Isaya 23 - MUMA MALER 2015

Wach mokor kuom Turo gi Sidon

¹ Wach mane Nyasaye onyiso e fweny kuom Turo ema: Un yiedhi madongo mag Turo madhi Tarshish, ywaguru, nikech dhowath mugowoe ibiro kethi chuth. Ubiro winjo wachni e yo kurawo e chula Saiprus.

² Un joma odak e dho nam, ling’uru thi. Ywaguru, un joohala mag Sidon,

³ ma jotendgi ng’ado nembe mondo oom cham Shihor, kendo ma yudo ohala kuom ting’o mwandu mag ogendini.

⁴ Dala mar Sidon, ma en dhowath mochiel motegno, noywagi ka wiye okuot ka wacho niya, “Tinde ok awinj rem mar muoch. Nyithindo bende ok anywol. Aonge gi nyithindo ma yawuowi kata ma nyiri ma apidho.”

⁵ Ka jo-Misri owinjo masira ma biro mako Turo, to ginichandre malit mi giwach niya,

⁶ “Yaye, un joma odak e dhonam, ywaguru, kendo idhuru yiedhi udhi Tarshish.

⁷ Yande jou dhi e pinje mamoko maboyo mondo oyud kuonde dak, to koro dalau mane mor, kendo humbe olak chon, odong’ mana gunda!”

⁸ To en ng’a mosechano kelo masira kuom Turo, dala ma pinje moko nie bwoye, kendo ma joohala mage gin joma ogen e piny ngima?

⁹ Ruoth Nyasaye manyalo Gik Moko Duto ema osechano kelo masirano mondo otiek sunga mar joma ogen, kendo okel achaya kuom ji duto moluor ahinya e piny.

¹⁰ Kuom mano, pururu lowo un jo-Tarshish, nikech ohandu biro rumo!

¹¹ Ruoth Nyasaye oserieyo bade e nam mondo olok loch ruodhi, bende osegolo chik mondo omuk miech Kanaan mochiel motegno.

¹² Osewacho niya, “Yaye, un jo-Sidon, dala mothir, ok unuchak uubed mamor. Kata ka ung’ado nam mudhi Saiprus, to kuno bende ok unuyudie yueyo.

¹³ Ranguru uneye piny jo-Babulon. Jo-Babulon ema nolok Turo thim ma ondiegi dakie, to jo-Asuria ok ema noloke. Ginidhur lowo mondo ginyon ka giidho ohingane, kendo ginimuk ut ruodhi, mi giketh dalano chuth.

¹⁴ Ywaguru, un yiedhi madongo madhi Tarshish, nikech dhowath mugowoe ibiro kethi.

¹⁵ Chakre chieng’no wich nowil gi Turo kuom higni piero abiriyo, maromre gi hik ruoth achiel. To ka higni piero abiriyogo oserumo, to Turo nochandre ka dhako ma jachode miwero niya:

¹⁶ In dhako ma jachode mojwang’, kaw thumi iwuothgo e dala koni gi koni, kigwelo puch mamit, kendo kiwero wendi duto, mondo chwo ochak opari.”

¹⁷ To bang’ higni piero abiriyo Ruoth Nyasaye nokech Turo, mi resi, to kata kamano, dalano nodog e tije machon, mi oyud ohala kuom tiyo ni ogendini duto mae piny ngima, mana kaka dhako ma jachode yudo ohala kuom dwanyruok gi chwo.

¹⁸ To ohala moyudo e tijeno nochiw ni Ruoth Nyasaye. Ok nokunggi, bende ok nokan-gi, to nong’iew kodgi chiemo mathoth kod lewni mabeyo ni jodolo mag Ruoth Nyasaye.