Isaya 28 - MUMA MALER 2015

Siem mosiemgo jo-Israel

¹ Yaye, inine malit, in dala Samaria manie holo momew, ma jomer mag Israel sungorego ka osimbgi. Duong’ni biro rumo mana ka maua moner, in dala ma joge lwokore gi kong’o!

² Winjuru! Ruoth Nyasaye biro kelo ng’at maratego moseyiero mondo oketh pinyu. Obiro biro mana ka yamb koth makelo pe, maketho piny, kata mana ka pi ohula mabubni kaywoyo gik moko.

³ Bang’e osimbo ma jomer mag Israel sungoregono nonyon piny,

⁴ mi duong’ne biro rumo ka maua moner, kata ka olemo mokwongo chiek, ma ng’ato ang’ata moneno, to pono chamo ka rikni.

⁵ Chieng’no Ruoth Nyasaye Manyalo Gik Moko Duto ema nobed osimbo maber mar duong’ ni joge manok modong’.

⁶ Enomi jong’ad bura mau bed gi chuny mar ng’ado bura gi adiera, kendo enomi jolwenju ma kedo matek gi wasigu e dhorangeyeu bed gi chir mathoth.

Siem kod singruok momi jo-Jerusalem

⁷ To koro jotend Jerusalem duto bende gin jomer. Jodolo mage kod jonabine mer kendo kwang’ nikech kong’o makech, omiyo gitimo gik mofuwo. Gitagore ataga ka gineno fweny, kata ka ging’ado bura.

⁸ Ging’ok e mesni, kendo kuonde duto ma gintie onywandore.

⁹ Giwacho niya, “Koro ere ng’ama Janabi paro ni biro puonjo? Koso ere joma biro winjo tiend gima opuonjo? Mit koparo ni wan nyithindo ma tinde eka oweyo dhoth?

¹⁰ Onwoyonwa gik mowacho ndalo mang’eny, kodhum gi weche ma onge tiendgi.”

¹¹ To chutho, kamano e kaka Ruoth Nyasaye biro loso kodgi, kowuoyo gi dhok moro nono ma ok ginyal winjo.

¹² Chon Nyasaye nowachonigi niya, “Achiwonu yueyo maradier, kendo joma ool mondo oyue. Adier, mano e yueyo.” To ne gidagi winjo.

¹³ Mano omiyo Ruoth Nyasaye nochak owuo kodgi kadhum gi weche ma onge tiendgi! To ka giwinjo wechego, to ginichwanyre, mi gipodh kendo gitur. Ginimok e obadho, mi makgi, kendo tergi e tuech.

¹⁴ Kuom mano, chikuru itu, un josunga, ma jotend jo-Jerusalem.

¹⁵ Uwacho niya, “Wasetimo winjruok gi tho. Adier, wasetimo singruok gi Piny Joma Otho. Omiyo ka ohula miwachono biro, to ok obi ywoyowa, nikech waseloso miriambo ka kar konyruokwa, kendo wuondruok e okumba ma wageng’orego.”

¹⁶ To koro Ruoth Nyasaye wacho kama: “Winjuru! Abiro keto kidi mar mise e Sayun, mondikie ni, ‘Ng’ama oyie ok norikni.’ En kidi motegno, moyier, ma nengone tek, momako kor ot.

¹⁷ Anami adiera bed rapim, kendo anami tim makare bed tol mipimogo ot, kigero. To kodh pe biro ywero miriambo ma ugeng’orugo. Kendo pi ohula biro mwomo kar konyruoku,

¹⁸ mi winjruok mane utimo gi tho, kethre, kendo singruok mane utimo gi Piny Joma Otho, rum. Pi mabubni noywo gik moko, mi unuchal gi piny ma ohula omwomo!

¹⁹ Pile pile ohula nobi, mi yweru. Adier, noywou okinyi kokinyi, kendo odiechieng’ gotieno. Kuwinjo wachni, to unukirni,

²⁰ nimar unubed e thagruok mana ka ng’ama onindo e kitanda machiek, ma ok nyal riere tir, kendo ma baranget ma oumorego tin, ma ok nyal ume maber.”

²¹ Ruoth Nyasaye biro a malo gi mirima, kaka ne oa malo e got Perazim, kendo kaka ne otimo e holo mar Gibeon, mondo oti tije magalagala ma osechano timo, ma ji ok par ni onyalo timo.

²² Koro weuru sunga, nono to ibiro tueu gi ratego motegno, nimar asewinjo ka Ruoth Nyasaye Manyalo Gik Moko Duto golo chik mondo oketh piny duto.

²³ Chikuru itu mondo uwinj wechena:

²⁴ Uparo ni ng’ato nyalo siko ka puro apura puodho, to ok chwowe kodhi? Koso onyalo buso abusa nyalandra, to ok opidh gimoro?

²⁵ Donge ka osetieko buso, to ochuoyo kothe mopogore opogore, moro ka moro gi kare mowinjore kode?

²⁶ Ong’eyo gima onego otim, nikech Nyasaye ema puonje, kendo nyise yo maber monego otimee.

²⁷ Cham duto ok diem machalre. Moko idino gi radin, to moko iteng’o gi luth.

²⁸ Ngano en cham mayom, omiyo ok dine matek, nimar dipo ka ong’inyore matindotindo. Chutho, ok dine nyalandra. Kata ka obedo ni iywayo gari kuome mondo tiende gari odine, to ok tim kamanoo aming’a, nimar dipo ka orege mayom.

²⁹ Wachno bende oa kuom Nyasaye Manyalo Gik Moko Duto, ma ng’ado rieko mabeyo, kendo ma tekone duong’!