Isaya 24 - MUMA MALER 2015

Okor wach ni Nyasaye biro kumo piny

¹ Winjuru! Ruoth Nyasaye biro teng’o piny, mi dong’ nono. Obiro bare, mi oloke ataro, kendo oke joma odakie.

² Chieng’no jadolo nobed maromre gi ji ajia, kendo misumba nobed maromre gi ruodhe. Jahon gik moko bende nobed maromre gi jang’iewo, kendo jahol ji nobed maromre gi ng’ama holo.

³ Piny nodong’ nono haa, kendo nokethre chuth, nikech Ruoth Nyasaye ema osewacho kamano.

⁴ Piny notwo kendo gik mantie noner. Adier, piny duto noner kendo notwo, koda ka kuonde moting’ore duto.

⁵ Ji modak e piny osedwanyo piny, nikech gidagi rito chike, mi giketho muma mochwere.

⁶ Mano emomiyo kuong’ biro mwonyo piny, kendo joma odakie none chandruok nikech richogi, bende ginilal nono, mak mana ji manok kende ema nodong’.

⁷ Yiend mzabibu noner, mi divai mobi manyien nobed matin. Joma mor bende chunygi nobed malit.

⁸ Nyiduonge noling’ thi, bende mahu ma joma mor goyo norum, kendo thumbe ok noywagi.

⁹ Onge ng’ama nochak omadh divai ka wer, kendo kong’o nobed marach ni jamath.

¹⁰ Dala Manono nokethre chuth, kendo ot ka ot nolor mondo joyeko kik donjie.

¹¹ Ji noywagre e wang’yore nikech divai nobed maonge. Tuke duto bende norum, kendo mor nobed maonge e piny.

¹² Dalano nodong’ mana gunda, kendo dhorangach notur matindotindo.

¹³ Mano e gima biro timore e piny ngima, kendo ni oganda ka oganda. Ji manok kende ema nodong’, mana kaka olemo manok ema dong’ e yadh zeituni moyiengi, kata e yadh mzabibu mihulo bang’ keyo.

¹⁴ Ji biro ywak matek yo podho chieng’, ka gikok niya, “Mano kaka duong’ mar Ruoth Nyasaye ng’ongo!

¹⁵ Kuom mano ji mondo omi Ruoth Nyasaye duong’ e pinje man yo wuok chieng’, kendo nying Ruoth Nyasaye ma Nyasach Israel opaki e dhonembe gi chulni man yo podho chieng’.”

¹⁶ Wasewinjo ka giwer e tung’ piny ka tung’ piny niya, “Mano kaka Ng’ama Kare ber!” An to chunya pod lit ahinya, nimar ji pod osiko ka timo atima richo, kendo ndhogruok opong’o piny.

¹⁷ A yaye, un joma odak e piny, masira gi bur kod obadho ema ochomou!

¹⁸ Ka uringo masira, to ununyumru e bur, kendo ka utony mak unyumoru e bur, to obadho nomaku, nikech masira biro lwar kuomu koa e polo, kendo piny duto noyiengni marach.

¹⁹ Piny nobarre, mi gik moko duto lal nono.

²⁰ Adier, piny notagre mana ka ng’at momer, kendo noukni mana ka kiru ma yamo yiengo. Nopodhi, to ok nochak ochung’ kendo, nimar richo ji ohinge gi pek.

²¹ Chieng’no Ruoth Nyasaye nong’ad bura, mi malaika mae polo, nokum e polo, kendo ruodhi mae piny, nokum e piny.

²² Enochokgi mana ka joma omaki, mi ketgi e od tuech nyaka chop yalgi, kendo kumgi.

²³ Due norieny matiptip, kendo wang’chieng’ bende noimre, nikech Ruoth Nyasaye Manyalo Gik Moko Duto nogur lochne e got Sayun man Jerusalem, mi duong’ne maler norieny e nyim jodonge.