuo e wigi, kendo ami gidong’ duge.”

¹⁸ Chieng’no anami manyonge ma girwako e ng’ut tiendegi, kod lewni mag leso, gi gik ma gilichogo wigi,

¹⁹ gi tigo ma giketo e ng’utgi, gi ronge mag lwedo, gi nanga miliero e ng’ut,

²⁰ gi kitembni mag wich, gi thiwni mag ng’ut tielo, gi lwedo,

²¹ gi tere mag um gi mag lwedo,

²² gi lewni mabeyo, gi kabude, gi sukni, gi mifuke mag lwedo,

²³ gi kio matindo, gi nengni mabeyo, gi kilembni, kod lewni miumogo wang’.

²⁴ Kuom mano kar winjo tik mang’ue ng’ar, to unuwinj mana tik madum marach. Bende kar bedo gi misip, to tol ema notueugo, kendo kar bedo gi wich molos maber, to bondo ema unubedgo, bende kar rwako nanga maber, to gunia ema unutue e nungou, kendo kar bedo gi chia maber to mbelni mag mach ema nobed e dendu.

²⁵ Ligangla noneg jou machwo kendo thuondu notho e lweny.

²⁶ Ywak kod dengo nopong’ dhorangeye mag Sayun, kendo dalano nodong’ nono kokethore.